PHRWNGMUNG 18 - Kok Borok (Re-edited) Bible (BSI)

¹ Hoda bai kagwi tongnai borok sakni muchungmani simi manna chaitogo tei bui sói khe chapmarokno kebengwi bacha-o.

² Butuasa bo kaham hamya saui manmano tẃi tongthokjak ya, tamo khe sakni uansukmano simi saui se tongthokjago.

³ Tongmung hamya naislermung achai rw-o, lachimung khe naislermung achai rw-o.

⁴ Borokni khukni kók khe ha kuthuk bisingni twi hai; sinairokni khukni kók khe chersaui phainai twi hai.

⁵ Majra gwnangrokni bwkhak wngwi buj thummani eba majra kwrwirokno majra bermani abo bai bujsói khlai ya wngma klai-o.

⁶ Butuasani kók khe uálaimung tubu-o tei bini kók le swprakjakna se kobogo.

⁷ Butuasani khukno bono koró rw-o tei bo bini kók bai’-no khẃi-o kwcha-o.

⁸ Kók hunu-hanai chámung kothok hai; abo bwkha bisingo habwi thángo.

⁹ Samungno sak nangjak ya borok khe sokomornaisani takhuk.

¹⁰ Subraiyungni mung wng kha kuchuk nok kwrak hai; borok kahamrok aro’-no khárwi kati-o.

¹¹ Gwnangsani rangchak-ríchakno bini chokdeual kitingjak kamiyung; bórokni rang-ríno se bórok chokdeual kuchuk hwnwi khá ka-o.

¹² Komorna swkang kung chukma phai-o, tamo khe koinene wng khe bini bórombo phai-o.

¹³ Khna súk ya sini kók kiphilwi sama wng kha butua wngmani tei lachimasingcha wngna nangmani.

¹⁴ Sak hamya wng phuru bwkha rakmung borokno soi rwui tono; tamo khe sabo bwkha báimano soiwi tongwi mannai?

¹⁵ Khá sinai borok khe siyan kwrwng wngo, siyan kwrwngrok khunju bai simungni kók khnana muchung jago.

¹⁶ Hili bai khe dugarrok phiyok jago; abono borok kotorrokni thani tubu-ui phaiwi mano.

¹⁷ Bujo swkang kók sa granaini kókno sói hai khe ma tongo, ulo bini kebengnaini kók khna khe se bahai tamo saui mano.

¹⁸ Suar gwnang khoroknwirok kók báng lai khe bono pat ka rwma bai khe buj sachu-ui rwui mano.

¹⁹ Takhukni chubamung le kamiyung kwrak hai se; tamo khe uálaimung le nok kwrakni dugar khaprema hai se.

²⁰ Borok bini khukni kókni bwthái bai’-no ok kochomjago; tei bini khukni kók bai bo manmano bwkha kochomjago.

²¹ Khukni kók mwthangwibo mano tei butharwibo mano, kók sana hamjaknairok aboni bwtháibo mannai.

²² Hik mannaisa bo manwi kahamno mano; tei bo Subraiyung bai naikhlaijago.

²³ Bigrasa le koiwi sano, tamo khe gwnangsa khe khúk kwprap bai se bono uphilwi sa-o.

²⁴ Baksa kichingrok ahaino saka-saka simi kiching hai khe phunugo, tamo khe sói kiching khe sakni takhukni slái se swrapjak khe tongo.