RWCHAPMUNG 6 - Kok Borok (Re-edited) Bible (BSI)

Bwrwirok

¹ O naithok kuk, nini hamjakma borok biyang tháng lang? Nini hamjakma borok bu lama tẃi tháng? Sa di, hakhe chwngbo nwng bai baksa naitugwi man anw.

Bwrwi

² Ani khájani borok bini tháiblwngo tháng kha, motom báhai buphangrok tongma-o mera bodol mwrwknani tei lili khumrok kholna thángo.

³ Ani hamjakma khe ani tei angbo bini se; bo bini mera bodolno lili khum tongma bwlwngo mwrwgo.

Uáibani rwchapmung Chwla

⁴ Ani hamjakma, nwng Tirja kamiyung hai naithok, tei Jerusalem haino naithok, tei banarok tẃijak sengkrak hai kirimasingcha.

⁵ Nwng ano ta naisik si di, tamni hwn ba abórok ani bwkha kobor cha rw-o! Nini khwnairok Giliad halapni khár klai phainai pun bodolrok hai.

⁶ Nini buarok khe; buikhumu rajak merajwkrok bodolrok tuku-ui kasadroprok hai, bórok bebakno maknwi maknwi khe bánai máng, tei abórok masa phano debo dera ya.

⁷ Rí hungjak bising tẃi nini khangarrokbo dalim bwthái hai naithok.

⁸ Khorok dokchi isiri tei khorok charchi hik kotoirok tei bwrwi siklarokbo kwbángma tongo.

⁹ Tamo khe ani tokthu, ani kaham kuk ani khásuksa hai le tei kwrwi. Bo bini amani khájani songdari sajwk, bono ogo chunaijwkni hamjakma sajwk. Bwrwirok bono nugwi hamchajak hwnwi hwn lai kha; isirirok tei hik koitoirokbo bono ma bólai kha.

¹⁰ “Omo sabo sal pasa dropni sal hai, tal hai pilala, sal hai kwchẃng, bana kobonsajak sengkrakrok hai kirimasingcha?”

¹¹ Harungni buphangrok barma, angur buphangrok rotomsama tei dalimrok thái ma naina bagwi ang badamphang bwlwngo tháng kha.

¹² Ang saui man slap ya sini-no ani bwkha ano ani habugrani korai malkhungo kasa rw kha.

Bwrwirok

¹³ Kiphil di, kiphil di, o Sulamjwk! Kiphil di, kiphil di, chwng nono nai grana. Nwng tamni sengkrak bodol kwnwini kwcharo Sulam mwsamano nainani muchung?