PHRWNGMUNG 8 - Kok Borok (Re-edited) Bible (BSI)

Elemno lobsaui

¹ Elem ring ya diba, simungbo bini khorang kotor khlai ya diba?

² Bo lama ganani ha kuchugo tei lamprarogo khe bachajak;

³ kamiyungo hapma dugar bwskango bo chirigwi sa-o:

⁴ “O bororok ang norokno ringwi sa-o, ang o ha sakani bebaknono khorang sotonwi sa-o.

⁵ O butuarok, siyan wngna srwng di; o khá siyarok khá sina khlai si di.

⁶ Khna di, ang kók kaham kukrokno sanai tei ani khukni sói kók se ongkhornai;

⁷ tamni hwn ba ang kók kubui se sa-o; ang kók hamyano selengo.

⁸ Ang samani abo kubui máng; aro katswi kaisa phano tatalbo kwrwi tei kokoibo kwrwi.

⁹ Abórok sinairokni thani kepleng máng, elem gwnangrokni thani abórok sói máng.

¹⁰ Rukphai na yaui ani phrwngmano se saiwi na di, rangchak na yaui elemno se saiwi na di;

¹¹ tamni hwn ba elem wng kha holong kahamni slái se kaham, abo nwng aswk manna muchungmarok bai mungsa bai phano su thai kwrwi.

¹² Ang elem, siyan kwrwngrok bai ang tongo, simung tei kaham hamya chongnani ang si-o.

¹³ Subraiyungno bórom khlaima khe hamyano naislerma se. Kung chúkma, kók kotor sama, lam hamya tei kók hamya sanairokno ang naislero.

¹⁴ Kók biti kaham, elem kaham ani se; uansukmung kuthuk tei phanbo ani’-no.

¹⁵ Ani bai se habugrarok bugra chá-o, tei tẃiphangrok sói khe buj thumo;

¹⁶ ani chubachu bai se tẃiphangrok naikini khlai tongo; bugrarok, buj thumnairokbo haino ani phan bai se tẃitherwi tongo.

¹⁷ Ano hamjaknairokno angbo hamjago, khá bai naituknairok khe ano mano.

¹⁸ Gwnang bai bórom ani thani se, rang-rí tei hamchamabo ani se.

¹⁹ Ani bwtháirok le rangchak kahamni slái se kaham, tei rukphai kaham saijakni slái se abo ham kugo.

²⁰ Ang borok kahamrokni lama tẃi himo, tei bujsói tẃiwi himo,

²¹ ano hamjaknairok rang-rí gwnang wngo, tei bórokni rangkhókrokbo kupulung khlaijago.

²² “Subraiyung snamna cheng phuru, bo snamna chengna swkang bo ano snam kha.

²³ Bisi kwbángma swkang ang snamjak kha, katswi swkang o ha snamjak ya sini’-no.

²⁴ O twijlangrok tei twimukrok chersaui phainai twimukrok kwrwisani’-no ang achai kha.

²⁵ Hatháirok wng ya sini’-no tei hachukrok songchajak ya sini-no ang achai kha,

²⁶ bo aphuru, o hano tei auarrokno snam ya kho, aphuru ha-o ha kolsa phano snamjak ya kho.

²⁷ Bo nokharok snam phuru aro angbo tongo, twijlangrokni saka-o kitingwi ari rigwi bo phurubo ang tongo,

²⁸ bo nokha saka-o nokhano snam phuru tei twijlangno twimuk yor khlai rw phuru,

²⁹ bo chongwi twijlangno lái ya tẃi khe ari boui rw phuru, tei o hani yaphang lu phuru

³⁰ aphuru ang bo bai baksa tangnaisarokni bokhorok khe tongo; bo’-no ani cho phlai ya tongthokma, bini bwskango ang sal brúm brúmno khápang srangwi tongmani,

³¹ ang bini tongma ha-o tongthogwi tongmani, bororokno tẃi khápang srangwi tongmani.

³² Sajlasong, tabuk ani kókno khna di: ani lama tẃi himnairokno hamchajak.

³³ Phrwngmungrokno khunju kai di tei siyan kwrwng wng di, abono sak nang ya ta wng di.

³⁴ Ani kók khnanai bororok hamchajak, sichaui tongwi ani duglamo naisingwi tongnai bono hamchajak.

³⁵ Phiya ano mannairok le langma se mano tei Subraiyung baibo khá phurjago;

³⁶ tamo khe ano keplenairok le sakni se hamya khlai-o; ano naislernairok thwinano se hamjago.”