PHRWNGMUNG 30 - Kok Borok (Re-edited) Bible (BSI)

Agurni kókrok

¹ Masa-o tongnai Jakeni bwsla Agurni kóktháirok. A borok Ithielno sa kha, Ithiel bai Ukalno.

² Kubui’-no ang borok hwnjakna chúk ya, belaino butua; ang bororok sina nangma tẃi si ya.

³ Ang le swbo srwngjak ya, kwtharsanobo saui man ya.

⁴ Sabo chuknoha-o kasaui ongkhorwi phai kha? Nokbarno thumwi sabo yapha-o chobwi man kha ba? Sabo twirokno rí bai chu-ui khaui man kha? O hani páithakrogo sabo ari bo? Bini bumung ba tamo? Bwslani bumungba tamo? Nwng saui man khe sa di!

⁵ Kaitorni bebak kókno kubui hwnwi phunugo; bini thani katimung nainairokni bagwi bo phui se.

⁶ Bini kókrok bai tei kók ta dal di, hakhe bo nono kulnai tei tatal manjaknai.

Teibo phrwngmung

⁷ O Kaitor, thwi yasini ano manwi mungnwi man rw ja di:

⁸ Tatal tei tatal samani bai ano hakchal khe ton ja di; ano gwnangbo ta khlai di, bigrabo ta khlai di; ani nangmani chámung bai simi ano ok supungwi ton di,

⁹ ang kwbáng man-mún khe nono sak bók ya wngwi “Subraiyung sabo?” hwnwi hwnnai se, eba ang bigra wng-ung khebo sikhok wngwi ani Kaitorni mungno dera rwnai.

¹⁰ Bugrasani thani bini selengni hamya ta sa di, hakhe a seleng nono swrainai se tei aboni bagwi nwng majra mannai.

¹¹ Buphasongrokno swrainai tei bumasongno kaham sa ya bororokbo tongo.

¹² Bórok sak-sakni mokolo katswi kwthar, aile selengmasingcharok sújak ya se.

¹³ Bórokni mokolo kung chuk lai tiro, bórok sakno bwswk se kaham hwnwi uansuk lai te!

¹⁴ Bigrarokno ha sakani sokomorna bagwi tei biyalo klaijakrokno bororokni bisingni norna bagwi khe bórokni bua seng hai tei sengsa hai,

¹⁵ Siluk masani sajwk maknwi tongo, bórok “Rw di, rw di” hwnwi chirigo. Manwi mungthamrok akaijak phlai ya tei mungbrwirok khe “Wng kha” hwnwi tei hwn ya:

¹⁶ Kwthwirokni ha, bwrwi banji, hakung kwran, tei jlai-jlai khe chẃngjak hór “wng kha” hwn ya.

¹⁷ Buphano mwnwinai tei bumano sak nang ya wngnai bwsa bo harungni tokharok bai khepchajaknai tei sikrukrok bai chájaknai.

¹⁸ Manwi mungthamno ang belai ma kwmamo; mungbrwino khe ang bahai tamo si ya;

¹⁹ toling khe nokha-o biro, chibuk khe holongthai-o malo, rungkotor khe twijlang tẃi kochogo, phiya abo haino chwla bai bwrwi hamjak laima le.

²⁰ Bwrwi baliknairok khe ahai: bo chá-o, bini búkhúk hu-ui páiwi “Ang mungsa samung hamya tang ya bla,” hwnwi sa-o.

²¹ Mungtham bai ha ma kwlwibra-o; tei mungbrwino khe soiwi man ya:

²² Selengsa habugra wng khe tei butuasa ok kupulung wng súk khe;

²³ hamjakma kwrwi bwrwi sai man khe tei selengjwk khoroksa nokphangjwkni yakchu-o ma achuk khe ahai wngo.

²⁴ O ha saka-o, mungbrwirok bwsate se, ahai phano abórok belaino siyan gwnang gwja:

²⁵ Muisrumrok bórok rak ya, ahai phano bórok sachlang phuru chámung thumwi rúngo;

²⁶ dalsa bejrok phan le kwrwi se, hai phano bórok holongo se bothop snamo;

²⁷ kukrok; bórokni bugra kwrwi hai phano bodol khe se bir lai-o.

²⁸ Nobraisa; bono yak bai’-no romwi mano hai phano bórokno habugrani noyungrogo se nuknai.

²⁹ Mungthamrok naithok khe himo; mungbrwirok khe mwchangwi himo;

³⁰ malrokni bisingo singho khe kwrak kuk tei bo mungsa swkni aroni khár ya;

³¹ khaklap chuksa rwui himnai tokla, punjua tei sengkrakrok bai kitingjak habugra.

³² Tumung nwng sakno torjagwi butua ma wngma tong khe eba buini bagwi hamya ma chapma tong khe, hakhe búkhúk muthup si di.

³³ Abuktwino chakrup khe bothona mano, bukungo bu khe kungthẃi kulugo tei joli khe ma uálai-o.