RWCHAPMUNG 4 - Kok Borok (Re-edited) Bible (BSI)

Chwla

¹ O ani hamjakma, nwng bwswk se naithok, bwswk se naithok! Rí hungklaijak bising tẃi nini mokolrok tokthu hai naithok. Nini khwnairok Giliad harung tẃi khár klai phainai pun bodolrok hai.

² Nini buarok khe, buikhumu rajak merajwk bodolrok tuku-ui kasadroprok hai, bórok bebakno maknwi maknwi khe bánai máng, tei abórok masa phano thwbo thwijak ya.

³ Nini khukchwirok khutwng twngnwi kwchak hai, tei búkhúk bwswk se naithok. Rí thuklupjak bising tẃi khe nini khangarrokbo chayiying khe naithogo.

⁴ Nini kotok khe Daudni nok kuchuk hai bokobom tei milik; aro kwbángma phuirok khachijak abórok sengkrakrokni phuirok máng.

⁵ Nini khája khe mwswi bwsa apher hai, lili khum bwlwngo cháui berai tongnairok hai.

⁶ Phung aiwi pilala wngwi mwnakma kwma ya sak, ang mur tei satrai motom hathái-o tongnai.

⁷ O ani khájani, nini le bebakno se naithok; mungsa-o se nini derama kwrwi.

⁸ O ani bwrwi, ang bai baksa Lebanonni phai di; Lebanonni ang bai phai di. Amana hathái bochlongni, Senir tei Harmon hathái bochlongni phai di. Nwng singhorok tongma hakhorrokni tei geguma tongma hatháirokni ongkhorwi phai di.

⁹ Nwng ani kháno khok kha, ani hanok, ani bwrwi, nini mokol bai naisigwi tei nini kotokni anchwlwi bai ani bwkhano khok kha.

¹⁰ Nini hamjakma bwswk se kwtẃi, ani khásuk ani bwrwi! nini hamjakma angur bwtwini slái kaham, tei bebak langi-thok motomni slái se nwng motom kugo!

¹¹ Nini khúk piya bwtwi swk kwtẃi; abuktwi tei piya bwtwi nini slái-o tongo; nini rírok báhairok Lebanon hai.

¹² Ani khásuk, ani bwrwi le chokdeual kitingjak thái bwlwng hai, kholobwi tongjak thai bwlwng tei twimuk hai.

¹³ Nini buphang bwsarok dalimphang bari hai tei aro bwthái kothokrok motom hena bai bwlái motom khumrok tongo,

¹⁴ nard tei saphrom, mur belengtwi, elachi tei báhai motom tei satrai motomrok mur tei aloirok phiya dal-bidal bakhor buphangrok tongo;

¹⁵ nwng tháiblwngrokni twimuk tei Lebanonni yorkhlai phainai twikherengrok hai.

Bwrwi

¹⁶ O salsibaini nokbar sibcha di, salgrabaini nokbar sipsaui tháng di! bini motomma báhai koprogwi manna tẃi. Ani khájani borok tháiblwng phaiwi bo thokjakma bwtháirokno chá phai si thung.