PHRWNGMUNG 4 - Kok Borok (Re-edited) Bible (BSI)

Elemni chúkmungrok

¹ O sajlarok, pha phrwngmano khna di tei kaichomnai wng di, hakhe nwng saui mannai;

² tamni hwn ba ang nono phrwngmarok wng kha kaham: ani o phrwngmano ta khibi di.

³ Ang aphani thani chwrai bwsa tong phuru tei ang amani kháchúksa sajla tong phuru,

⁴ bo ano hai hwnwi phrwngwi sa kha, “Ani kókrokno bwkha-o kwrak khe ton di; ani dagimungrokno tẃi di hakhe nwng thangwi tongnai.

⁵ Simung si di; kók kuthukrokno si di tei ani kókrokno ta pok di, eba aroni tabo ta bár di.

⁶ Elemno ta yakar di, hakhe bo nono mwthangwi tonnai; elemno hamjak di, bo nini mwrwknai wngwi tongnai.

⁷ Elem gwnang wngna khe swkang siyan gwnang se wngna nango, nini tong kwrwi bebak bai kuthuk khe simungno si di.

⁸ Bono swkang ma ton thai, hakhe bo nono kuchuk khlainai; nwng bono kwbak khe bo nono bórom khlainai.

⁹ Bo nini khorogo naithokma khumtrang thup rwui rwnai; tei bo nono motok naithokno rwnai.”

¹⁰ O angsajla khna di, ani kókrokno yachak di, hakhe nini umor kolok wngnai.

¹¹ Ang nono elemni lamano phrwng kha tei sói lamarok tẃi tẃi kha.

¹² Nwng him phuru nini yapri dera glak; tei khachik phano nwng thutai glak.

¹³ Nwng phrwngjakmarok tẃi khe tong di; abono ta yakar di; bono mwrwgwi tong di, tamni hwn ba bo se nini langma.

¹⁴ Borok hamyarokni lama tẃi ta him di tei bórok tong tẃi ta tong di.

¹⁵ Abo hai khlai yaui tong di; aro ta tháng di; aroni uphilwi abo tẃi himwi tháng yaui swkangwi tháng di.

¹⁶ Tamni hwn ba bórok samung hamya tang ya sak muktrwi manjak ya; khoroksa swkno dera rwui man ya sak bórok muktrwi phaijak ya.

¹⁷ Tamni hwn ba bórok samung hamyani chámung tei ur pati rwmani nungmung se nungo.

¹⁸ Borok sutrangrokni lama khe phung aidropni pohor hai kwchẃng, abo sajra jora wngsok ya sak teibo chẃng rwk-chẃng rwk wngo.

¹⁹ Borok hamyarokni lamarok khe belai mwnak hai; bórok buro khu-ui thutai kha saui man ya.

²⁰ Sajla, ani kókrokno kaichomwi khna di; ang samarokno khunju kan di.

²¹ Nwng abórokno nini bwskangni swkwmaui ta khibi di; abórokno muitu khe bwkha-o chu-ui ton di.

²² Tamni hwn ba abórok wng kha abono mannairokni bagwi langma tei abo bórokni sak kaham khlai-o.

²³ Nini bwkhano se bebakni slái naiwi mwrwk di, tamni hwn ba aroni se nini langmani twimukrok yor khlai-o.

²⁴ Nwng nini khukni kók cha yarokno hakchal khlai di tei kók hamyarok bai sakno hakchal khlai di.

²⁵ Nini mokol bai kepleng khe bwskang naisik thung tei nwng bwskango naisigwi mokol kaima ayang-uyang ta wng thung.

²⁶ Nini himmani lamano kepleng khlai di, hakhe nwng nini lamano srai-srai khe chongwi man anw.

²⁷ Yagrabo ta phér di yaksibo ta phér di; nini yaprino hamya bai hakchal khe tong di.