PHUNUKJAKMANI 1 - Kok Borok (Re-edited) Bible (BSI)

¹ Omo wng kha Jisu Khristo phunukmani abo se; omo wng kha dakti’-no tamo wngno abo Kaitorni selengrokno phunukna bagwi Jisu Khristono Kaitor rwmani abo se. Khristo bini suarino bini seleng Johonni thani rohorwi abono si rw kha,

² hakhe Johon bo nukmano bebak sa bai kha. Bo Kaitorni aroni kóknobo sa kha, Jisu Khristo si rwmanobo sa kha.

³ O kókrokno porinai bo hamchajak, o kók diyarino khnanairok hamchajak, oro swijak tongmano rákhoknairok hamchajak. Tamni hwn ba omorok nang phaina kasu kha.

Motha Kaisnino khápang rohormani

^4-5 Ang Johon Asia angkorni motha kaisnini thani omono swihoro Phaina hwnnai a Kaitor norokno khairok thung, khá kwchang rw thung, bo tabukbo tongo, agibo tongo. Bini achukthayungni bwskango tongnai phola kaisni tei Jisu Khristo norokno khairok thung, khá kwchang rw thung. Jisu Khristo wng kha Kaitorni bagwi kaham khe kók sanai, bo se puila mwthangwi tisajak granai, bo se swngcharni bugrarokni bokhorok. Bo chwngno hamjago, bini thẃi bai bo chwngno chini sumsokni yakni phiyók kha,

⁶ hakhe chwngno bini Bupha Kaitorni samung khlai rwna bagwi bo chwngno bugra bosongni ochai khlai kha. Jisu Khristo mol brúm brúm chẃngsacha wng thung, kwplai wng thung. Amen.

⁷ Nai di, bo chumui bai khe phainai! Joto borok bono nuknai, bono yórnairokbo nuknai. O swngcharni bebak bosongrok bini bagwi muisubuk chaui kapnai. I’n, abo wngnai! Amen.

⁸ “Angno Alpha, angno Omega, Yaphang tei Buchuk,” hwnwi Subrai Kwplaisa Kaitor sa-o, bo’-no phaina hwnnai a Kaitor, bo tabukbo tongo, agibo tongo.

Johon Khristono nukmani

⁹ Ang norokni takhuk Johon. Jisu bai thansa wngma bising tẃi ang norok bai baksa sátokjak kha, ang norok bai baksa bini hani borok, ang norok bai baksa soi kha. Ang Kaitorni kók pírma bai, phiya Jisu Khristo si rwmani a kókno sama bai ang Patmo hwnwi twi kwcharni ha-o tonjak kha.

¹⁰ Ang Subraini Salo Phola bai koboljak kha, hakhe ani uklogo totro khorang hai khe sotonwi hai hwnwi sama khna kha,

¹¹ “Angno Alpha tei Omega, Yaphang tei Buchuk; Nwng nukmarokno swiwi narwk di, hakhe a motha kaisni-o a bijapno rohor di: Episobo rohor di, Smurna-o’-bo rohor di, Pergamobo rohor di, Thuatira-o’-bo rohor di, Sardi-o’-bo rohor di, Philadelphia-obo rohor di tei Laodikia-obo rohor di.”

¹² Hakhe ang a kók sanaino naina hwnwi uphil kha. Uphil khe’-no ang rangchakni thopna kaisni nuk kha.

¹³ A thopnarokni kwcharo borok hai khoroksa bachajak, bo kamchlwi lolang chumjak, bini khaklap rangchak khopjak;

¹⁴ bini bwkhnairok khul hai eba kothor kwsap hai kuphur; bini mokol hórjlai hai jlai jlai;

¹⁵ bini yakung hóro sógwi hujak pitol hai kwchẃng tei bini khorang twi bwdam bwdam kutukma hai.

¹⁶ Bo yagra yago athukiri kolsni tẃijak; babai nwnwi seng kubuk kongsa bini búkhúkni ongkhorjak; bini mwkhang dibor jorani sal hai kwchẃng.

¹⁷ Ang bono nuk khe’-no kwthwi hai wngwi bini yakung yaphango klai kha. Hakhe bo yagra yak bai ano tangwi hai hwnwi sa kha, “Ta kiri di. Angno yaphang, angno buchuk.

¹⁸ Angno kwthang. Ang thwiwi thángmani se, nai di, ang tabuk mol brúm brúm’-no kwthang. Kwthwi bai kwthwirokni ha ani yago se.

¹⁹ Aboni bagwi nwng nukmarokno swiwi narwk di, tabuk wngmarokno, phiya tamo tamo wngno abonobo swiwi narwk di.

²⁰ Nwng ani yagra yago athukiri kolsni nukma bai a rangchakni thopna kaisni nukmani bisingni kók khe ahai: athukiri kolsni hwn khe a motha kaisnini suarirok, phiya a thopna kaisni hwn khe a motha kaisni.”