PHUNUKJAKMANI 4 - Kok Borok (Re-edited) Bible (BSI)

Chuknoha-o surimani

¹ Aboni ulo ang naisigwi nai ba chuknohani duglam lamsa phiyokjak. Swkango totro khorang hai khe ano sama khnamani a khorang hai hwnwi sa kha, “Kasaui phai di, hakhe omoni ulo tamo wngno abo ang nono phunuknai.”

² Hai kheno ang Phola bai koboljak kha. Aro chuknoha-o achukthayung kaisa, aro borok khoroksa achukjak.

³ Bini mwkhang manthok ya jaspar bai karnilian holong hai kwchẃng; achukthayungno kitingwi chokhreng twi nungjak, abo emarlad hai kwkhrang.

⁴ A achukthayungni yang yang tei achukthayung kholpebrwi tong phiro, aro okra kholpebrwirok achuk laijak, bórok rí kuphur chumjak, rangchakni motok thup laijak.

⁵ Nokha philikma hai jilik jilik kwchẃng, gurumma khorang, phiya phirang kokma khorang a achukthayungni ongkhorwi phaijak. A achukthayungni bwskango homchang kaisni mwchẃngjak; abórok wng kha Kaitorni phola kaisnirok.

⁶ Achukthayungni bwskango ainani twijlang hai nugo, abo belai kwchẃng. Achukthayungni yang yang babaibrwi manwi kwthang makbrwirok tongo, abórok uklok bwskango mokol máng kupulung.

⁷ Masa hwn khe singho hai, tei masa hwn khe dega hai, tei masa hwn khe borok bumukhang hai, phiya tei masa hwn khe toling birjak hai.

⁸ A makbrwirokni jotoni’-no bwkrang kangdok kangdok khe tongo, phiya bórokni bising saka mokol máng kupulung. Bórok hor sal rwchapma thak ya, “Kwthar, kwthar, kwthar, Subrai kwplaisa Kaitor kwthar, bo’-no phaina hwnnai a Kaitor, bo agibo tongo, tabukbo tongo.”

⁹ A achukthayungo achugwi tongnai bo mol brúm brúm kwthang, a makbrwirok bono tor rw lai-o, bóri lai-o tei hambai rw lai-o. Bórok abo haino khlai brúm brúm

¹⁰ a okra kholpebrwirok a achukthayungo achugwi tongnaini bwskango pwtap khe klai laiwi a mol brúm brúm kwthang tongnaino khulum lai-o. Bórok a achukthayungni bwskango sak sakni motok beraui hai hwnwi sa lai-o,

¹¹ “Chini Subrai Kaitor, nwng se chẃngsacha khe kwplai wngthai, nwng se bórijak thai. Tamni hwn ba nwng se bebakno’-no snamo, nwng muchungma baino bebak’-no w bo wngo tobo tongo.”