PHRWNGMUNG 23 - Kok Borok (Re-edited) Bible (BSI)

-6-

¹ Nwng tẃiphangrok bai chána achuk khe, nini bwskango tamo tong abono kaham khe nai di,

² nwng belai khe ok khui tong phano, belai hal-hal wng yaui soiwi tong di.

³ Bini a chámung kothok-kothokrokno ta khámai di, tamni hwn ba bo a chámung rwmani uklogo bini bandinani uansukmung tongo.

-7-

⁴ Rang-ríni bagwi aswk kolomtwi ta khiklai di; abo hai wng ya wngna bagwi nangma swk siyan gwnang wng di.

⁵ Nwng abono naisigwi tong phuruno abo thángwi se pái kha; achomsa abo bwkrang khaui toling bir tẃi khe nokha-o birwi thángnai.

-8-

⁶ Borok khechrarokni mai ta chá di; bini a kothokrokno ta khámai di;

⁷ tamni hwn ba bo le bwkha bisingo khe bwswk tamo báiwi tong kha abono se lekhaui tongo. Bo nono “Tei kisa chá di” hwnwi hwnmani abo le bwkha bai khe hwnma ya.

⁸ Nwng chámani abo kwbanai tei nini kók kwtẃirok ahaino se wngnai.

-9-

⁹ Butuano khna rwna hwnwi kók ta sa di, bo nini a kók kahamno simi se nornai.

-10-

¹⁰ Nini hani kwcham ari mari bomano ta nor di tei ma-pha kwrwirokni hano ta sek di,

¹¹ tamni hwn ba bórokno kati rwnai le phankrak; bo nono kebengwi bórokni sandai hai khe bórokni wngwi sachrunai.

-11-

¹² Phrwngmano nwng kaichom di tei siyanni kókno khunju kan di.

-12-

¹³ Chwrai bwsarokno khoraiwi phrwngna ta koró di; nwng bono raidang bai swprak phano bo thwi glak.

¹⁴ Tumung nwng bono raidang bai bu khe, bono ma thwinani yakni se mwthango.

-13-

¹⁵ Sajla, nwng khá sinai wng khe ani bwkha se tongthoknai.

¹⁶ Nini khúk bai kók kubuino sama khna khe, ang khápang tongthoknai.

-14-

¹⁷ Sumsok gwnangrokno nwng ta músú di, tamo khe Subraiyungno se kiri máng tong di.

¹⁸ Au, nini thinang khom-khom wngnai tei nini khatungmano khibiui rwjak glak.

-15-

¹⁹ Sajla, nwng khna di siyan wng di tei nini kháno sói lama tẃi tẃi di.

²⁰ Chuak nungkrakrok bai tei muihan chákrakrok bai ta kwtha di,

²¹ tamni hwn ba phekplai tei chákrakrok bigra khanai, phiya muktrwi kwbáng wng khe bórokno rí kichik se kan rwnai.

-16-

²² Nono ogo chu rwnai nwphani kók khna di tei nwma bwrwichwk wng phuru bono sak nang ya ta wng di.

²³ Kubuino pai di, abono ta phal di; simungno, phrwngmungno tei kaham hamya romwi manmungno pai di.

²⁴ Borok kahamni bupha belai khe khá tongthoknai; khá sinai bwsa man khe bono tẃiwi bwkha srangnai.

²⁵ Nwma bai nwphani bwkha srang thung; nono ogo tẃinai bwkha tongthok thung.

-17-

²⁶ Sajla, nwng ano kháno rw di tei nini mokol bai ani tongmungrokno naisik di.

²⁷ Tamni hwn ba sak phalnaijwkma khe hakhor kuthuk se; tei baliknairok khe hakhor kesep.

²⁸ Bo dagait hai khe huijagwi naisingwi tongo tei kók narwk ya borok báng rw-o.

-18-

²⁹ Sabo bwkha dukhu nangjak? Sabo bwkha báijak? sabo ua laiwi tong? Sabo tentai? Sabo ahaino swprak? Saboni mokolrok chaksa?

³⁰ Sal kwdwkma khe chuak bai tongnairok tei arakrok dalokna máng naituknairok abo hai wngo.

³¹ Arak kwchak wng phano tei khuri-o jilik-jilik khe nukjak phano tei laitesa khe totra lái phano abono ta naisik di.

³² Páithago khe abo chibuk suk tẃi khe se súgo tei bwlwisa gwnangrok chwk tẃi khe se chwgo.

³³ Nwng aphuru bejua bejuarok nuknai tei nini bwkha mwlang-kwlang khe uansuknai.

³⁴ Nwng twijlang kwcharo thu-ui tongnai tei chokphung saka-o rokonai hai wngnai.

³⁵ “Bórok ano bu kha,” hwnwi nwng sanai, “Tamo khe dukhu man li ya, bórok ano swprak kha hai phano ang abono si li ya. Ang buphuru sicha sinai? Ang sicha phi khe tei uáisa da chuak naituk phinai?”