PHRWNGMUNG 15 - Kok Borok (Re-edited) Bible (BSI)

¹ Khúk kwtẃi khe jolima ham rw-o, phiya, kók kwprap khe thamchi tung rw-o.

² Siyan gwnang borok kók sa khe simungno sa-o, phiya butua khe kók nang ya sa-o.

³ Subraiyungni mokol bebaknono naikhlaiwi tongo, kaham bai hamya bebakno naikhlaiwi tongo.

⁴ Kók kwchang le mwthangnai buphang se, tamo khe kók sitra khe bwkhano swbai-o.

⁵ Butua le buphani khoraimano khna ya, phiya khoraimarokno khunju kannai khe hus gwnang.

⁶ Borok sóirokni khe rangchak-ríchak kupulung tongo, tamo khe borok hamyarokni ajimung bai khe dophani bagwi jwngjal se sók phai-o.

⁷ Sinaini khúk khe elemno píro, butuarokni bwkha-o simung se kwrwi.

⁸ Borok hamyarok ratharwi barokmano Subraiyung selengjago, phiya, borok kahamrok surimano khe bwkha phurjago.

⁹ Subraiyung borok hamyarokni lamano selengjago, phiya sói tei kaham samung khlaina bagwi swkangwi thángnairokno khe hamjago.

¹⁰ Sói lamano yakarnai borok panjalwino majra ma chánai, phiya khoraimano khna ya khe bo ma thwinai.

¹¹ Subraiyungni mokolo kwthwirokni habo pháng-pháng se, hakhe bo borokni bwkharokno bwswk se saui mano!

¹² Buino mwnwinairok khoraijakna hamjak ya; bórok sinaini thani tháng ya.

¹³ Bwkha kwsrang hwn khe mwkhangbo kwchẃng wngo, tamo khe bwkha hamya khe mokjak wngo.

¹⁴ Siyan gwnangrok khe srwngna nai-o, tamo khe uansukma kwrwini khe butua tongmungno se chá-o.

¹⁵ Bigrasani le sal brúmno se tong kesep, phiya bwkha kwsrangrok khe sal brúmno se chámungni ter.

¹⁶ Kwbángma rang-rí gwnang khe tong kesebo tongma slái Subraiyungno kiriui rang-rí kisicha khe tongma se cha kugo.

¹⁷ Hamjakmung kwrwi khe mála kotorno ma chámani slái hamjakmung bai dalo-sampra ma cháma hamo.

¹⁸ Borok thamchi kutung khe kók egwi uálai na hamjago, tamo khe doui thamchi tung yarok khe uálaimano methebo.

¹⁹ Selersani lama-o khe bebago’-no busu bachajak, tamo khe borok sóirokni lama khe lahar milik.

²⁰ Siyan gwnang bwsa khe buphano bwkha srang rw-o, tamo khe butua khe bumano sak nang ya wngo.

²¹ Butua khe bórokni si yano tẃino tongthogo, phiya siyan gwnang khe kepleng tẃi himo.

²² Kók biti kholma kwrwi khe chapmungrok cha ya wngo tamo khe kwbángma kókbiti rwnai tong khe chapmungrok cha-o.

²³ Sói khe kók uphilwi saui manmano bororok hamjago tei nangma jorani kókno jora-o saui manma abo bwswk se ham!

²⁴ Siyan gwnangrokni langmani lama khe toksaui thángo, hakhe kwthwini ha-o tokhlaiwi ma thángnani yakni yógo.

²⁵ Subraiyung kung chuknairokni nokno swbai-o, tamo khe randijwkmani nokni ari marirokno khe kati rwui tono.

²⁶ Hamya chapmungrokno Subraiyung selengjago, tamo khe hamkraini kókrokno khe hamjago.

²⁷ Lam cha ya tẃi khe ajina hamjaknairok bo bini núkhungno tong khochoro khiklai-o, rang chámano naislerjaknairokni khe kwthang tongnai.

²⁸ Siyan kwrwngrok bahai khe kók sanai abono uansugo, tamo khe borok hamyarok khe kók hamyarok máng sa-o.

²⁹ Subraiyung borok hamyarok bai chaljak, tamo khe borok kahamrok surimano khe bo khna-o.

³⁰ Mwnwijak mwkhang bwkha srang rw-o tei kóktma kahamrok khe sak-mangno thangsa rw-o.

³¹ Kahamni bagwi khoraimano khnanai borok bo siyan gwnangrok bai baksa khe tongnai.

³² Phrwngmungno sak nang ya wngnairok bórok sak-sakno se sak nang ya wngma klai-o, tamo khe khoraijakmano khunju kannairok khe simung se mano.

³³ Subraiyungno bórom khlaiwi kirima borokno siyan phrwngo tei koinene khe bórom tubu-o.