RWCHAPMUNG 2 - Kok Borok (Re-edited) Bible (BSI)

¹ Ang Saronni gulap, tei harungni lili bubar.

Chwla

² Busu bwlwngni lili khum hai, ani bwrwibo, bwrwirokni bisingo abo hai.

Bwrwi

³ Bolongni buphangrokni bere apel phang hai, ani hamjakma bo chwlarokni bisingo abo hai. Bwkha tong thogwi bini saklomo achugo, tei bini bwtháino ang thokjago.

⁴ Bo ano chá laima nogo tlang kha, bana tisama hai khe bo ano hamjakmano phunuk kha.

⁵ Ano angur bwthái kwran bai phan kwtal rw di, tei apelrok chá rwui sak srang rw di; tamni hwn ba ang hamjagwi bor kha.

⁶ Bini yaksi yak ani khorok yaphango, tei yagra yak bai khe kwbakjak!

⁷ O Jerusalemni bwrwirok, ang auarni mwswirokni mung bai koija-o; norok ani hamjakma borokno jora sók phai ya sini tungphla rwui ta sicha rw di!

Uáinwini rwchapmung Bwrwi

⁸ Khna di ani hamjakma borokni khorangno, naisik di, bo hapung hathái basu-ui phai-o.

⁹ Ani hamjakma khe mwswi hai eba mosok bwsa hai. Nai di bo deual sederwi bacha phai-o, tei tailamrok tẃi naharo phiya rí keseng tẃi naisono.

¹⁰ Ani hamjakma borok ano sa-o; “O ani khájani, bacha di; o ani naithok, phai ja di.

Chwla

¹¹ nai di masing láiwi tháng kha, tei basal bo láiwi tháng kha.

¹² Ha-o khumrok bar sa kha; rwchapmungni jora sók phai kha, tokthu kulmani khorang khna laha.

¹³ Khwichang buphangrok bwtháirok rw sa kha, tei angur bwlwngo angur barwi báhai jip-jip motom sa kha. Ani khájani naithokjwk, phai di, bacha di, o ani naithokti ang bai phai di.

¹⁴ O ani tokthu, nwng halapni holong kekhokni besero huijagwi tongo; nini mwkhang ano phunuk di, tei nini khorang ano khna rw di. Tamni hwn ba nini mwkhang naithok tei khorangbo khnathok.

¹⁵ “A siyalrokno tei siyal bwsarokno chini bagwi rom di, tamni hwn ba abórok angur bari dera rw-o.”

Bwrwi

¹⁶ Ani hamjakma khe ani’-no, angbo bini’-no; bo bini merarokno lili khum bising bisingrogo mwrwgo.

¹⁷ O ani khásukni nwng kiphilwi phai di; Ai ya sak, mwnakma kwmaui tháng ya sak nwng tong di, halapni mosok hai eba mwswi bwsa hai wng di. khachigwi phai tẃi khe phai di.