PHRWNGNAINI 5 - Kok Borok (Re-edited) Bible (BSI)

Nang nung ya swmai ta tang di

¹ Kaitorni nogo tháng phuru khe nwng nini yaprino kaham khe nai di; butuasa ratharwi yapharmani slái kaham khe khnana bagwi sederwi thángma se ham kugo; tamni hwn ba bórok bahai khe samung hamya khlai yaui tongnai abono si ya.

² Nwng kók sana kodo ta wng di, eba Kaitorni thani dodro-dodro kók ta sa di; Kaitor khe chuknoha-o tongo tei nwng khe o ha-o; aboni bagwi nini kókrok kisa wng thai.

³ Podrepot uansuk khe imangrok nukma hai kók kwbángma sa khe butua sijago.

⁴ Nwng Kaitorno rwna hwnwi chak khe abono rwna ta ler di; tamni hwn ba bo butuarokno tẃiwi tongthokjak ya. Nwng rwna hwnwi chakmano rw di.

⁵ Rwna hwnwi swmai tangwi chagwi abono rw ya tongmani slái chak ya tongma se ham kugo.

⁶ Nini búkhúk nono sumsogo ta khiklai thung, kók tun phainaino omo cha ya wng kha hwnwi ta sa di; nini kókno tẃiwi Kaitor tamni jolijagwi nini yakni samungno sokomornai?

⁷ Uansukma báng khe, kók nang ya bángsa-o; tamo khe nwng Kaitorno se kiri di.

Langma wng kha chúk ya

⁸ Nwng nini angkorni kwrẃngsa swgo bigrarokno sátokjakma nuk khe tei bujsói khlaijak ya wngma nuk khe ta kwmamsa di; tamni hwn ba khoroksa tẃiphangni saka-o tei khoroksa kotorsa tongo tei bórok khoroknwini saka-o teibo kotor kotor tangphangrok tongo.

⁹ Tamo khe kheto panthor khlaijaknairokno karwi, rwui tonna bagwi khoroksa habugra tongmani kaham.

¹⁰ Rang hamjaknaisa bo rang bai bwkha kochom glak; tei rang-rí hamjaknai bo haino man phano bwkha kochomjak glak. Abobo haino mungsa chúk ya.

¹¹ Manwirok báng khe, abono chánairokbo bángo; a bángmano nugwi asi yóknano karwi bubagrani tei tamo tong?

¹² Samung tangnaisa kisa phano chá thung, kwbáng phano chá thung, bo muktrwi kaham manẃi thu-o; tamo khe gwnangsani a rang-rírok bono muktrwi tháng rw ya khlai-o.

¹³ Ang o ha saka-o mungsa belai derajak nuk kha: gwnangrok khatiui narwkmani rangrok khatinaini hamya se khlai-o,

¹⁴ tei a rang-rírok hamya patima-o klaiwi páiwi thángo; bo bini bwslano rwna bagwi mungsa kwrwi wngo.

¹⁵ Bo sak lánga khe bumani okni phai phuru phai tẃi kheno ma tháng phinai; bo bini aswk ajimarokni mungsa phano yago tlangwi thángwi man ya.

¹⁶ Omo ba haino belaino hamya: bo phaima hai kheno mabo ma thángnai; bo nokbarni banta kolomtwi khiklaiwi tangwi tamo man kha?

¹⁷ Bo bini thangsungo mwnakma-o bwkha báiwi, uanaui, joliui tei sak hamyarok ma manẃi ma tong kha.

¹⁸ Kaitor borokno rwmani o srapsa thangsungo bo samung bai ajiui manmani bai cháui nungwi tongthokma se bini bagwi ham kukgo, tamni hwn ba abo se bini le manthaiba; ang o kókno romwi man kha.

¹⁹ Abo tẃi kheno Kaitor khoroksa swkno rang-mai bono abo bai tongthok-cháthok khe tongnabo rw-o, bono sakni bagwi nangkhronani tei sakni samungno tẃiwi tongthoknabo rw-o, omorok bebakno Kaitorni hili se.

²⁰ Bo bini sakni umorrokno naiwi nai ya, tamni hwn ba Kaitor bono bini bwkhano tongthok rwui abono pok rwui tono.