RWCHAPMUNG 7 - Kok Borok (Re-edited) Bible (BSI)

Chwla

¹ O isirijwk nini yakungrok bwswk se yaklaprok bai mwchang! Nini yaphungrok manwi tak kwrwngrok takma hai naithok.

² Nini omthai khe angur bwtwi sabuljak pái phlai ya dangai hai kiting. Nini ok khebo lili khum bai máng kitingjak gom rúngjak hai.

³ Nini khájarok mwswi bojro hai, mwswi bwsa apherrok hai.

⁴ Nini kotok khe mayung buani snamjak nok kuchuk hai. Nini mokolrok Bethrabim duglamni Hesbonni pukhirirok hai. Nini bukung khe Damaskos bwkhak naharjak Lebanonni nok kuchuk hai.

⁵ Nini bokhorok khe Karmel hathái hai, nini bwkhnai khe kwsap tei kochual; a naithokma bwkhnai-o habugra khajagwi tongo.

⁶ O ani hamjakma, ano tongthok rwnaijwk nwng bwswk se naithok, bwswk se kaham kuk!

⁷ Nini sakduk-mangduk le swmal phang hai, nini khájarok aboni bwthái bochop hai.

⁸ Ang khajuriphango kasanai, tei aboni bwtháino tangnai. Nini khájarok angur bwchap chapnwi hai wng thung, nini hamabo apelrokni báhai hai,

⁹ tei nwng motom sumarok khe arak kaham hai, Abo twrwk twrwk khe bwkhwchwi tei bua tẃi yor khlaiwi thángo.

Bwrwi

¹⁰ Ang khe ani khásukni, tei bini muchungmarokbo ani bagwino.

¹¹ O ani khásuksa, tho phai di, panthor bwkhak tháng laiwi kami-o tongwi lai anw;

¹² phai di aidrobo angur bwlwngrogo tháng lainai, tei abo ro de rotom kha nai lai anw, tei dalim bubar da bar kha nai lai anw. Nono ang aro ani hamjakmano rwnai.

¹³ Mandrak bwthái báhai motomsa kha, kaham kaham bwthái-bumukrok chini nok dugar gana’-ono tongo, o ani khájani abórok bebakno nini bagwi khatiui tono.