PHUNUKJAKMANI 19 - Kok Borok (Re-edited) Bible (BSI)

¹ Aboni ulo ang chuknoha-o borok kwbángma sotonwi kók sa laima hai khna kha. Bórok hai hwnwi sa lai-o, “Haleluia! Chini Kaitor wng kha mwthangnaisa, bo kobo kotor, kwbo kwplaisa!

² Bo sói kubui khe buj thumnai! Uaijaui swngcharno hamya khlainai a belai baliknaijwkno Kaitor buj thum kha. Bo Kaitorni selengrokno butharma bai Kaitor bono yagul su kha!”

³ Bórok hai’-no hai, hai hwnwi chirikhók lai kha, “Haleluia! A taun kotor khammani hoku ka phlai máng tong kha!”

⁴ Hakhe a okra kholpebrwi tei makbrwirok pwtapsa klai laiwi achukthayungo achugwi tongnai Kaitorno khulumui hai hwnwi sa kha, “Amen! Haleluia!”

Mera Bwsani kái lai panda

⁵ Aphuru a achukthayungni hai hwnwi sama khna kha, “O Kaitorni selengrok joto’-no, chini Kaitorno lob di! O Kaitorno kirinairok, tamo kusu tamo kotor, joto’-no bono lob di!”

⁶ Aphuru ang borok kwbángmani khorang hai khna kha, abo twi bwdam bwdam kutukma khorang hai, phirang kogwi gurumma hai. Ang bórokno hai hwnwi sama khna kha, “Haleluia! Chini Subrai Kwplaisa Kaitor bo se Bugra!

⁷ Phai di, chwng khá srangwi tongthok lai anw; bono kotor hwnwi lob lai anw! Mera Bwsa káijaknani jora sók phai kha, aboni bagwi bini bwrwi tiyar wng kha.

⁸ Bo kanna bagwi sal kokjak lilon kahamni rí kuphur rwjak kha.” (Lilonni rí wng kha Kaitorni bororokni samung kaham khlaimarok.)

⁹ Aphuru a suari ano hai hwnwi sa kha, “O kókno swi di: Mera bwsani kái lai panda-o kobokjaknairok bórok hamchajak.” Suari hai hwnwibo sa kha, “O kókrok Kaitorni búkhúkni kók kubui.”

¹⁰ Ang bono khulumna bagwi bini yakung yaphango pwtapsa klai kha, hakhe bo ano hai hwnwi sa kha, “Ano ta khulum di. Ang nwng bai baksa’-no seleng se. Ang Jisu si rwmano kwrak khe poito khlaiwi tongnai nini takhukrok bai baksa seleng se. Kaitorno se khulum di.” Jisu si rwmani abono tẃiwi diyarirok kók sa-o.

Korai kuphuro kasanai

¹¹ Ang aphuru chuknoha phiyokjak nuk kha, aro korai kuphur masa. A korai kasanai bo Kaham bai Kubui hwnjago; bo sói khe buj thumo, sói khe choba khlai-o.

¹² Bini mokol hórjlai hai, bo motok kwbángma thupjak. Bini bwsago bumung tháisa swijak, hai phano bono karwi khoroksa phano abo tamo saui man ya.

¹³ Bo kanmani rí thẃi-o chomsajak. Bono “Kaitorni Kók” hwno.

¹⁴ Chuknohani sengkrakrok bono rwkthar laijak, bórok korai kuphur kasajak, lilon kahamni rí kuphur kwchẃng kanjak.

¹⁵ Bini búkhúkni seng kubuk khungsa ongkhorwi phaijak, abo baino bo dopharokno mechennai. Bo sorni raidang bai bórokno kók khna rwnai, angur sepjaknai hakhoro angur sebwi bo belai jolijaknai Kwplaisa Kaitorni bagwi yagul sunai.

¹⁶ Bini rí-o tei bini yakungo omo tẃi mung swijak: “Bugrarokni Bugra, bokhorokrokni Bokhorok.”

¹⁷ Aphuru ang suari khoroksano salo bachajak nuk kha. Bo nokha-o birwi tongjak toksa-toktẃirokno hai hwnwi chirikhók kha, “Phai di, Kaitorni panda kotoro kuthum phai bai di.

¹⁸ Phai di, bugrarokni bahan chá phai bai di, sengkrak bokhorokrokni bahan, sengkrakrokni bahan, korairokni bahan, korai kasanairokni bahan, tamo seleng tamo seleng ya, tamo kusu tamo kotor, bebak bororokni bahan chá phai bai di.”

¹⁹ Aphuru ang a yabrwi tei swngcharni bugrarok bórokni sengkrakrok bai a korai kasajak tei bini sengkrakrok bai choba nang laina bagwi kuthumjak nuk kha.

²⁰ A yabrwi khajak kha, bini bwskango soidomni samung khlainai a diyari phatra bo’-bo bo bai baksa khajak kha. (Bo a soidomni samung khlaima bai a yabrwini mari bujaknairok tei bini mangtangno khulumnairokno lama koró rw kha.) A yabrwi bai diyari phatra khoroknwino’-no gwndwk hórni liko kwthang’-no khiklaiwi rwjak kha.

²¹ A khoroknwini sengkrakrok a korai kasanaini búkhúkni ongkhormani a seng bai butharjak bai kha; toksa-toktẃirok bórokni bahan ok pungwi chá kha.