PHRWNGMUNG 16 - Kok Borok (Re-edited) Bible (BSI)

¹ Borok bwkha uansugwi chapmungrok chabo, tamo khe Subraiyung se kiphilwi sakhlai-o.

² Borokni bebak lamano sakni mokol bai khe kwthar khe nugo, tamo khe Subraiyung uansukmarokno su-ui nai-o.

³ Nini samungno Subraiyungni yago yaphar di, hakhe nini chapmarok samung chanai.

⁴ Subraiyung bebaknono bini samungni bagwi se snamo, borok hamyaroknobo digi-sigi salni bagwi snamo.

⁵ Kung chuknairokno Subraiyung naislerjago; bórok majra man yaui tong glak, norok omono srai-srai khe si di.

⁶ Kók narwkma tei kók khnaui tongma bai hamyano kwthar khlaiwi mano tei Subraiyungno kirima bai se khoroksa borok bo samung hamya bai hakchal khe tongo.

⁷ Borokni tongmungno Subraiyung chajak khe, bo bórokno bórokni kebengnai arirok bai suda kwchang kwchang khe tono.

⁸ Samung hamya bai kwbángma ajimani slái, samung kaham bai kisa ajima phano ham kugo.

⁹ Borok bo bini himma lamano tẃi chongo, tamo khe Subraiyung se bini yaprirokno se rw-o.

¹⁰ Habugra chongwi samani abo kuchukni phan bai khe sama se; bo buj thum phuru sumsok khlai ya.

¹¹ Khrop khrop khe sujaknai tei rwtajaknai manwi le Subraiyungni se; kholjangni rwtajaknairok bebakno bo se snamo.

¹² Samung hamyano habugra chajak ya, tamni hwn khe bini achukthayung kubui bai se songchajak.

¹³ Kók kubui sanairokno habugra bwkha phurjago tei kók kubui sanairokno bo hamjago.

¹⁴ Habugra jolimani abo butharnaisano ringma se tei elem gwnangrok khe bono bwkha ham rwui tono.

¹⁵ Habugrani mwkhang chẃng khe mwthangjago, bo bai bwkha phurjakmani abo wng kha tangbla jora-o uatwi ua rwnai chumui hai.

¹⁶ Rangchak manmani slái elem manmani abo bwswk se ham kuk! Rukphai manma slái simung manma se cha kugo.

¹⁷ Borok sóirokni lahar khe hamyano khibijak; sak-sakni lamano naichomwi tongnairok bórokni langmano mwthango.

¹⁸ Komorna swkang kung chuk gra-o tei kwlwkna swkang thamchi tung gra-o.

¹⁹ Kung chuknairok bai khe buini sekma manwi banta thwkmani slái koinene khe bigrarok bai pal tongma se ham kugo.

²⁰ Phrwngjakma-o kaichomnairokni khe kaham wngnai tei Subraiyungno bwkha beranai khe bo hamchajak.

²¹ Khá sinai borok bo elem gwnang hwnjago tei khúk kwtẃi hwn khe bo buino lon rwui man kugo.

²² Siyan gwnangrokni thani elem wng kha langmani twimuk tei butua tongmung khe butuarokni manthai.

²³ Siyan gwnangni bwkha bini kókrokno pál gwnang khlai-o tei sinai borokni kók khe buini thanibo kwtẃi.

²⁴ Kók kahamrok le piya bwlap hai se, abo bwkhano kwchang rw-o tei sakni bagwibo kaham.

²⁵ Lama twngsa borokni mokol bai kaham hai khe nukjago, hai phano abo thwina lama-o se tlango.

²⁶ Ok khuima se samung tangnaisano tang rw-o; bohokni bagwi se bórokno tangna dagi-o.

²⁷ Borok bejuarok buini hamya khlaina chabo; bórokni khukni kókrok hokhi jolo-jolo hokhi bothrai hai.

²⁸ Lama korójak borok uálaimungno ebrum rw-o, kók hunu-hanai kókrok khe khachukni kichingrokno swkago.

²⁹ Uálai kwrak borok bini nok arini borokno phemlogo tei bórokno lama hamya-o soui tlango.

³⁰ Mokol muphligwi tail khlainairok hamya chabo; uachramnairok hamya khlaina bagwi chabo.

³¹ Bwkhnai kuphur le bóromni motok se; abo sói khe tongma bai se mano.

³² Doui joli ya borok bo phan gwnangni slái se kaham kuk tei sakno soiwi tongnai borok bo kamiyung kaisano mechennaini slái se tor kugo.

³³ Borok pat ka rw lai-o, tamo khe Kaitor se tamo wngnai chongo.