PHILIPI 3 - Kok Borok (Re-edited) Bible (BSI)

Sói kaham hwnmani abo tamo?

¹ Ani takhukrok, páinanogo ang o kók sa-o, Subraino tẃiwi tongthok lai di. A kókno kók swinani ang bwkha tekto nangjak ya, phiya omo norokni kaham se wng phinai.

² Samung hamya khlainairok bai hus khe tong di, bahan ranai a sẃirok bai hus khe tong di.

³ Chwng se kubuini sakur rajakrok, a bororok ya, tamni hwn khe chwng Kaitorno bini Phola bai suri-o, phiya Khristo Jisu bai tongwi tongthok lai-o. Saka sakani samungno chwng poito khlai ya.

⁴ Hakhe ba saka sakani samungno ang poito khlaiwi man kha mun. Tumungno khoroksa swk saka sakani samungno poito khlaiwi mano hwn khe ang se teibo man kugo.

⁵ Nokha salcharni chwrai phuru’-no ang sakur rajak kha. Dopha hwn khe ang Israil, bosong hwn khe Benjamin, thẃi hwn khe sói Hibru thẃi. Kerong rákhokma kók hwn khe ang Pharisai,

⁶ hakhe belai srangma bai ang mothano sátok kha. Kerong rákhogwi kaham wngmani kók hwn khe ani majra kwrwi.

⁷ Tamo khe ang aswk manmarokno Khristoni bagwi tabuk kwma kha hwnwi tong kha.

^8-9 Abórok simi ya, bebakni slái teibo belai kaham ani Subrai Khristo Jisuno saui manna bagwi ang joto manwi’-no kwma súk kha hwnwi tong kha. Bini bagwi ang joto manwino khibi kha; ang Khristono manna tẃi khe, phiya bo bai thansa wng súgwi manna tẃi khe abórok bebakno laisrwi bosrwi hwnwi khá romwi tong kha. Kerong rákhokma bai kaham wng kha ang abo tẃi buya. Khristono poito khlaima bising tẃi ang tabuk kaham hwnjak kha, omo Kaitorni aroni phaima se, phiya omoni yaphango hwn khe poito se.

¹⁰ Ang naima wng kha abo Khristono saui manna bagwi se, bo thangwi bachamani a phanno saui manna bagwi se; bo bai baksa sátokjakna bagwi se, thwi thanibo bo hai wngna bagwi se;

¹¹ ang sakbo mwthangwi tisajakna hwnwi khatungwi ang abo hai wngna nai-o.

Naima manwino manna nai di

¹² Ang omono man bai khe eba ang sói wng súk kha ang abo tẃi sa ya kho. Khristo Jisu mungsani bagwi ano bini borok khlai kha, abono manẃina hwnwi ang khachigwi tongo.

¹³ Abo hai phano takhukrok, ang abono kubui’-no man kha hwnwi khá ka ya; tamo khe ang tamo khlai hwn ba uklokno pogwi bwskango sógwina bagwi se ang káphra-o.

¹⁴ Sokat manna bagwi ang khachikna nangma jora sógwina hwnwi khachigwi tongo; abo wng kha Kaitorni aro tongna bagwi Khristo Jisu tẃi ringhorma se.

¹⁵ Chini bere poito kwrakrok bebakno abo hai uansuk thai klai-o. Hai phano norokni bere baksa omo hai uansuk ya khe Kaitor omono phunuknai.

¹⁶ Hai phano tabuk phano chwng rákhogwi tongmani abono rwksaui phai di, chwng him lai anw.

¹⁷ Takhukrok, norok ano srwng máng tong di. Chwng norokno tongmung kaham phunuk kha, abo baino abo hai khe tongnairokno naisik di.

¹⁸ Ang swkang’-no norokno o kók kwbángma sa kha, tabuk khe ang omono haino hai kap twtwi sa phiro: tongmungni jarwi Khristoni krusni kena ari wng kha abo tẃi borok kwbángma se.

¹⁹ Bórok gaijana kasu kha, tamni hwn khe sak muchungmani abo se bórokni mwtai, lachimasingcha samungno tẃiwi se bórok kung chugo, phiya o swngcharni kók simi se bórok uansugo.

²⁰ Chwng khe chuknohani borok wng kha, hakhe chwngno mwthangnai Subrai Jisu Khristo chuknohani bu phuru phaino abono chwng naisingwi tongo.

²¹ Chini o thwiblang bwsak kebelno bo sláiwi bini chẃngsajak bwsak hai khe snamnai; bo bini yago bebak’-no tubumani a phan bai omono khlainai.