PHRWNGMUNG 9 - Kok Borok (Re-edited) Bible (BSI)

Siyan kwrwng wngma tei butua wngmani

¹ Siyan bini nokno tang kha, aboni bagwi bo thongla kaisni snam kha.

² Bo bini muirokno rathar kha, angur bwtwinobo dalok kha tei bo bini khalaibo tiyar khlai kha.

³ Bo bini selengjwkrokno bebago’-no rohor kha, kamiyungni tongthai kuchukrogo tongwi nunghorwi sa kha,

⁴ “Butuarok oro phai thung!” hwnwi bo siyan kwrwino sa-o,

⁵ “Phai di ani chámung chá phai di tei ani angur bwtwi dalokjakno nung phai di.

⁶ Butuarok bai tong yaui thángwi tong di tei simungni lama tẃi yapri se di.”

⁷ Buino hamya sanaino khorai khe lachimung mano; borok hamyano phrwng khe mwkhango twisumu siljago.

⁸ Buino hamya sanaino khorai khe nwng na simi se naislerjaknai; siyan gwnangrokno phrwng khe bo nono hamjaknai.

⁹ Sinaino phrwng di, bo teibo sinai, borok kahamno phrwng di bo teibo kwrwng wngnai.

¹⁰ Subraiyungno kirima se elemni yaphang, kwthar kukno sini laha hwn kheno nwng si laha.

¹¹ Tamni hwn ba siyan nini salrokno kwbáng khlaiwi umor manju-ui bisi kwbángma kwthang tonnai.

¹² Tumungno nwng siyan kwrwng wng khe nini bagwino kaham wngo; tei buino hamya sa khe sakno ma rujunai.

¹³ Bwrwi butuarok nang-nung ya kók ego; bo mungsa sibo si ya bubo buchi ya.

¹⁴ Bo bini duglamo achugo tei kamiyungni ha kuchukrogo achugo,

¹⁵ sak-sakni samungni bagwi a lama tẃi láiwi thángnairokno bo ringwi sa-o,

¹⁶ “O butuarok oro phai di!” siyan kwrwi bororokno bo satiro,

¹⁷ “Khogwi nungmani twi khe kwtẃi tei khogwi chámani mai khe kothok.”

¹⁸ Tamo khe aro kwthwirok se tongo hwnwi bórok si ya, bini nogo habwinairok tabuk bebak hakhoro máng se hwnwi bórok si ya.