SAKARIA 11 - Kok Borok (Re-edited) Bible (BSI)

Sátoknairok klaimani

¹ Lebanon, nini dugar phiyok di, hakhe hór nini sidar buphangrokno kham rw thung!

² Swlwkgwi kap di, o pain buphang tamni hwn ba sidar báiwi klai kha, naithok buphangrok sokomorjak bai kha! Kabwi, swlwk di, o Basanni uk buphangrok tamni hwn ba bolong jajirok hokjak bai kha.

³ Mera mwrwknairok kap laima khorang khna di; tamni hwn ba bórokni naithok kwma kha! Singho pungma khorang khna di, tamni hwn ba Jordanni bolong jajirok hokjak bai kha.

Mera mwrwknai Khoroknwirok

⁴ Subraiyung ani Kaitor hai hwnwi sa-o: “Ratharjakna naiwi tongnai merarokno mwrwk di.

⁵ Bórokno painairok bórokno butharo, tamo khe bórok sátokjak ya, bórokno phalnairok hai hwnwi sa lai-o, ‘Subraiyungno lobjak thung, tamni hwn ba ang gwnang wng kha,’ bórokni mwrwknairok se bórokno kisa phano khairok li ya.

⁶ Ang o ha-o tongnairokno tei khairok glak, hwnwi Subraiyung sa-o. Ang bórokno bórokni nok ari tei ganani bubagrarokni yago yapharnai; hakhe bórok hano sukhrupnai tei ang khoroksano phano bórokni yakni phiyók glak.”

⁷ Hakhe Ang mera pai-phal khlainairokni wngwi ratharjakna naiwi tongnai merarokno mwrwk kha. Ang dang kongnwi na kha; kongsano khe Khairokma, tei kongsano khe Thansa, hwnwi mung phar kha, hakhe merarokno mwrwk kha.

⁸ Talsani bisingo ang mera mwrwknai khorokthamrokno yakarwi rw kha, tamni hwn ba ang tei hama logwi man li ya, hakhe bórokbo ano yakarwi rw kha.

⁹ Hakhe ang hai hwnwi sa kha, “Ang tei nini mera mwrwknai wng glak. Thwinai khe thwi si thung; sokomorjaknai, bo sokomorjak si thung; karwi klangjaknairok khe sak bai sakni bahan chá lai si thung!”

¹⁰ Hakhe ang Khairokmung, hwnmani a dangno na kha tei abono swbaiwi bebak bororok bai kók kha laimano swbai kha.

¹¹ Hakhe a salo’-no kók kha laimani swbaijak kha tei mera pai-phal khlainairok, ano naisigwi tongnairok abo Subraiyungni kók se hwnwi sinai.

¹² Hakhe ang bórokno hai hwnwi sa kha, “Norok abono chajak khe, ano ani rang manthai rw di; hai ya khe narwgwi ton di.” Hakhe bórok ano rukphai belep lepthamchi rw kha.

¹³ Aphuru khe Subraiyung ano hai hwnwi sa kha, “Abono rangkhógo ton di” bórok ano chúkjagwi rwmani se. Hakhe ang rukphai belep lepthamchi naui Subraiyungni nok bisingni rangkhógo ton kha.

¹⁴ Ang tei kongsa thansa hwnma a dang swbai kha, hakhe Juda bai Israilni takhuk kwrwngwi tong laimani swkakjak kha.

¹⁵ Hakhe Subraiyung ano sa kha: Tei uáisa chúk ya mera mwrwknaini manwino na phi di.

¹⁶ Ang tabuk o ha-o khoroksa mera mwrwknai bacha rwnai, bo komorwi tongnai merarokno cher glak, kwmanairokno rutuk glak, hamyaroknobo ham rw glak, kahamroknobo naikini khlai glak, tamo khe mera milik kuphungrokno khe cháui tei bórokni yáskunobo swbainai.

¹⁷ O merarokno khibinai chúk ya mera mwrwknai bwswk se hamya sitrano! Bini yak tei yagrani mokol seng bai swprakjak thung! Bini yak hoichaui tháng súk thung!