RWCHAPMUNG 8 - Kok Borok (Re-edited) Bible (BSI)

¹ Nwng ani amani abuktwi cháui tornai ani takhuk hai! Tumung ang nono phataro malai phano motom su-ui man kha mun. tei khoroksa phano mungsa hwn glak kha mun.

² Hakhe ang nono tolwi amani khotolo tubu-ui phai kha mun, ano ogo chunaijwkni khotolo. Ang aro nono motom sabuljak angur bwtwi tei dalim bwtwino khan rw kha mun.

³ Bini yaksi yak ani khorogo romjak tei bini yagra bai khe ano kwbakjak!

⁴ O Jerusalemni bwrwirok ang norokno koiwi sa-o, ani hamjakmano jora wng ya sini tungphla rwui ta socha di!

Uáidokni rwchapmung Bwrwirok

⁵ Sabo bini hamjakma chwlano kwbagwi hasing panthorni phai? Apel yaphango ang nono socha kha. Aro’-no nwma nono ok sajagwi bá-o.

Bwrwi

⁶ Ano nini bwkha-o tei yago sil hai khe mari bu-ui ton di; tamni hwn ba hamjakma wng kha thwimung hai phan gwnang, hamjakmung manna muchungmani abo kwthwi tongthai hai kasu-ui man ya, hór chẃngjak hai jlai-jlai khe chẃngo.

⁷ Twi Kwbángma phano hamjakmano butharwi man ya, twi kotorbo abono swklwgwi man ya. Tumung khoroksa swk hamjakmani bagwi nok-hukni bebak rwui rw phano abo le kisicha se.

Bwrwini Takhukrok

⁸ Chini bukhuk khoroksa tongo, bini khája se phaisa ya kho. Bono káina kók sók phai khe chwng chini bukhukni bagwi tamo khlainai?

⁹ Tumung bo deual wngma tlai chwng bini saka-o rukphaini nok kuchuk tang kha mun; tumung bo duglam wng khe, chwng sidar buphang bwlap bai kholop kha mun.

Bwrwi

¹⁰ Ang le chokdeual se, tei ani khájarok khe nok kuchukrok hai; hakhe ang bini mokolni kangma ham rwnai hai wng kha.

Chwla

¹¹ Balhamono Solomonni angur bwlwng tongmani; bo angur bwlwngno mwrwknaino barja rw kha; a bwtháini bagwi rukphaini rang belep sa-sai rw-o.

¹² Ani sakni angur bwlwng, abo ani banta’-no; o Solomon, nini a sa-sai rang nini’-no tong thung tei angur bwlwng nainaini banta khe nwira!

¹³ O tháiblwngrogo tongnai, ani mángsongrok nini khorang khna-o; anobo khna rwja di.

Bwrwi

¹⁴ O ani khájani motom báhai, hathái sakani mwswi bwsa eba mwswi hai khe doui phai di.