PHRWNGNAINI 9 - Kok Borok (Re-edited) Bible (BSI)

¹ Omorok bebakno ang bwkha-o chu-ui ton kha, bebak amjogwi nai kha, borok sutrangrok tei sinai borokrokni samungrok bebak Kaitorni yago chopjak se; hamjakmung de naislermung bórokno naisingwi tong, abono bórok saui man ya. Bórokni bagwi le bebakno chúk ya máng se,

² tamni hwn ba jotoni manthai le baksa se; bo borok kaham hwn thung hamya hwn thung, kwthar hwn thung eba kwthar ya hwn thung, yapharnairok wng thung yaphar yarok phano wng thung. Borok hamyarok man tẃi’-no borok kahamrokbo mannai; swmai tangnairokbo tei swmai tangna kirinarokbo abono mannai.

³ O ha saka-o mungsa hamya wngma khe, bebakno baksa kheno manjago, bwkhabo hamya bai máng kupulungno tei se kwthang tong phuru bórokni bwkha-o bwkha ma nangma bai kupulung khe ma tongo tei kwthang tong langsak’-no bwkha kobor chaui ma tongo, aboni ulo khe bórok thwi-o.

⁴ Tamo khe kwthangrokni khe khatungma tongo, tamni hwn ba singho kwthwini slái le sẃi kwthang se ham kugo.

⁵ Kwthang tongnairok, bórok thwinai hwnwi si-o, tamo khe kwthwirok le mungsa si ya; bórokni tei sokat kwrwi kha, bórokni kókno buibo pogwi thángo.

⁶ Bórokni hamjakma tei bórokni naislerma tei bórokni músúma komorwi tháng kha; o ha saka-o wngmarogo bórokni tei manthai-sókthai tong glak kha.

⁷ Tháng di, nwng tongthogwi nini chámung cháui di tei bwkha srangwi nini angur bwtwi nungwi bwkha srang di; tamni hwn ba Kaitor nwng khlaimarokno chajak kha.

⁸ Nini kamchwlwirok sap-sutra máng wngwi tong thung; nini bokhorokni bwkhnai-o thok biyal ta wng thung.

⁹ O ha saka-o Kaitor nono thwiblang ayuk rwmano nini hamjakmani hik bai khe tongwi tong di, tamni hwn ba o ha saka-o nini langma-o kolomtwi khiklaiwi samung tangmani le omono manthai.

¹⁰ Nwng yago mungsa swk phano samung tangna man khe abono nini bebak phan rwui tang di, tamni hwn ba nwng thángwi tong thani a kwthwirokni ha-o mungsa swk samung, uansukmung, simung tei siyanrok hwnwi kwrwi.

¹¹ O ha saka-o ang tei mungsa nuk kha, abo khe: doui khachigwi mannairok máng kwplai wng ya, phan gwnangrok mángno choba-obo kwplai wng ya, siyan kwrwngrokbo ok kupulung khe mángno ma cháui tongo ahai ya; simung sinairok kheno gwnang máng wngo ahaibo ya; rwngnairok kheno sep man máng tongo ahaibo ya, tamni hwn ba bórok jotono jora tei sep bai yak khajak.

¹² Tamni hwn ba khoroksa phano buphuru komormung patino abo si ya. Twini á chei-o kwcha tẃi tei toksarok khẃi-o kwcha tẃi khe bororokni thanibo achomsa khe dob phaiwi klaiwi phai-o.

Simung bai butuano tẃi uansukmani

¹³ Ang o ha saka-o simungno tẃiwi tei mungsa nuk kha, abono nugwi ani bwkha-o nang kha.

¹⁴ Borok kisicha gwnang kamiyung bwsate kaisa tongmani. Phan gwnang habugra khoroksa phaiwi abono choprogwi aroni nok-hukrok segwi na phaina bagwi abono chorsa khe gerepsa phai kha.

¹⁵ A kamiyungo siyan gwnang bigra khoroksa tongo, bo bini siyan bai khe a kamiyungno phiyók kha, tamo khe khoroksa phano a bigrasano muitu khlai li ya gwja.

¹⁶ Hakhe ang hai hwnwi sa kha, “Phanni slái khe siyan se ham kugo; hai phano bigrasani siyanno sak nang ya wngjago tei bini kókroknobo khunju kanjak ya wngo.”

¹⁷ Tẃiphang butua chrikmani slái siyan kwrwng twrwksa khe kók sama se ham kugo.

¹⁸ Simung khe chobani da-sengrokni slái kaham, tamo khe borok hamya kwbángma kahamno dera rw-o.