PHRWNGMUNG 24 - Kok Borok (Re-edited) Bible (BSI)

-19-

¹ Borok hamyarokno ta músú di tei bórok bai kwthana ta muchungjak di;

² tamni hwn ba bórok bwkha bising-bising urumuru khlaina máng uansugo, búkhúk tẃi kók hamya máng tikhlai-o.

-20-

³ Elem bai se nok tisajago tei simung bai khe se abo songchajago;

⁴ siyan bai khe khotolrogo manwi kaham-kaham tei naithok manwirok bai kupulung khe supungjago.

-21-

⁵ Borok siyan kwrwng khe phan gwnangni slái se kwrak kuk tei siyan kwrwng borok le phan gwnang borokni slái se phan gwnang;

⁶ tamni hwn ba siyan kwrwngrokni tẃithermung bai choba-o thángwi mano tei kókbiti sanai kwbáng tong khe choba-o kwplai wngo.

22-

⁷ Elemrok le butuani thani belai kuchuk; bo kamiyungni duglamo khúk per ya.

-23-

⁸ Samung hamya khlainani chapnairok khe ur pati rwnaisa hwnwi hwnjaknai.

⁹ Siya borok samung hamya chapma khe sumsok se, buino hamya sanairok lukurok bai selengjago.

-24-

¹⁰ Tumungno nwng tong kesepni salo lengjak khe, hakhe nini phan kwrwi.

-25-

¹¹ Butharna bagwi tlangjaknairokno phiyógwi mwthang di, tantharjakna naiwi tonjaknairokno mwthang ya ta wng di;

¹² tumungno nwng, “Nai di chwng omono si ya,” hwnwi sa khe bwkhano naichomwi nainaisa abono nai glak diba? Nono mwthangwi tonnaisa abono si glak diba? Bo samungno naiwi jotonono aboni manthaino rw glak diba?

-26-

¹³ Sajla, piya bwtwi chá di, tamni hwn ba abo kaham se, piya bwlapni piya bwtwi chá di, abo nini khugo tẃinai.

¹⁴ Siyan le nini langmani bagwi kaham, nwng omono si di; tumung nwng omono man khe nwng thinangni khatungma se mannai tei nini khatungma ahai’-no páiwi pái glak.

-27-

¹⁵ Borok hamya hai nwng borok kahamni tongthaino kebengna bagwi ta chap di; borok kahamrok tong thani ta choprok di;

¹⁶ bórok uáisni klai phano bacha phirnai; tamo khe borok hamya le digi-sigi bai sokomorwi páijago.

-28-

¹⁷ Nini ari birmano klai phuru khe ta tongthok di, bo thutaiwi klai phuru bwkha ta srangjak di,

¹⁸ wng ya khe Subraiyung abono nugwi chajak ya wngwi bini aroni mwkhang uphilwi nini bwkhak bini jolima khiklainai se.

-29-

¹⁹ Samung hamya tangnairokno tẃi uansugwi ámang-chímang ta wng di. Borok hamyano ta músú di;

²⁰ tamni hwn ba borok hamyarokni le mungsa thinang se kwrwi; borok hamyarokni chati ahaino thwinai.

-30-

²¹ Angsla, Subraiyungno tei habugrano kiri di, bórok kwnwinino kók khna ya ta wng di;

²² tamni hwn ba bórokni saka-o Subraiyungni aroni phano eba habugrani aroni bubotẃi sokomormung phainai abo sabo saui mannai?

Teibo simungni kóktháirok

²³ Omorokbo elem gwnangni kókrok; buj thum phuru yasa phaising simi baitogwi tongma hamya.

²⁴ Borok hamyano “Nini mungsa majra kwrwi” hwnwi sanai borok bo lukurok bai swraijaknai tei dopharok baibo khibijaknai;

²⁵ tamo khe borok hamyarokno majra rwnai khe khápang srangnai tei bórokni thani hamari sók phainai.

²⁶ Kók kubui khe kók uphil sajakma khe motom sujakma hai se.

²⁷ Nwng nini kheto-o samung-humung khlai páiwi phataro samung pái gra di; aboni ulo se nwng nini nok tang di.

²⁸ Ereng-ereng nini nok arini borokni bagwi tatal khe kók ta sa di tei nini khúk baibo ta bandi di.

²⁹ “Bo ano khlai tẃi’-no angbo bono khlainai; bórok ano khlaimani yagul sunai” hwnwi ta sa di.

³⁰ Ang selersani bari tẃi lái kha, butuani angur bwlwng tẃi láiwi nuk kha;

³¹ aro busu máng kupulung; ha-obo sam phang koboljak, phiya holongni chokdeualbo báiwi klaijak.

³² Abono nugwi ang uansuk kha tei srwng kha.

³³ Tei kisa thuma tei kisa murumma, kisa yak kwbagwi lenglama,

³⁴ jora’-ono nini thani dagait phai tẃi khe tei da-seng tẃijak sengkrak phai tẃi khe biyal nini thani phaiwi sók phai anw.