PHRWNGMUNG 21 - Kok Borok (Re-edited) Bible (BSI)

¹ Subraiyungni thani habugrani bwkha le twisani twi hai se; bo abono bini muchungthanino bono rohoro.

² Borokni lama sak sakni thani bebakno kaham hai máng, tamo khe Subraiyung le bini bwkhano se rwta-o.

³ Ratharwi barokmani slái samung sói khlaima tei bujsói khlaimano se Subraiyung yachak kugo.

⁴ Hamya khe naisikmani, kung chukjak bwkha tei borok hamyarokni chati khe sumsok bai kupulung.

⁵ Khir-khir khe tangnairokni chapmarok bai kwbángma rang-rí ajiui mano, tamo khe doro-khoro khe samung tang khe biyal wngnai.

⁶ Tatal saui rang-rí ajima le twi hoku hai tei abo butharnai uarai hai se.

⁷ Borok hamyarokni samung bórokno kochok rwui tlangnai, tamni hwn ba bórok bujsóino khlaina nai ya.

⁸ Samung hamya tangnaini lama le kokoi-mokoi, tamo khe borok kahamni tongmung le srai-srai.

⁹ Uálai kwrak bwrwi bai tongmani slái le uyar saka-o kesepjak khe ma tongma se ham kugo.

¹⁰ Borok hamyani muchungmarok le hamya máng se; bini nok-arini bororok bo bai khairokjak ya.

¹¹ Buino kók hamya sanai majra rwjak khe butua khe siyan kwrwng wngo; siyan kwrwngrok phrwngjak khe bórok teibo elem kwrwng wngo.

¹² Borok sói khe bo borok hamyarokni núkhungno naichomo; borok hamyarok khe sokomorna bagwi khiklaijago.

¹³ Bigrasa kap phuru khunju muthupnai borok, bo kap phuru khe kebo bai khnajak glak.

¹⁴ Tepsa khe hili rwmani abo thamchi tungmano kwchang rw-o; tei khaklabo bersonwi rang tukma khe belai khe jolimano ham rw-o.

¹⁵ Bujsói khlaijak khe borok kaham bwkha tongthokjago, tamo khe samung hamya tangnairok khe mwkhang somo.

¹⁶ Simungni lamano khibiui lama korónai borok khe bo kwthwirokni bodolo se ma bathagwinai.

¹⁷ Tongthok-cháthok khe tongna hamjaknai borok bo biyalo klainai; chuak tei thok hamjaknai borok bo gwnang wngwi man glak.

¹⁸ Borok hamyarok borok kahamrokni bagwi tei bujsói-o tong yarok buj sói-o tongnairokni bagwi dukhu ma mannai.

¹⁹ Hik uálai kwrak tei kók kwbáng bai tongmani slái borok kwrwi bolongo tongwima phano ham kugo.

²⁰ Siyan gwnangni nogo rang-mai kupulung tongo, butua khe chá máng pái rw-o.

²¹ Bujsói tei khairokmano tẃi tongnai borok bo langma tei bórom mannai.

²² Siyan gwnang borok phan gwnangrokni kamiyungno su-ui pái-o tei bórokni bwkha berama thongla kwrakrokno swbaiwi rw-o.

²³ Sakni bwslai tei búkhúkno narwgwi tonnai borok bo jwngjalni yakni se phiyógo.

²⁴ Kung chukma tei kók kotor sanai nono “Buino hamya sanaisa” hwnwi hwnjago, bo kung chugui samung tango.

²⁵ Selerni muchungma bono butharo, tamni hwn ba bini yakrok samung tangna nai ya.

²⁶ Borok hamya bo sapung’-no khámai-o, tamo khe borok kaham khe buino yak kuar khe rw-o.

²⁷ Borok hamyasa ratharwi yapharma le selengmasingcha se; bwkha sitra khlaiwi abono tubu khe abo teibo naislermasingcha.

²⁸ Tatal khe kók sachrunai khe komor langnai, phiya kaichomwi khnanai borok khe tong phlainai.

²⁹ Borok hamyani mwkhango lachima kwrwi, tamo khe borok kaham khe bini lamano uansugo.

³⁰ Mungsa swk elem, simung tei kókchaprok Subraiyungno kebengwi bachasaui man ya.

³¹ Chobani salni bagwi korai le tiyar khlaijago, tamo khe kwplai khlainai le Subraiyung se.