PHRWNGMUNG 13 - Kok Borok (Re-edited) Bible (BSI)

¹ Siyan gwnang bwsa bupha phrwngmano khna-o, tamo khe hamya sanai borok khe khoraimano khunju kan ya.

² Bórok sakni khukni kók sama tẃi’-no bwthái kahamrok ma chá-o tamo khe bórok thentarokni muchungmarok le hamyarok simi se bandinairok khe uálaimungrokno se hamjago.

³ Khúk narwgwi kók sanai borok le sakni langmano se mwthango; búkhúk bwklap kwrwirok khe komormung se tubu-o.

⁴ Selersa manna le belai khe muchungjago hai phano man ya, yang kwsrang khe bini naima tẃi’-no mannai.

⁵ Borok kahamrok kók tatalno naislerjago, tamo khe borok hamyarok khe lachimasingcha samung tango.

⁶ Tongmung sói, abo borok kahamrokno kati rw-o tamo khe tongmung hamya khe sumsok gwnangrokno gaija rw-o.

⁷ Baksa borok bigra twtwi se gwnang hai khe phunuksa tiro; yang baksa kheba belai khe gwnang twtwi se bigra hai khe phunugo.

⁸ Gwnangsa bo bini rang bai se kwthang tongo tamo khe kwrwisano le khoroksa phano sikiri-sokoro khlai ya.

⁹ Kaitorno kirinairokni chati khe kwchẃng khe chẃngo tamo khe borok hamyarokni chati khe thwiwi thángo.

¹⁰ Kung chukma le uálaimung se tubu-o, tamo khe kókbiti khnanairok khe siyan gwnang.

¹¹ Kwlaisa khe manmani rang-rí khe kwlaisa kheno kwmanai, tamo khe twrwk-twrwk khe ajimani khe abo erwi kwbáng wngnai.

¹² Khatungmarokno manna ler khe bwkha thwi-o, tamo khe muchungma manwi manma khe langmani buphang hai.

¹³ Kók khna ya borok sakni bagwi komormung tubu-o, dagimungno khnanai khe sokat mannai.

¹⁴ Siyan kwrwngrokni phrwngma khe langmani twimuk, abo bono butharnai khẃirokni phiyóknai.

¹⁵ Siyan tẃinai bórom khlaijago tamo khe poito khlai yarokni lama khe komorna lama se.

¹⁶ Siyan gwnang borok khe bebago’-no uansugwi samung khlai-o, butuarok khe adlang-pidlang khe samung tango.

¹⁷ Hamya tẃitunsa hwn khe buino jwngjalo khiklai-o, phiya ba kaham tẃitunsa khe tongthokma tubu-o.

¹⁸ Swrwngna nai ya borok khe bigra khanai tei lachi rwjaknai, phiya ba khoraimano khnanai borok khe bórom khlaijaknai.

¹⁹ Khatungma manwino man khe bwswk se bwkha kwchang, tamo khe butua khe lama hamyani kiphilna muchungjak ya.

²⁰ Siyan gwnangrok bai tongnai khe siyan kwrwng wngo, tamo khe butuarok bai bayap kha khe a borokni hamya se wngo.

²¹ Sumsok gwnangrokni uklogo khe hamya rwktharo, phiya ba borok sóirok khe hamkrai sokat se mano.

²² Borok kahamrok khe sukba-sabarokni bagwi rang-rí klangwi thángo tamo khe borok hamyarokni rang-rí khe borok sóirokni banta se khatijago.

²³ Bigrarokni bari-o mai kwbángma wngwi mano, tamo khe buj tẃi yani bagwi abo sekprojago.

²⁴ Bwsano swprak ya hwn khe bo bwsarokno hamjakma klai ya, tamo khe bórokno hamjaknairok khe kók khnanai khlaina bagwi khorainai.

²⁵ Borok sóirok ok kochomwi ma chá-o tei borok hamyarok khe ok khui phlai máng ma tongo.