PHRWNGMUNG 5 - Kok Borok (Re-edited) Bible (BSI)

Uaijanairokno ragdama khlaimani

¹ Sajla, ani kók elemrokno kaichom di; ani simungno khunju kan di,

² hakhe nwng kaham hamya sininani phanno romwi tonwi mannai tei nini búkhúkni kók elem nongkhorwi phainai.

³ Bwrwi baliknaini búkhúk piya bwtwi hai kwtẃi tei bini khukni kók thokni slái’-bo mijil;

⁴ tamo khe páithago khe bis hai se kwkha wngo tei babainwi seng kubuk hai bugo.

⁵ Bini yakung thwima lama-o se sógwi-o; tei bini yapri hakhor bwkhak se thángo.

⁶ Bo kepleng thangnani lamano sak nangjak ya; bini lamarok kokoi-mokoi tei bo abono si ya.

⁷ Hakhe Sajlasong tabuk ani kók khna di, ani khukni kókrokno ta bár di.

⁸ Abo hai bwrwi bai hakchal wng di, bini nokni duglam gana-o bo ta tháng di.

⁹ abo hai khlai khe nwng nini bóromno buino se rwnai tei nwng khairokma kwrwirokni yago nini umorno rwui rwnai,

¹⁰ hakhe borok sini yarok nini rang-mai tlangwi páinai tei nini ajimarok phatarsani se wngnai,

¹¹ nwng thwinonogo nini bahan bwsakrok hoiklai phuru nwng kengaiwi ma tongnai,

¹² nwng hai hwnwi sanai, “Ang tamo srwng ya wngjak lang? Ang ba tamo khoroksa bai phano khoraijak ya wng lang!

¹³ Ang ani phrwngnairokni kók khnajak li ya, phrwngnaisarokni kókno khunju kanjak li ya.

¹⁴ Ang luku bodolni motha-o klai kha tei komorwi kwma twtwi wng kha.”

¹⁵ Nini sakni tilokni twi simi nung di, nini baithangni twikhorni yorkhlaima a twi.

¹⁶ Nini twimuk ba tamo phataro da kochoknai, nini twisani twi ba tamo lamarogo da kochoknai?

¹⁷ Bórok nini simino wng thung tei sini ya bororok bai banta khlai laina ta nang thung.

¹⁸ Nini twimuk hamchajak wng thung tei sikla phuru káijakmani hik bai simi nwng tongthok thung,

¹⁹ bo se nini kháni mwswi tei naithoma mwswijwk. Bini khája nono bwkha kochom rw phlai tong thung; bini hamjakma-o nwng phek phlaiwi tong thung.

²⁰ Sajla, nwng tamni kubun bwrwino kwbagwi, baliknaijwkrokni khajano kobor chaui kwbagwi phegwi tongnai?

²¹ Tamni hwn ba Subraiyungni mokol le borokni thángma-himmano nai khlaiwi tongo tei bo bini lamarokno amjogwi nai-o.

²² Bórok samung hamyarokni bagwi khẃi-o klai-o tei bórok bórokni sakni sumsokni dwkhwi-o kwcha-o.

²³ Bórok jai kwrwi khe tongma bagwi thwi-o tei bórok belai butua wngma bagwi kwma-o.