PHRWNGMUNG 14 - Kok Borok (Re-edited) Bible (BSI)

¹ Bwrwini elem bai se núkhung songchajago tei bwrwi butua khe baithangni yak bai núkhung swbai-o.

² Lama kepleng tẃi himnai borok bo Subraiyungno kirijago, tamo khe lama kokoi-mokoi tẃi himnai borok khe bono sak se nangjak ya.

³ Butuarokni khukni kókrok le bórok swprakjakna lama se, tamo khe siyan gwnangrokni kókrok khe bórokno se mwthango.

⁴ Musuk chwla kwrwi wng thani khe aro maibo kwrwino wngo; musukrokni phan bai se mai kwbáng mano.

⁵ Kubui sakki rwnairok khe tatal kók sa ya, tamo khe tatal sakkirok khe kók tatal mángno sa-o.

⁶ Buini hamya sanairok nang-nung ya khe se elemno naitugo, tamo khe Buchinairokni bagwi le siyan le kwlai se.

⁷ Butua bai ta tong di, tamni hwn ba nwng bini thani mungsa simungni kókrok man glak.

⁸ Simung se siyan kwrwngno buro thángna tháng ya lama phunugo, tamo khe butua borokni butua tongmungrok khe bono lama koró rw-o.

⁹ Butua borok khe cha yani yapharmung yapharnaino thesra kari-o tamo khe bórok sói khe Kaitor bai khá súkjago.

¹⁰ Bwkha dukhu nangjak bwkha se bini dukhuno saui mano, khoroksa borokni tongthokma tei khoroksa manwi man ya.

¹¹ Borok hamyarokni nok khe swbaijaknai, phiya ba borok sóini nok khe hamchanai.

¹² Kaisa lama bororokni mokolo sói hai, tamo khe abo thwilamo se sógwi-o.

¹³ Uase-uareng wngjak phano bisingo khe bwkha thwijak se, tongthokni páimung le bwkha thwimung se.

¹⁴ Borok hamyarok bo bini samung tangma tẃi’-no mannai tei borok kaham khe bini samung kahamrok tangma tẃi’-no mannai.

¹⁵ Butua khe bebaknono poito khlai-o, phiya siyan gwnangrok khe bebakni yaprirokno naichomo.

¹⁶ Siyan gwnang khe kiriui hamyani uslu-o, tamo khe butua khe sak-sakno belai khe sijak tirwi sak nang ya wngo.

¹⁷ Thamchi kutungrok khe samung butua tango tei siyan kwrwngrok khe bwkha logo

¹⁸ Siyan kwrwi bororok bórokni butuani manna tongma tẃi’-no mano tamo khe siyan gwnangrok khe rwngmungno se sokat khe mano.

¹⁹ Borok hamyarok borok kahamrokno ma khulumnai tei borok hamyarok khe borok kahamrokni nok duglamrogo se ma bírnai.

²⁰ Nok ari bororok suda bigrano khe hamjak ya, tamo khe gwnangsani le bayap kwbángma tongo.

²¹ Nok arini borokno sak nangjak ya wngnairok khe sumsok gwnang, tamo khe bigrarokno khairoknai borok khe hamchajak.

²² Buino hamya khlaina chapnairok bórok lama korójak ya da? phiya buini kaham chapnairok khe poito chájaknai tei bórom mannai.

²³ Bebak kolomtwi khiklaima’-ono manmung kaham tongo, tamo khe kók simi hwn khe le bigra se khlainai.

²⁴ Elem se siyan gwnangrokni bagwi bórokni motok tei siyan kwrwirokni khe butua tongmung se bórokni kotokni khumtrang.

²⁵ Kók kubui sachrunai borok khe mwthango, tamo khe tatal sanai le ba simi se bandi-o.

²⁶ Subraiyungno kirimani se bwkha rakmung phai-o tei bórokni bwsa-bẃtẃirokno tongthai tongo.

²⁷ Subraiyungno kirima wng kha langmani twimuk abo bono butharnai uaraini yakni phiyógo.

²⁸ Borok bángma se habugrani chẃngsacha; borok kwrwi khe bini tẃiphangrok komoro.

²⁹ Doui joli ya borok khe siyan gwnang, tamo khe thamchi kutungrok khe butua hwnwi se sijago.

³⁰ Kwchang kwchang bwkha khe sakno kaham khe tono, tamo khe músúmung khe bekreng sok rw-o.

³¹ Bigrarokno kusupnairok bo bórokni snamnaisano se thesra karima klai-o, tamo khe khairoknai borok khe Kaitorno se bórom khlai-o.

³² Borok hamya sakni samung hamyani bagwi khiklaijago, tamo khe borok kahamrok khe bórok sama tẃi khe tongmani bagwi katimung mano.

³³ Siyan gwnangrokni bwkha-o khe elem tongo, tamo khe butuarokni bwkha le abono mungsabo si ya.

³⁴ Sói khe tongnai khe dophano kuchugo tisa-o tei sumsok gwnangrok khe dophano lachimasingcha-o khiklai-o.

³⁵ Siyan bai khe samung tangnai seleng khe habugra bai naijago tei lachimasingcha samung tangnaino khe bo bai jolijago.