PHUNUKJAKMANI 12 - Kok Borok (Re-edited) Bible (BSI)

Bwrwima bai dragon

¹ Aphuru nokha-o omo hai uanamasingcha mungsa nukjak kha. Bwrwima khoroksa nukjak kha, bo salno kanjak salno chumjak, bini yakung tola tal, bokhorogo khe athukiri chiknwini motok.

² Bo bá tẃi bá tẃi wngwi tong kha, hakhe bwsa bánani ok sajagwi chirikjak.

³ Nokha-o omo hai tei mungsa nukjak kha. Dragon kwchak kotorma masa nukjak kha, bini bokhorok tháisni, bokorong kongchi, bokhorok mathe’-no motok kaisa kaisa.

⁴ Bo athukirirokni khakthamni khaksano bini khitung bai bului nokhani ha-o khiklai rw kha. Bá tẃi bá tẃi wngwi tongnai a bwrwima bá khe’-no bini a bwsano chána hwnwi bo a bwrwimani bwskango bachaui kha.

⁵ Aphuru a bwrwima bwsa chwla masa bá kha, bo sorni raidang bai bebak dophano kók khna rwnai. Tamo khe a bwsa sekjagwi Kaitorni aro tei bini achukthayungo tlangjak kha.

⁶ A bwrwima hasing panthoro khárwi tháng kha, aro Kaitor bini bagwi tongthai snam kha, bo aro nokha sal 1,260 jora naiwi tonjaknai.

⁷ Aphuru chuknoha-o choba nang lai kha. Mikail bai bini suarirok a dragon bai choba nang lai kha, a dragonbo bini suarirok bai nang lai kha;

⁸ hai phano a dragon pái li ya, hakhe bo bai bini suarirok chuknoha-o tei tonjak li ya.

⁹ A dragon kotor khiklaiwi rohorjak kha. Bo wng kha agini a chibuk, bo’-no bebak swngcharno lama koró rwnai, bono’-no Debilbo hwno, Soitanbo hwno. Bo ha-o khiklaiwi rohorjak kha, bini bebak suarirokbo bo bai baksa khiklaiwi rohorjak kha.

¹⁰ Aphuru ang chuknoha-o sotonwi hai hwnwi samano khna kha, “Tabuk Kaitor chwngno phiyók kha! Tabuk Kaitor bugra wngwi bini phan kwrakno phunuk kha! Tabuk bini Masia bini phan phunuk kha! Hopung sapung Kaitorni bwskango bachaui chini takhukrokno majra bernai bo chuknohani khiklaiwi rohorjak kha.

¹¹ Chini takhukrok bo’-no Mera bwsani thẃi bai mechen kha, bórok pírmani a kók baibo mechen kha; bórok kwthang tong yaui thwina suda gosi-o.

¹² O nokha, nwng aboni bagwi tongthok di! O nokha-o tongnairok norokbo tongthok di! Tamo khe ha bai twijlang norok bwswk se hamya sitrano! Soitan norokni thani ongkhorwi phai kha, bo jolijak súk kha, tamni hwn ba srapsa khe’-no ma thángnai kha hwnwi bo saui mano.”

¹³ Bo ha-o khiklaiwi rohorjak kha hwnwi saui man khe’-no a dragon a bwsa chwla bánai bwrwimano riphrik kha.

¹⁴ Tamo khe a bwrwima hasing panthoro bini tongthai-o birwi thángna bagwi toling gudaini bwkrang kangnwi rwjak kha; bo aro nokha bisiktham kwchar naiwi tonjaknai, hakhe a chibukni yakni kati rwjaknai.

¹⁵ Aphuru a bwrwimano kochogwi tlangna tẃi khe a chibuk bini búkhúkni twi ongkhlaiwi a bwrwimani uklok uklok twi tor rw kha.

¹⁶ Hai phano ha bwrwimano katiui rw kha; ha bini búkhúk khuaui a chibukni búkhúkni phaimani twino nungwi pái kha.

¹⁷ A dragon a bwrwimano belai jolijak kha, hakhe a bwrwimani tei bosong tongmarok bai nang laina tháng kha. A bosong tongmarok wng kha Kaitor dagima tẃi tongwi Jisu si rwmano tẃiwi tongnairok.

¹⁸ A dragon twijlang rukungo bachaui kha.