PHRWNGMUNG 11 - Kok Borok (Re-edited) Bible (BSI)

¹ Tatal, cha ya khe rwtajaknai bai bandimano Subraiyung naislerjago tei sói khe rwtamano khe bo hamjago.

² Kung chukmung phai khe lachimungbo phai-o, tamo khe koinene khe tongwi siyan kwrwng wngo.

³ Borok kahamrokni sói khe tongma se bórokno lama phunugo, tamo khe borok hamyarokni tongmung bejua khe bórokno sokomoro.

⁴ Rang-rírok nini jora hamya phuru-o mungsa chúk ya, tamo khe sói khe tongma ma thwinani yakni phiyógo.

⁵ Borok kahamrok sói khe tongma bini lamano kepleng khlai-o, tamo khe borok hamyarok khe bórokni samung hamyarokni bagwi báikhrubwi klai-o.

⁶ Sói khe tongma se borok kahamrokno mwthango, tamo khe buini bagwi uarai chaknairok bórokni a uarai’-ono klainai.

⁷ Thwi kheno borok hamyani khatungma pái thángo, Kaitorno kiri ya bororokni khatungma khe ahai’-no páinai.

⁸ Borok sóirok khe digi-sigini kati rwjaknai, phiya borok hamyarok le aro klainai.

⁹ Kaitorno kiri ya bororok bórokni nok-arirokno sokomoro, tamo khe borok kahamrokni elem khe mwthangnai.

¹⁰ Borok sóirokni kaham wng khe kamiyungo tongthok lai-o; borok hamyarok gaija khe bororok chirigwi rwchap lai-o.

¹¹ Borok sóirok hamari man khe kamiyung kuchugo kasa-o, tamo khe borok hamyarokni kók bai khe kwlwgo.

¹² Nok arini borokno sak nang ya wngnai khe butua se, tamo khe siyan gwnang khe siring siring khe tongo.

¹³ Buino tentaiwi kók sanairok khe kók huiwi tongwi man ya, tamo khe kók narwgwi tongnairok khe kók huijaknairokno huiwi tono.

¹⁴ Tẃithernai kwrwi khe dopharok kwlwgwi pái-o, phiya kókbiti rwnai kwbáng tong khe, aro khom-khom khe katimung mano.

¹⁵ Sini ya borokni lakaino nwng suna hwnwi kók rw khe birmano klainai, nwng aro kubul ya khe se ham kugo.

¹⁶ Tongmung kaham tongnai bwrwi khe bórom khlaijago, tamo khe tongmung kahamno sak nangjak ya bwrwi khe lachimung mano. Selerjak khe bigra wngo, tamo khe káphranairok khe gwnang wngo.

¹⁷ Khairoknai borok saknino kaham khlai-o, tamo khe khairokma kwrwi borok khe sak-sakni se hamya khlai-o.

¹⁸ Borok hamya mungsa ajiui se man ya, tamo khe borok sóirok khe sói sokatno mano.

¹⁹ Kubuino tẃi kwrak khe tongnai, langma mannai tei hamyani uklogo thángnai khe sakno butharnai.

²⁰ Bwkha sitrarokno Subraiyung naislerjago, tamo khe srai-srai khe tongnairokno tẃi bo bwkha srangjago.

²¹ Borok hamyarok le majra man yaui tháng glak, o kókno kaham khe si di, tamo khe borok kahamrok khe yóknai.

²² Mungsa kaham-hamya si ya bwrwi naithok le uakni bukungo bailik kanjak hai se.

²³ Borok kahamrok naima khe kaham máng simi se wngo; tamo khe borok hamyarok naima bai le thamchi simi se tubu-o.

²⁴ Baksa bororok buino yak kuar khe rw-o, ahai phano se bórok gwnang kha-o; baksa khebo belai yak khochor, ahai phano bórok biyal se kak ya.

²⁵ Bwkha kuar khe yapharnai borok hamcha-o tei twi rwnai borok khe twi rwjak phinai.

²⁶ Chámung rúngwi simi tonnairokno lukurok swrai-o tei rúng yaui buino phalnairokno khe lukurok hamari rw-o.

²⁷ Hamkrai nainairok khe bui bai bórom khlaijago, tamo khe hamya nainairok khe hamyano mano.

²⁸ Sakni rang-rí-o bwkha beranai borok bo bwlái mwran tẃi mwranwi thángnai, tamo khe borok sóirok khe bwláirok khwrang tẃi khwrangsanai.

²⁹ Nokni bororokni busu wngnaini le nokbar se man banta wngnai tei butuarok khe siyan gwnangrokni seleng wngnai.

³⁰ Borok kahamrokni bwthái le langmani buphang se, tamo khe thamchi kutungrok khe langma se chokhrai rw-o.

³¹ Tumung borok kahamrok o ha-o bórokni manthaino mano hwn khe borok hamya sumsok gwnangrok tei bwswk se kwbáng khe manno!