PHRWNGNAINI 12 - Kok Borok (Re-edited) Bible (BSI)

¹ Birmanni sal phai ya sini nwng sikla jora-o nini snamnaisano bwkha-o muitu khlai di, tamni hwn ba nwng, “Ang omo tẃi khe tongthok li ya” hwnwi ma sanani sal samphaui phai rw rwgo;

² sal, pohor, tal tei athukirirok mwnak ya sini, chumuirok uatwi thakma ulo kiphilwi phai phinai;

³ aphuru nok mwrwknairok kwlwibranai, borok kwrakrok ma kongsonnai, gom pherenairokbo borok kisa hwnwi samung yakarwi rwnai, tailam tẃi nainairokbo nukprom-nakprom khe se nuknai;

⁴ aphuru lamani dugarrok sojaknai, gom pheremani khorangbo lem wngnai, khoroksa, toksa pungmani khorang khnaui sichanai, rwchapmung-muisupmungni khorangrokbo lem wngnai;

⁵ aphuru kuchukrokno kirinai tei lamarokno kirinai; badam buphango bubar barnai, kuk yathek sopreui se himnai, muchungwi tei tubo tungphlasa glak. Tamni hwn ba jotono bórokni mol brúmni tongma nogo ma thángnai tei kapnairok khe lamarogo himgurungnai;

⁶ rukphaini buduk chonani swkang, rangchakni dangai báinani swkang, twikhereng gana-o twi tilok báina swkang tei twikhorni twi khókma dwkhwi sojaknai gorgori báinani swkang,

⁷ hadlwi tei uáisa hadlwi kha phina swkang tei Kaitor rwmani phola bini thani kiphilwi thángna swkang.

⁸ Phrwngnaisa chúk ya, chúk súk ya; bebakno chúk ya hwnwi sa-o.

Phrwngmungrokno muitu khe saphirmani

⁹ Phrwngnaisa sak-sak sinai wng twtwi buinobo siyan phrwng kha, kaichomwi uansugwi kwbángma phrwngmung kóktháirokno chap kha.

¹⁰ Phrwngnaisa sói kókthái kholwi kók kubui tei srai-srai khe swi kha.

¹¹ Siyan gwnangrok kók samarok le painjon latha hai, bórokni kókrokno thumsa khe thum khe kwrak khe sorni khili dúmjak hai, abórok bebakno khoroksa mera mwrwknai bai rwjakmani.

¹² Angsla, o kókrok bai tei mungsa swk da daljak-duljuk abono hus wng di, bijap swijakmani thak phlai ya, belai pori khebo sak lengpra-o.

¹³ Tabuk le bebakno khna bái laha; tamo khe kók páithak khe omo se, Kaitorno bórom khlaiwi kiriui tei bini dagima khnama bising tẃi se borokni bebak khlaithai khlaijago.

¹⁴ Tamni hwn ba Kaitor bebak samungni buj thumnai, huijak kókrokni suda se buj thumnai, abo kaham phano wng thung hamya phano wng thung.