RUTNI BIJAP 1 - Kok Borok (Re-edited) Bible (BSI)

Elimelek tei núkhungni bororok Moabo thángma

¹ Bujthumnairok naikolwi tongma jora-o ha-o asari nang kha, aphuru Judiani Betlehemo tongnaisa bini hik tei bwsla khoroknwirokno tlangwi Moabo tongwina tháng kha.

² A borokni mung khe Elimelek, bihikni mung khe Noami, bwsla khoroknwini mung khe Malon bai Chilonno; bórok khe Judiani Betlehemo tongnai Ephrata bosngni borok. Bórok Ha Moabo thángwi aro tongwi lai kha.

³ Tamo khe Noamini bwsai Elimelek thwi kha, hakhe bo bwsa khoroknwi klangwi thángjak kha.

⁴ Bórok Moabni bwrwi, Orpa tei Rutno káijak kha. Bórok aro nokha bisichi swk tong kha.

⁵ Malon tei Chilonbo thwi kha, Noamini bwsaibo kwrwi kha tei bwsarokbo bono khibiui klang kha.

Noami bai Rut Betlehemo kiphilma

⁶ Sal kisa ulo khe Noami khna kha Subraiyung bini bororokno mai-khul kupulung khe rwui hamari rw kha. Hakhe bo bahamjwksong bai khe Moabni thángna bagwi tiyar wng kha.

⁷ Bórok khoroktham Juda-o thángna bagwi lam rw lai kha, tamo khe lama-o,

⁸ Noami bórokno hai hwnwi sa kha, “Norok nogo kiphilwi thángwi nwmasong bai khe tongwi si di. Kaitor, norok ang bai tong phuru tei thwi thángnairok tong phuru hamari rw tẃi kheno rw thung.

⁹ Tei Subraiyung norokno tei uáisa káijagwi núkhung khaui manna bagwi hamari rw thung.” Hakhe Noami bórokno páithakni bagwi motom su kha. Hakhe bórok kap laina cheng kha,

¹⁰ tei bono hai hwnwi sa kha, “Iʼnhi, chwng nwng bai baksano nini bororokni thani thángnai.”

¹¹ “Norok ki se kiphil si di, sajwksong,” hwnwi Noami sa kha, “Norok tamo ang bai phaina muchung ba? Norok ua de uansuk, ang norok káijakna bagwi bwsa chwla ma de man sino ba?

¹² Nogo kiphilwi tháng si di, ang belaino umor chakra wng kha káijak phinabo chúk li ya, ahai phano ang tabukbo man kho hwnwi káijagwi bwsarok man khe,

¹³ bórok tor ya sak norok na da naisingno ba? Abo bai norok buino káijak yaui da tongno? Iʼnhi, sajwksong, norok saui mano omo le chúk ya. Subraiyung ano naikhlai li ya, ang norokni bagwi belai khe bwkha khamo.”

¹⁴ Haino hai bórok kap lai phiu kha. Hakhe Orpa páithakni bagwi bwkrajwkno motom su-ui nogo kiphilwi tháng kha, tamo khe Rut khe bo bai’-no tong rwk kha.

¹⁵ Hakhe Noami hai hwnwi sa kha, “Rut, nini nwprangjwk nogo bini bororokni thani tei bini mwtaini thani kiphilwi tháng kha, nwngbo bo bai baksa nogo kiphilwi tháng si di.”

¹⁶ Tamo khe Rut hai hwnwi sa kha, “Nono khibiui ano tháng di hwnwi ta dagi di: Nwng tháng thani-o anobo tẃi di, nwng tháng thani-o angbo thángnai, nwng tongwi thani-o angbo tongwinai; nini bororok ani borok wngnai, tei nini Kaitorno anibo Kaitor wngnai.

¹⁷ Nwng thwi thani’-no angbo thwinai aro’-no angbo phobjaknai. Subraiyungni hamya kuk sátokmung phano ang man thung thwima simi se ano nwng bai swkagwi man anw!”

¹⁸ Noami nuk kha Rut bo bai baksa thángna bagwi chong súkjak, hakhe bo tei mungsa sa li ya

¹⁹ Hakhe bórok khorok nwi’-no Betlehemo thángwi sógwi kha. Tei bórok Betlehemo sógwi khe bebak kamiyungni bororok nainani phai lai kha; tei bórok hai hwnwi sa lai kha, “Omo a Noami ya diba?”

²⁰ “Ano Noami ta hwn si di, tamo khe Mara se hwn di, tamni hwn ba Subraiyung ani langmano kwkha khlai kha.”

²¹ Ang oroni tháng phuru, ani kwbángma tongmani, tamo khe Subraiyung ano bukcha khe kiphilwi tubu kha. Subraiyung se ano hamya hwnwi tekto rw khe tei tamo ano Noami hwnwi ring thai tong si ba?

²² Omo hai kheno Noami Moabjwk Rutno tẃiwi Moabni kiphilwi phai kha. Bórok Betlehemo sók phai phuru khe barli ra laina chengma jora.