PHILIPI 4 - Kok Borok (Re-edited) Bible (BSI)

Tongmung phrwngmani

¹ Hakhe takhukrok norok bwswk se ani khájani gwja! Ang norokno bwswk se khá thángwi tong! Norok ano bwswk se tongthok rw! Norokno tẃiwi ang bwswk se kung chuk! Khájani takhukrok, Subrai bai tongwi omo hai khe kwrak khe bachaui tong di.

² Udai bai Suntuki, ang norokno koi ja-o, Subraini bising tẃi kwtha lai di.

³ Ani logisong kaham, ang nai-o nwngbo a bwrwirokno chuba di, tamni hwn khe Langma Bijabo mung tisajaknai Klemen, phiya ang bai baksa tei samung khlainairok bai bórokbo belai khe samung khlai kha.

⁴ Subraino tẃiwi norok tongthok máng tong di. Ang o kók haino hai sa-o, tongthok di.

⁵ Bebak baino hama logwi tong di. Subrai dakti’-no phainai.

⁶ Mungsani bagwi phano ta uana di, tamo khe norok bebago’-no suri sanwi hambai rwui nangma manwino Kaitorni thani san di.

⁷ Hakhe norok Khristo Jisu bai thansa wngma bising tẃi Kaitor khá kwchang rwmani abo norokni khápangno kaham narwknai, bororok abono kolsa phano romwi man ya.

⁸ Takhukrok, páinanogo ang o kók sa-o, kaham hwnjaknani bai baikhenejaknano bwkha-o ton di; kubuino, chúknano, sóino, kwtharno, naithokno, khairoknano bwkha-o ton di.

⁹ Ang sa thanibo, ang samung khlai thanibo norok rwngwi manmano samungo phnang di. Hakhe chwngno khá kwchang rwnai Kaitor norok bai tong anw.

Pol chubajagwi hambai rwmani

¹⁰ Subrai tẃi ang bwswk se tongthok! Aswk balogwi se ulo norok ano khá sukmano phunuknani lama man phai kha. Norok ano khá súk ya hwnwi ang o kók sa ya, tamo khe norok phunuknani lama man ya.

¹¹ Ang biyalo klaiwi tong kha hwnwi o kók sama ya, ang bebago’-no khá kochomwi tongna srwng kha.

¹² Biyalo klai khe bahai tamo abo ang saui mano, gwnang khe bahai tamo abobo saui mano. Je thani phano je phuru phano, ang ok kupulung phano wng thung, ok bukcha phano wng thung, belai kwbáng phano tong thung, belai kisa phano tong thung, ang khá kochomwi tongna srwng kha.

¹³ Khristo ano phan rwma bai ang bebago’-no soiwi mano.

¹⁴ Tamo khe ang tekto man phuru ano chubaui norok belai kaham’-no khlai kha.

¹⁵ Norok Philipirok, norok’-no kaham khe saui mano puila puila ang Kothoma Kaham pír phuru ang Makidoniani tháng bai khe norok simi se ano chubanai motha, ang man thani-obo, ang rw thani-obo norok simi se ang bai baksa tongnai.

¹⁶ Norok uáisa ya, ang Thesaloniki-o biyalo klaiwi tong phuru ano uáisa hwn thani uáinwi chubahor kha.

¹⁷ Ang katswi rwjakna nai ya, norokni isabo teibo rwjak thung hwnwi se ang nai-o.

¹⁸ Hakhe norok ano rwmani iko abo jotono tongo kwbángmani slái se omo belai wng kha! Norokni bebak rwmungno Epaphrodit ani thani tubu kha ba tabuk ani nangmani ang bebak’-no man kha. Norok ano rwmani abo Kaitorni thani motom kwtẃi barokma hai, bini thani ratharma hai, abo bo bai yabo yachakjaknai, habo hamjaknai.

¹⁹ Hakhe ani Kaitor Khristo Jisuni bising tẃi belai gwnang wngma tẃi bo norokni nangma jora tẃi rwnai.

²⁰ Chini Apha Kaitor mol brúm brúm chẃngsacha wng thung. Amen.

Kók páithak

²¹ Khristo Jisuni borok wngwi bebak Kaitorni bororokni thani ang khápang rohoro. Oro ang bai baksa tongnai takhukrokbo norokno khápang rohoro.

²² Oroni Kaitorni bebak bororok norokno khápang rohoro, aboni bere se bugra kotorni nokni bororok khápang rohoro.

²³ Subrai Jisu Khristo norokno khairok thung.