PHRWNGNAINI 3 - Kok Borok (Re-edited) Bible (BSI)

Bebakni’-no jora tongo

¹ Bebakni’-no jora tongo, o ha saka-o bebak’-nino kaisa jora tongo:

² Achaina jorabo tongo thwinani jorabo tongo, kainani jorabo tongo káijakno phuichana jorabo tongo;

³ butharna jorabo tongo ham rwna jorabo tongo; swbaina jorabo tongo, tisana jorabo tongo;

⁴ kapna jorabo tongo, mwnwina jorabo tongo; bwkha khamnani jorabo tongo tei mwsana jorabo tongo;

⁵ holong khitar laina jorabo tongo, holong thumwi rúngna jorabo tongo; hamjagwi kwbakna jorabo tongo tei kwbak ya khe tongnani jorabo tongo;

⁶ rutugwi manma jorabo tongo tei kwmana jorabo tongo; tisaui tonma jorabo tongo tei khibiui rohorma jorabo tongo;

⁷ sichikna jora bo tongo, thepaui subna jorabo tongo; siring sring tongna tei kók sana jorabo tongo;

⁸ hamjakna jorabo tongo tei naislerna jorabo tongo; chobani jora tei kwtha laina jorabo tongo.

⁹ Samung tangnaisa bini tangma yagulo tamo man?

¹⁰ Kaitor jotono barja rwui pái lai ya khe tonmano ang saui man kha.

¹¹ Bo bebakni’-no sói jora chong kha; tei bo borokni bwkha-o lái thángjak tei thinangni kókno sinano muchung rw-o, tamo khe Kaitor yaphangni simi páithak jora tamo khlai kha bororok romwi man ya.

¹² Ang saui mano, bororok kwthang tongsani bwkha srangwi tongthogwi tongmani slái tei kaham kwrwi;

¹³ tei chwng jotono kolomtwi khiklaiwi samung tangwi cháthai-nungthai, omono Kaitorni hili.

¹⁴ Ang saui mano Kaitor khlaimani abo mol brúmno tong phlainai; aro tei mungsa swk dauibo man ya kháiklaiwibo man ya; jotono bono bórom khlaiwi kiri thung hwnwi se Kaitor omono khlai-o.

¹⁵ Aswk wngwi tongmarok abo swkangobo wngo; tei thinango wngna tongmarokbo bebakno swkangno wng kha; wngwi thángjakrokno Kaitor wng rw phiro.

O ha sakani buj cha ya

¹⁶ O ha saka-o omobo nuk kha, bujsói tei sutrang wng thani suda se bujsói tei sutrang kwrwi wngo.

¹⁷ Kaitor borok sutrang tei borok hamya kwnwino’-no buj thumnai, tamni hwn ba bo bebakni bagwi tei bebak samungrokni bagwi abo hai khlaina jora chongjak, hwnwi ang bwkha-o ma sa-o.

¹⁸ Ang bwkha bisingo ahai hwnwibo uansuk kha, bororokbo mal-matarok hai’-no hwnwi amjokma bai khe Kaitor phunukna nai-o.

¹⁹ Tamni hwn ba bororok bai mal-matarokni páithak manthai le baksa se; bororokbo ma thwi-o tei mal-matarokbo ma thwi-o. Bórokni rangmabo baksano, oro borok bai mal-matani slái bára ya; bebakno samung chúk ya máng se.

²⁰ Bebakno kwrẃngsa’-ono ma thángo; bebakno hadlwini snamjakmani bebakno hadlwino kha phiro.

²¹ Borokni phola khe kuchugo thángo tei mal-matarokni phola khe ha bisingo thángo hwnwi sabo saui man?

²² Aboni bagwino samung bai tongthoknano karwi le tei kaham kuk hwnwi kwrwi, sabo bono mwthang phirwi aboni ulo tamo wngnai phunugui mannai?