PHUNUKJAKMANI 6 - Kok Borok (Re-edited) Bible (BSI)

Silrokno swkakmani

¹ Aphuru ang a Mera bwsano a sil kaisnini puilani silno swkakma nuk kha, hakhe a makbrwirokni bere masano ang nokha gurumma khorang hai khe “Phai di!” hwnwi sama khna kha.

² Ang naisigwi nai ba korai kuphur masa. A korai kasanai bo makal khaiklaijak, bo motok thup rwjak kha. Bo kwplai wngwi mechenna tháng kha.

³ Aphuru Mera bwsa kaisani ulni a silno swkak kha, hakhe ang makbrwirokni bere tei masano “Phai di!” hwnwi sama khna kha.

⁴ Tei masa korai ongkhorwi phai kha, abo korai kwchak. Bororok bórok kiching bórok butharna tẃi khe haktoro choba phnangnani phan a korai kasanaini yago yapharjak kha; bo seng kotorma kongsa rwjak kha.

⁵ Aphuru Mera bwsa kwnwini ulni a silno swkak kha, hakhe ang makbrwirokni bere tei masano “Phai di!” hwnwi sama khna kha. Ang naisigwi nai ba korai kosom masa. A korai kasanai pali jorsa yago tẃijak.

⁶ A makbrwirokni aroni ang hai hwnwi kók sama khna kha, “Gom phutasa salsani buj, barli phutaktham salsani buj. Phiya ba tháistwini thok bai angur bwtwino ta dera rw di!”

⁷ Aphuru Mera bwsa kaithamni ulni a silno swkak kha, hakhe ang makbrwirokni bere tei masano “Phai di!” hwnwi sama khna kha.

⁸ Ang naisigwi nai ba korai kormolele masa. A korai kasanaini mung wng kha Butharnai, Kwthwirokni Ha bini logi logi rwktharjak. Choba bai, chacharara bai, bemuk bai tei swngcharni mwsa tolingrok bai butharna bagwi haktorni khakbrwini khaksa jora tẃi bórokni yago yapharjak kha.

⁹ Aphuru Mera bwsa kaibrwini ulni a silno swkak kha. Ang háyá tola-o Kaitorni kók kaham khe pírma bai butharjaknairokni pholarokno nuk kha.

¹⁰ Bórok sotonwi hai hwnwi chirikhók lai kha, “O Kwplaisa Subrai, nwng kwthar, nwng kubui! Swngcharni bororokno nwng buj thumnani bwswk lerno kho? Chini thẃini yagul sunani bwswk lerno kho?”

¹¹ Bórok joto’-no rí kuphur kangsa kangsa rwjak kha, bórok butharjakma hai butharjakna hwnmani bórok bai baksa samung khlainairok tei takhukrok sók phai bai ya sak srapsa lengla di hwnwi bórok hwnjak kha.

¹² Aphuru ang Mera bwsano kaibani ulni silno swkakma nuk kha. Hakhe bangla kotor phai kha, rí sitra kosom hai sal kosom wng kha, tal hwn khe thẃi hai kwchak wng kha.

¹³ Nokbar kotor bujagwi khwichang kwthwngrok buphangni kraima hai athukirirok nokhani ha-o kwrai kha.

¹⁴ Lamthai dolsajagwi kwmaui tháng kha, phiya joto hathái tei twi kwcharni joto ha norjak bai kha.

¹⁵ Aphuru swngcharni bugrarok, kolok-kotorrok, sengkrak bokhorokrok, gwnangrok, kwplairok bai tei bebak bororok, seleng wng thung seleng ya wng thung, bebak’-no hagurungrogo tei hatháirokni holongdap tola-o ma huijak kha.

¹⁶ Bórok hatháirokno tei holongdaprokno hai hwnwi ma ring kha, “Chini saka klai phai di, hakhe achukthayungo achugwi tongnaini mokol bwskangni chwngno huiwi ton di, Mera bwsa jolijagwi yagul sumani yakni chwngno huiwi tong di!

¹⁷ Bórok jolijagwi yagul sumani a sal kotor sók phai kha, a salo sabo bachaui mannai?”