PHUNUKJAKMANI 17 - Kok Borok (Re-edited) Bible (BSI)

Belai baliknaijwk Babilon

¹ Aphuru twk tháisni tẃi laijak suari khoroksnini bere khoroksa ani thani phaiwi hai hwnwi sa kha, “Phai di, a belai baliknaijwk bahai khe yagul sujakno abono phunuk anw, twima kwbángma gana-o tisajak a taun kotor bahai khe yagul sujakno abono phunuk anw.

² Swngcharni bugrarok a belai baliknaijwk bai uaijaui tong bai kha, phiya swngcharni bororok bini uaijamani chuak nungwi phek bai kha.”

³ Ang Phola bai koboljak kha, hakhe a suari ano hasing panthoro tlang kha. Ang aro bwrwima khoroksano yabrwi kwchak masani saka achukjak nuk kha, a yabrwini sak gwnangwi’-no mung hamya swijak; a yabrwini bokhorok tháisni, bokorongbo kongchi tongo.

⁴ A bwrwima rí chak sru-sru bai rí chak rorom kanjak, bini sak gwnangwi rangchakni gwina-ganthi bai moni-mukta kupulung. Bini yago rangchakni khuri tháisa, a khuri manwi hamyarok bai selengmasingcharok kupulung, abo bini balikmani manwirok.

⁵ Bini talikha-o gujok gwnang mung hai hwnwi swijak tongo: “Babilon Kotor, bebak baliknairokni buma, swngcharni bebak selengmasingcha samung khlainairokni buma.”

⁶ Ang nuk kha a bwrwi Kaitorni bororokni thẃi bai Jisuni mungwi butharjaknairokni thẃi nungwi phekjak. Ang a bwrwimano nugwi belai khe uana kha.

⁷ “Nwng tamni uana?” hwnwi a suari ano sẃng kha. “Ang nono a bwrwimani gujokno saui khna rw anw, a bwrwimano tẃinai bokhorok tháisni bokorong kongchi gwnangni a yabrwini gujoknobo saui khna rw anw.

⁸ Nwng nukmani a yabrwi bo agi kwthang tongmani, tabuk kwrwi kha; bo hakhorni ongkhorwi phaina nai kha, hakhe sokomorjakna bagwi thángnai. Swngcharo tongnairokni bere swngchar snamjak ya sini Langma bijabo mung tisajak yarok a yabrwino nugwi uanajaknai. Bo agi kwthang tongo; tabuk kwrwi kha, hai phano bo nukjak phinai.

⁹ “Oro’-no siui romna nangnai. A bokhorok tháisni wng kha hathái tháisni, a bwrwima achukmani hathái. Abórokbo bugra khoroksnirok:

¹⁰ Bugra khorokba tháng bai kha, khoroksa tabukbo tongo, tei khoroksa tabukbo phai ya kho; bo phai khe srapsani bagwi se tong langnai.

¹¹ Phiya a yabrwi agi kwthang tongmani tabuk kwrwi kha bo wng kha khoroksni ulni a bugra, bo a khoroksnini khoroksa, bo sokomorjakna bagwi thángnai.

¹² “Nwng bokorong kongchi nukmani abórok wng kha bugra khorokchi, bórok tabukbo bugra chá rwjak ya kho, tamo khe bórok srapsani bagwi se a yabrwi bai baksa bugra chá rwjaknai.

¹³ A bugra khorokchirok khá baksa, bórok a yabrwini yago bórokni phan bai suar yapharnai.

¹⁴ Bórok Mera bwsa bai choba nang lai anw; tamo khe Mera bwsa bo ringwi chongmani a kwrak khe tongnairok bai baksa bórokno mechen anw, tamni hwn ba bo wng kha bokhorokrokni Bokhorok, bugrarokni Bugra.”

¹⁵ A suari ano hai hwnwibo sa kha, “Nwng a baliknaijwkno achugwi tongma nukmani a twirok wng kha dopharok, bosongrok, joto hani bororok tei joto kókni bororok.

¹⁶ Nwng nukmani bokorong kongchi bai a yabrwi baliknaijwkno naisler anw; bórok bini tong kwrwi segwi na baiwi bono rí suda kwrwi khe klang anw; bórok bini bahan chá anw, phiya hór sógwi sokomor anw.

¹⁷ Kaitorni kók nang phai ya sak bórok khá baksa wngwi a yabrwini yago bórokni bugrani phan rwmani abo Kaitor bini samung cha rwna bagwi bórokno muchung rw kha.

¹⁸ “Nwng nukmani a bwrwima wng kha a taun kotor, swngcharni bugrarokni bokhorok.”