PHRWNGMUNG 20 - Kok Borok (Re-edited) Bible (BSI)

¹ Chuak, buino thesra kariui kók sa rw-o, arak, kók adlang-pidlang sa rw-o, abo bai lama koró rwjaknairokni siyan kwrwi.

² Habugrani jolima le singho sokromsama hai; bono joli rwnai borok le sak-sakni bagwi thwina lama se tanma klai-o.

³ Uálai yaui tong khe bórom mano, tamo khe bebak butuarokno uálaina hal-hal wngo.

⁴ Selersa tangbla jora-o tangwi narwk ya; hakhe rana jora-o bo mungsa phano ma ra ya.

⁵ Borokni uansukma wng kha twi kuthukni twi hai, phiya siyan kwrwngrok khe abono tisasaui tubunai.

⁶ Borok kwbángma’-no sak-sakno kók narwknai hwnwi sa tiro, tamo khe sabo kók narwknai borok naitugwi mannai?

⁷ Borok sói khe himma-thángma-o kók bai samung bai gothokjak, bórokni yapri rwgwi himnai bwsarok khe hamchajak!

⁸ Bujsóini achukthai-o achuknai habugra bini mokol bai o bebak hamyano siniui pai-o.

⁹ Sabo “Ani bwkhano kuphur khlai kha; ani sumsok kwrwi” hwnwi saui mannai?

¹⁰ Rwtamung tei sujaknai bejua pher gwnangrokno Subraiyung selengjago.

¹¹ Chwrai phano bo bahai borok bini samungrok bai’-no sijago, bo sói tei srai-srai tei samung da tang abo bai’-no abo sijago.

¹² Khwna rwnai khunju tei nuk rwnai mokol, o kwnwino’-no Subraiyung se snamo.

¹³ Aswk thuna ta hamjak di, hakhe nwng bigra wngnai; nini mokol phiyok di, nini mojomo chámung tongnai.

¹⁴ Painaisa “Hamya, abo hamya” hwnwi sa tiro tei ulo khe paiwi tlangwi abono tẃi’-no kung chuksa tiro.

¹⁵ Rangchak tongo tei holong kahamrokbo tongo; hai phano siyan kwrwngni kók khe abo holong kahamrokni slái morok kuk.

¹⁶ Phatarsani rwthaini bagwi bacha khe bini ríno na di; buini hani borokni bagwi bacha khe bono’-no kók rwmani mari khe na di.

¹⁷ Bandiui manma manwino bororok tẃijago ulo khe búkhúk kupulung holongsiki máng wngo.

¹⁸ Kók biti bai se kók chapmarokno chongjago; kókbiti kaham na yaui choba-o ta nongkhor di.

¹⁹ Kók nang-nung ya sama bai kók phobjakrok suprujago, aboni bagwi kók sa krakrok bai ta gwdal di.

²⁰ Tumung khoroksa swk ma-phano swrai khe bini langmani chati mwnakma-o butharwi páijaknai.

²¹ Laitesa khe manmani rangrok le abo páithago hamari wng glak.

²² “Ang hamyani yagul sunai;” hwnwi ta sa di, Subraiyungno se naising di, bo nono chubanai.

²³ Rwtamung phér rwui sumano Subraiyung naislerjago tei tatal khe rwtamabo hamya.

²⁴ Borokni yapri Subraiyung bai se tholjago; hakhe bahai khe borok bini baithangni lamano sinai?

²⁵ Achomsa “Kwthar wng kha” hwnwi khúk perma tei chak baiwi uansukma le borokni bagwi khẃi hai se.

²⁶ Siyan kwrwng habugra khe borok hamyano mai nak tẃi khe nagwi búkhlaiwi rohoro tei borokni saka tẃi gorgori goirok rwui rohoro.

²⁷ Borokni phola khe abo Subraiyungni chati se, abo bini bebak bisingni’-no naitugwi nai-o.

²⁸ Kók khnaui tongmani tei kók narwgwi tongmani abo habugrano mwthangwi tono.

²⁹ Phan se siklarokni le chẃngsacha, phiya bwkhnai phurma khe chakrarokni naithokmung.

³⁰ Swprakjak khe hamyarok sújago; bujakma bai katswi bisingo suda sap-sutra ma wngo.