RUTNI BIJAP 3 - Kok Borok (Re-edited) Bible (BSI)

Rut bwsai manma

¹ Kisa ulo kheno Noami Rutno hai hwnwi sa kha, “Ang nini bagwi chwla se ma naituknai, hakhe nwng nini sakni logisong mannai.

² Nwng pal khe samung tangmani a bwrwirokni nokphang Boas chini sandai ya diba? Nai di bo tini sarigo barli nakma jidolo barli nak anw.

³ Nwng sak súkhlai di, thok motomrok phul di, nini rí kahamrokno kanwi-chumui bo barli nakthani tháng di. Tamo khe bo chá bai ya-nung bai ya sak nwng aro tongo hwnwi bono saui ta man rw di.

⁴ Bo buro thu kaham khe si gra di, ulo bo muktrwi tháng khe, thángwi bo chumma ríno khugwi bini yakung yaphango khe rokoui di. Bo nono tamo khlainai sa anw.”

⁵ “Nwng sama haino ang bebak khlainai,” hwnwi Rut sa kha.

⁶ Hakhe Rut a barli nakthani tháng kha tei bwkrajwk khlai di hwnwi sama haino khlai kha.

⁷ Boas cháui nungwi pái khe tei bini bwkhabo srangjak. Bo barli nak thani thángwi thuna bagwi rokoui kha. Rut tepsa khe tháng kha tei rí khugwi yakung yaphango rokoui kha.

⁸ Horo Boas achomsa sicha kha tei uphilwi naiwi aro bwrwi khoroksano nugwi uanajak kha.

⁹ “Nwng sabo?” hwnwi bo sẃng kha. “Ang Rut se, hodasa,” hwnwi bo sa kha, “Nwng se ani sampha kukni sandai, nwng se ano nainani barja. Aboni bagwi nwng ano káijak di.”

¹⁰ “Subraiyung nono hamari rw thung,” hwnwi bo sa kha. “Nini tabukni samung bai tei nwkrajwkno monma bai, nwng bwswk núkhungni samung kotor tangthaino phunuk kha. Nwng chwla sikla, bigra phano gwnang phano káijakna bagwi naituk man kha mun, tamo khe nwng abo hai wng li ya.

¹¹ Rut, nwng tabuk ta uana si di. Nwng sama tẃi’-no ang khlainai. Kamiyungni bebakno nono bwrwi kaham hwnwi saui mano.

¹² Ang nini samphani sandai, o kók kubui’-no tei ang nini bagwi barja, tamo khe ani slái teibo sampha kuk khoroksa sandai tongo.

¹³ Nwng orono hopung tong si di, bo nini barja da nano eba na ya chwng phungo nai anw. Na khe le kahamno; wng ya khe ang Kaitor kwthangni mungwi swmai tangwi sa-o, ang barja nanai. Tabuk thu si di, ai ya sakno oro tong si di.”

¹⁴ Hakhe bo bini yakung yaphango khe rokoui kha, tamo khe ai súk ya sini’-no bui nuk ya tẃi khe bacha kha, tamni hwn ba Rut aro thumano bui saui ta man thung hwnwi Boas nai-o.

¹⁵ “Nini dulai khugwi oro bo di,” hwnwi Boas bono sa kha. Hakhe bo dulai boui rw kha tei kilo nwichinwi swk barli chu-ui rw kha tei Rutni bangora-o boksaui rw kha. Hakhe bo abono tlangwi kamiyungo tháng kha.

¹⁶ Bo nogo sógwi khe bwkrajwk bono hai hwnwi sẃng kha, “Nwng bahai khe phai man kha sajwk?” Rut bwkrajwkno Boas bini bagwi tamo khlai kha bebak saui khna rw kha.

¹⁷ Bo kók manju-ui hai hwnwi sa phi kha, “Bo ano sa kha, ‘ang yak bukcha khe nini thani kiphilwi horna muchung ya, hakhe bo ano o kilo nwichinwi swk barlirokno rwui hor kha.’ ”

¹⁸ Noami bono hai hwnwi sa kha, “Omorok bahai tamo wng nuk ya sak tabuk nwng bwkha logwi tong gra di. Boas tamo wngnai chong súk ya sak bo bathak glak.”