PHUNUKJAKMANI 5 - Kok Borok (Re-edited) Bible (BSI)

Mera Bwsani kók

¹ Achukthayungo achugwi tongnaini yagra yago ang bijap dolsa nuk kha; abo bising saka swijak máng, phiya sil kaisni bujak.

² Aphuru ang suari phan gwnang khoroksano nuk kha, bo hai hwnwi sotonwi sakhlai kha, “Sabo silrokno swkagwi o bijapno phiyokna chúk?”

³ A bijapno phiyogwi naiwi mannai khoroksa phano kwrwi, chuknoha-o buya, swngcharo buya, ha tola-o buya.

⁴ A bijapno phiyogwi nainai abo tẃi chúknai borok khoroksa phano kwrwini bai ang swlwgwi kap kha.

⁵ Hakhe okrarokni bere khoroksa ano hai hwnwi sa kha, “Ta kap di! Naisik di! Juda bosongni Singho, Daud bosongni a borok kotor bo kwplai wng kha, hakhe bo a sil kaisnino swkagwi a bijapno phiyogwi mano.”

⁶ Aphuru a makbrwirok bai tei okrarok bai chorsa rekerjak khe Mera Bwsa masano ang achukthayung kwcharo bachajak nuk kha. A Mera Bwsano butharjagwi phaijak hai nugo. Aboni bokorong kongsni tongo, mokolbo kolsni tongo, a mokolrok wng kha swngchar gwnangwi rohorjaknai Kaitorni phola kaisnirok se.

⁷ Mera bwsa thángwi a achukthayungo achugwi tongnaini yagra yakni a bijapno naui kha.

⁸ Bo abono na khe’-no a makbrwirok tei okra kholpebrwi Mera bwsani bwskango pwtapsa klai lai kha. Jotoni yago’-no chongpreng gwnang, jotoni yago’-no satrai hoku dumjak rangchakni dugol gwnang; a hoku wng kha Kaitorni bororok suri sanma se.

⁹ Bórok hai hwnwi rwchapmung kwtal tángsa rwchap lai kha, “A bijapno yago naui aboni silrokno swkakna nwng se chúknai. Tamni hwn ba nwng butharjak kha, hakhe nini thẃini jarwi joto bosongni, joto kókni, joto dophani tei joto hani bororokno nwng Kaitorni bagwi pai kha.

¹⁰ Nwng bórokno chini Kaitorni samung khlai rwna bagwi bugra bosongni ochai snam kha, hakhe bórok haktoro bugra wngnai.”

¹¹ Ang naisik khua, hakhe ang suarirokni khorang khna kha, chisai tei chi-rasaini khorang khna kha. Bórok a achukthayungno, makbrwirokno tei a okrarokno chorsa khe bacha laijak;

¹² hakhe sotonwi hai hwnwi rwchap lai kha, “Phan, rang-rí tei elem a butharjaknai Mera bwsani se wngthai klai-o, bo se chẃngsacha khe kwplai wngthai klai-o, bo se bórijagwi lobjak thai klai-o!”

¹³ Hakhe ang chuknoha-o, haktoro, ha tola-o tei twijlango tongnai jotoni, bebak swngchar gwnangwi bebak tongnairokni khorang khna kha, bórok hai hwnwi rwchap laiwi tongo, “A achukthayungo achugwi tongnai tei a Mera bwsa mol brúm brúm bórijagwi lobjak thung, mol brúm brúm chẃngsacha khe kwplai wng thung!”

¹⁴ A makbrwirok “Amen” hwn kha, hakhe a khorok nwichi okrarok pwtapsa klai laiwi mol brúm brúm tong phlainaisano khulum lai kha.