PHRWNGNAINI 11 - Kok Borok (Re-edited) Bible (BSI)

Siyan gwnangni samungrok

¹ Nini chámungno twi saka-o lukhlai rw di, tamni hwn ba sal kwbángmani yagulo nwng abono kiphilwi man phinai.

² Nini rang-ríno mungsni eba mungchar khatithai-o khatiui ton di, tamni hwn ba o ha saka-o bubotẃi chacharara nangno nwng saui man ya.

³ Chumuirok hiliksajak khe ha saka-o uatwi ua-o; buphang salgra-o da klai tong eba salsi-o de klai tong klai tong thani’-no klaiwi tongnai.

⁴ Nokbarno naisingwi tongnairok ma kái glak; tei chumuino naisingwi tongnairokbo ma ra glak.

⁵ Bumani oksingo bahai khe absani thani rangma hapson nwng abono si ya, abo hai’-no bebakno snamnaisa Kaitorni samungno nwng romwi man ya.

⁶ Nwng phung aidrobo bwchlwi sar di, sarigobo abo hai samung tang di, nini yak ta thak di; tamni hwn ba bu jorani samung chano eba a kwnwi jorani-no da baksa khe hamno nwng abono saui man ya.

⁷ Pohor le naithok’-no, sal nugwi manmabo kaham.

⁸ Khoroksa swk bisi kolokma kwthang tong khe bo a jora tongthogwi tong thung; hai phano mwnakma salni kókroknobo bo muitu tong thung, tamni hwn ba abo kwbángma wng kuknai. Bebak wngna tongmarok bebakno chúk ya.

Sikla boslokrokno kókbiti rwmani

⁹ Siklasa, nwng sikla jorano tongthok di, sikla phuru nini bwkha nono tongthok rw di. Nini bwkha tholjak tẃi’-no tei nini mokol naithokjak tẃi kheno khlai di, tamo khe Kaitor nono bebak samungnino buj thumnai, o kókno muitu narwk di.

¹⁰ Nini bwkhani uanamungrokno hakchal khlai di tei sakno dukhu bai hakchal khe ton di; tamni hwn ba chwrai jora tei sikla jora le chúk ya se.