PHRWNGMUNG 17 - Kok Borok (Re-edited) Bible (BSI)

¹ Uálaimung kupulung nogo chámungni panda-o chámani slái kwchang kwchang nogo mai bukcha cháma phano ham kugo.

² Siyan kwrwng seleng lachimasingcha samung khlainai chwraino kók khna rwui tono tei núkhungni bororokni manthai man tẃi khe bo’-bo manthai mano.

³ Rukphaino gele rwjaknai manwi-o khe tei rangchakno hóro sógwi amjogwi nai-o, tamo khe Kaitor le borokni bwkhano se amjogwi nai-o.

⁴ Samung hamya tangnaisa bo kók hamya sanaini kókno khunju kano; tei borok tatal khe kók nang yano khunju kano.

⁵ Bigrasano mwnwinai borok bo le bórokni snamnaisano se mwnwima klai-o; buini digi-sigino nugwi mwnwinai borok majra ma chánani yók glak.

⁶ Sukba-sabarok wng kha chakrarokni motok tei ma-pha khe bwsarokni mwkhang chẃngjaknai.

⁷ Butua le kók rwngwi mwchang ya tei naikolphangbo tatal saui mwchang ya.

⁸ Rang tuknairok rang tukmano kók mwtai hai wngjago; bo mwkhang rwma bwkhakno hamcha-o.

⁹ Cha yano nakarnai khe kiching halok kha-o, tamo khe kók báng laima-o tong khe kichingrokno swkago.

¹⁰ Butuarok uáisa-ra swprakjagwi sajakmani slái siyan gwnangrok tháisa khoraijakma bai teibo sajago.

¹¹ Borok hamyarok khe kebengna simi se nai-o, tamo khe bini thani butharnai tẃitun rohorjaknai.

¹² Butuasano bini korójago malaima slái bwsa kwmajak gong bumano malaima phano ham kugo.

¹³ Kaham khlaijakma se hamya bai kiphilwi yagul sunai borokni nokni hamya kak glak.

¹⁴ Uálai mung chengmani khe abo twidu kuagwi twi thángma hai se; aboni bagwino kók báng lai ya sini-no methep laiwi pái di.

¹⁵ Cha yano khe cha-o tei chamano khe cha ya hwnnai, o kwnwino’-no Subraiyung selengjago.

¹⁶ Butuani thani srwngna bagwi tamni rang tongnai, bini thani srwngna bwkha se kwrwi hwn khe?

¹⁷ Kiching khe hamjak máng tongo tei takhuksong khe tong kesep phuru chubana bagwi tongo.

¹⁸ Butuasa ahaino swmai tangwi kók rw-o tei abo hai khlainai hwnwi bini nok arirokni bwskango kók rwui barja na-o.

¹⁹ Sumsok hamjaknai borok bo uálaimung hamjago; tei dugar kuchuk khlainaisa sakni bagwi hamya se ringo.

²⁰ Bwkha bejua borok bo hamwi man ya, khúk hamyarok bórok báiwi klai-o.

²¹ Butua bwsa hwn khe buphani bwkhano swbai-o tei butuasani buphani bwkha-o tongthokma kwrwi.

²² Swrangjak bwkha khe bithi kaham hai, tamo khe bwkha báijak khe bekrengrokno se rampra rw-o.

²³ Bujsói wng ya khlaina bagwi borok hamya buini thani rang cha-o.

²⁴ Kaham hamya sininai khe siyan wngna bagwi kaichomo, tamo khe butuasani mokol khe ha páithak jora se beraiwi tongo.

²⁵ Bwsa butua le buphano bwkha kham rwnai tei bumano bwkha swbainai se.

²⁶ Borok sutrangrokno rang su rwma cha ya tei borok kahamrokno bórok kaham khe tongo hwnwi swprakmabo cha ya.

²⁷ Siyan kwrwngrok khe kók kwbáng sa ya; kwchang kwchang khe tongnai bo se sói sinai borok.

²⁸ Siring siring khe tong khe butuabo siyan kwrwng hwnjago; bo kók sa yaui tong khe sinai hai khe nukjago.