PHRWNGMUNG 29 - Kok Borok (Re-edited) Bible (BSI)

¹ Phrwngjak máng tongwibo gwdna ragwi tongnai borok bo achomsa báinai abono tei ham rwui man glak.

² Borok kahamrok tẃiphang wngwi tong khe bororok tongthogo; tamo khe borok hamyarok tẃiphang hwn khe bororok kengai lai-o.

³ Siyanno hamjaknai khe buphani bwkha srang rw-o, tamo khe bwrwi baliknairok bai tongnairok khe bini rang-rí swbai-o.

⁴ Habugra bujsói bai khe hano kwrak khlai songcha-o, tamo khe rang chánairok le abono swbai-o.

⁵ Nok arini borokno saka-saka bólainai borok bo bini bagwi se khẃi thono.

⁶ Borok hamyarok sak sakni sumsokni bagwi khẃi-o kwcha-o, tamo khe borok kahamrok khe rwchabo tei khápang srangjago.

⁷ Bigrarok bujsói man thung hwnwi borok kahamrokni naharmung tongo, tamo khe borok hamyarok le abono uansuk twrwng ya.

⁸ Buino hamya sanairok kamiyungo hór sunu-ui rw-o, tamo khe siyan gwnangrok le jolimano holi rw-o.

⁹ Tumung siyan gwnang borok butuasa bai kók báng lai khe a butuasa mw phano mwnwinai eba thamchi simi tungjaknai aro kók cho laimung tong glak.

¹⁰ Thẃi kochok rwnairok borok kahamrokno naislerjago, bórok borok kahamrokno butharna bagwi ampa-o.

¹¹ Butuarok jolijak khe katswi pháng-pháng khe sijago, tamo khe siyan gwnang hwn khe abono kwchang kwchang khe monogwi tongo.

¹² Tumung tẃiphangsa kók tatalno khunju kan khe bini bebak tangphangrok hamya wngnai.

¹³ Bigrasa bai sátoknaisa kwrẃngsa-o le gothok lai-o, Subraiyung kwnwino’-no mokol nuk rw-o.

¹⁴ Bigrarokno baksa khe buj thumnai habugrani achukthayung khe mol brúm brúmno ninang yaui tongnai.

¹⁵ Khoraimung tei swprakjaknai raidang khe simung rw-o, tamo khe khoraijak ya chwrai khe bumani mwkhangno sógo.

¹⁶ Borok hamyarok tẃiphang wng khe sumsok bángsa-o, tamo khe borok kahamrok khe bórokni gaijamano nuknai.

¹⁷ Nwsano khoraiwi phrwng di, hakhe bo nono khakchangma rwnai; bo nini bwkhano srang rwnai.

¹⁸ Kók diyari sajakma kwrwi dopharok khe aro oroi-poroi wngo, tamo khe kerong raidarokno rákhogwi tongnairok khe tongthogwi tongo.

¹⁹ Kók bai simi nwng selengno phrwngwi man glak, bo bini kókno romwi man phano abono khna glak.

²⁰ Nwng uansuk yaui kók sanaino nu de nuk kha? Bini slái le khoroksa butua phano se ham kugo.

²¹ Nini selengno bo naima tẃi’-no rwui phai khe, bo salsa nini tong kwrwi tẃi’-no naui páinai

²² Dakti jolinai bororok kwbángma uálaimung tubu-o tei thamchi kutungrok khe belai khe sumsok khlai-o.

²³ Kung chukmung borokno khiklainai, tamo khe koinene khe tongnai borok bo bórom khlaijaknai.

²⁴ Sikhokni pal wngnai khe bo sakno naislerjakma se klai-o; bo swraijakmano khna-o tamo khe mungsa pung ya.

²⁵ Borokno kirima le uarai se chakjago, tamo khe Subraiyungno kirinairok khe kirina kwrwi khe tongo.

²⁶ Borok kwbángma’-no tẃiphangrok bai hamjaknani muchungjago, tamo khe Subraiyung se bujsói khlai-o.

²⁷ Borok kahamrok borok hamyarokno selengjago, tamo khe borok hamyarok khe borok kahamrokno selengjago.