PHRWNGMUNG 22 - Kok Borok (Re-edited) Bible (BSI)

¹ Belai gwnang wngnani slái mung kaham se manna nai kuk di, rangchak-rukphaini slái bui bai bwkha phurjakma se ham kugo.

² Kwrwisa bai gwnang sa kaisa-o le gothogo: Subraiyung se bórok kwnwino’-no snamo.

³ Siyan kwrwng borok khe dob nuk khe sak katiui tongo; tamo khe butuasa khe swkangwi thángo tei aboni bagwi ma manjago.

⁴ Koinene wngma tei Subraiyungno kirimani sokat le rang-rí, bórom tei langma se mannai.

⁵ Borok hamyani lama-o khe busu bai uarai tongo; hus gwnangrok khe abórok bai hakchal khe tongnai.

⁶ Chwrai bwsarokno kahamo phrwng di, hakhe chakrauibo bo lama koró glak.

⁷ Gwnangrok kwrwirokno kók khna rwui tono tei lakai nanaisa khe lakai rwnaisani seleng wngo.

⁸ Bujsói ya bwchlwino sar khe komormungno se ma ranai tei thamchi tungjak khe raidang tisamani abo páiwi thángnai.

⁹ Yapharnai borok khe hamchajak, tamni hwn ba bo bini chámungno bigrarok bai banta khe chá-o.

¹⁰ Buino kók hamya sanaino rwkhlaiwi rohor di; uálaimung tei khek laimung tong glak.

¹¹ Bwkha kuphurno hamjaknai tei khairokma gwnang kók sanaini le habugra se kiching wngnai.

¹² Subraiyung siyanno mwrwgo tamo khe kók narwk ya bororokni kókno khe khibiui rw-o.

¹³ Selersa hai hwnwi sa-o, “Phataro singho tongo! lamarogo tháng khe ang uátharjaknai se!”

¹⁴ Uaijanai bwrwini khúk le hakhor kuthuk hai se; Subraiyungni jolima bororok le aro klai-o.

¹⁵ Sikla boslokni bwkha khá si ya, tamo khe swpragwi khoraiwi bu khe abo thángwi ma pái-o.

¹⁶ Gwnang wngna bagwi bigrarokno sátoknai tei gwnangrokno rwnai bórokni biyal wngnai.

Mungthamchi simungni kókthái

¹⁷ Nini khunjuno kaichomwi siyan kwrwng borokni kókno khna di tei ani phrwngma kókrokno kaichomwi nai di;

¹⁸ tamni hwn ba, tumung nwng abórok bwkha-o ton khe tei nini khugo tong phlai khe nwng tongthoknai.

¹⁹ Nwng Subraiyungni thani bwkha beraui man thung hwnwi ang tini abórokno nono’-no saui man rw kha.

²⁰ Ang nini bagwi siyanni tei selengjakmani Kókthái thái thamchi sajakmungrokno swi ya diba,

²¹ nono rohornairokno sói khe uphilwi saui manna bagwi ang nono kók kubui tei sóino phrwng ya diba?

-1-

²² Bigrasano chúk ya nugwi bono ta sekpro di, eba khe bono duglamo kádulwi ta kusup di;

²³ tamni hwn ba Subraiyung bórokni koimano khnanai tei bórokno dukhu rwnairokni langmano dukhu rwnai.

-2-

²⁴ Thamchi kutung uálainai borok bai ta kwtha di tei joli kwrak borok bai ta him di,

²⁵ hakhe nwngbo bini tongmungno srwngnai tei sakno se khẃi-o khiklainai.

-3-

²⁶ Nwng yago yak beraui buini lakaini bagwi bachanairokni bere khoroksa ta wng di.

²⁷ Tumung nini aro sunani bagwi mungsa kw se kwrwi hwn khe tamni bagwi nwng nini thuyam sekjakna klai ba?

-4-

²⁸ Nini chuchusong káiwi klangma ari kwcham marino ta nor di.

-5-

²⁹ Nwng khoroksa swkno yapai kaham khe samung tangma da nuk kha? Bórok habugrarokno se monnai; bórok borok bánglarokno mon ya.