NEHEMIA 9 - Kok Borok (Re-edited) Bible (BSI)

Bororok sakni sumsok lon laimani

¹ Israilni bororok a talni nokha sal nwichibrwini salo chá lai ya-nung lai ya khe, rí kichik kan laiwi, bokhorogo ha phulwi kuthum lai kha.

² Israilrok buini hani bororok bai kagwi bacha lai kha, hakhe bórokni tei bórokni chuchusongni sumsokno gosi lai kha.

³ Bórok tongmani’-ono bacha lai kha tei dam tham jora bórokni Subraiyung Kaitorni kerong pori laiwi tei damtham bórok sumsok gosi laiwi bórokni Subraiyung Kaitorno khulum lai kha.

⁴ Lebirokni bagwi kaisa háyá tongo, aro Jesua, Bani, Kadmiel, Sebania, Buni, Serebia, Bani tei Chenani bacha laijak. Bórok Subraiyung Kaitorni thani khorang kotor khe suri lai kha.

⁵ Hakhe Lebirok, Jesua, Kadmiel, Bani, Hasabnia Serebia, Hodia, Sebania tei Pethahia hai hwnwi sa kha, “Bacha di tei norokni Subraiyung Kaitorno lob di, Bono mol brúm brúm lob di. Bebak Bini chẃngsacha mungno lob bai si di, abo bebak hamari bai lobmungni slái kuchuk kuk wng thung.”

Sumsok gosi laiwi suri laimani

⁶ Hakhe Israilni bororok omo hai khe suri lai kha: “Subraiyung, nwng khoroksa se Subraiyung; nwng nokhayungrok bai nokhani athukirirokno snam kha; nwng ha bai twijlang tei bebak aro tongmarokno snam kha; nwng bebakno langma rw kha, bebak chukhani suarirok nono khulum kha.

⁷ Nwng se Subraiyung Kaitor, nwng Abramno saiwi na kha; Kolodiarokni ha Ur kamini bono tikhlai tubu kha; tei bono Abraham hwnwi nwng’-no mung sláiwi rw kha.

⁸ Bo le Nini kók narwknai Nwng abono nuk kha; bo bai aboni swmai tang lai kha, nwng bono Kanansa, Hitisa, Amorsa, Peressa, Jebussa tei Girgasrokni hano rwnani hwnwi kók rw kha; tamo khe nwng sói tongma ba nini kók narwgo.

⁹ “Chini chuchusong ha Ijibo tekto manmano nwng nuk kha; Twijlang kwchago bórok chirikmano nwng khna kha.

¹⁰ Nwng nini kwmamsingcha samungno Pharaoni tẃiphangrokno, tei bebak bini hani bororokni thani phunuk kha; Tamni hwn ba bórok bwswk nini bororokno sátok kha nwng saui mano, hakhe tini tongma hai nini mungno kuchuk khlai kha.

¹¹ Bórokni bwskango nwng twijlangno swkak kha, hakhe bórok abo tẃi khe ha kwran saka tẃi himwi lái kha. Twi kotorma bisingo holong dulsa khitarma hai bórokno rwktharnairokno tẃiwi kuthukma-o khiklai kha.

¹² Salo chumui bodol bai; Tei horo homchang bai bórokno lama phunugui tẃi-o.

¹³ Nwng Sinai hachugo phai khlaiwi; chukhani simi bórok bai kók sakhlaiwi rw kha bórokno kaham dagima bai kerong phrwngma.

¹⁴ Nini seleng Musini yak tẃi nwng Kwthar Sabatno tei kerong bai dagimarokno bórokno si rwui rw kha.

¹⁵ “Bórok mai ok khui phuru nwng bórokno chukhani chámung rw kha; tei bórok twi kang phuru khe bórokno holongni twimuk rw kha, phiya nwng bórokno ha rwnani hwnwi kók rwmani hano thángwi na lai si di hwnwi sa kha.

¹⁶ “Tamo khe chini chuchusong kung chuk kha nini dagimungrokno rákhok yaui; gwdna kwrak khlai kha.

¹⁷ Bórok nini kók nanano gosi li ya, nwng aswk bebak kwmamsingcha samung khlaimarokno pogwi tháng bai kha; tei gwdna kwrak khlai bwkha-o Ijibo kiphilwi thángwi seleng khatina chong lai kha; tamo khe nwng le nakarna tiyar wngjak; khairokma kupulung, hamjaknai tei doui joli ya, khairokma kotor tei nwng bórokno khibi li ya.

¹⁸ Sakni bagwi musuk bwsa masa tak laiwi; ‘Omo wng kha norokni Kaitor, norokno ha Ijipni kariui tubunaisa,’ hwnwi sa laiwi mung hamya khlai kha.

¹⁹ Nini khairokma tongmani bai bórokno hasing panthoro yakar li ya; Nor li ya chumui tei homchang lama phunuknai hopung, sapung bórokno.

²⁰ Nini bwkha kaham bai bórokno phrwngwi rw kha; bórokno ok kochom rwui chánani manna, nungnani twi rw kha.

²¹ Hasing hapharo mungsani biyal kwrwi khe nokha bisi brwichi jora bórokno mwrwk kha; Yakung robon yaui tei rírok chamsor wng li ya khe kati rw kha.

²² “Nwng bórokno ha bai dophano yaphar kha; achuk rw kha bebak bising-besero, hakhe bórok habugra Sihonni ha Hesbon tei habugra Ogni ha Basanno segwi na kha.

²³ Nokhani athukirirok bai baksa rw kha bwsa ernani; Tẃither kha nwng bórokni chuchusongni thani swmai tangmani hano rwnani.

²⁴ Hakhe bosongrok thángwi na lai kha; bórokni bwskango a ha-o tongnai Kanansarokno mechen kha, nwng yapharwi rw kha nini bororokni thani; bebak a hani bororok bai habugrarokno, bórokni muchung tẃi khlainani.

²⁵ Bórok kamiyung kwrakrok, ha kaham, nok kupulung rang-rí, twikhor khurjakno, olib buphangrok, bwthái buphangrok tei angur barirok na lai kha. Bórok muchung tẃi chá lai kha, londa wng lai kha. tei nini kaham bai tongthok lai kha.

²⁶ “Phiya ba kók khna li ya, kebeng kha nini bororokno; khlai kha nini kerongno bórokni uklogo, buthar kha bórok nini diyarirokno; Nini thani kiphil di hwnwi koboknairokno, abo tẃi khe sa lai kha hamya nini mungno.

²⁷ Hakhe sátok rw kha nwng bórokno arirokni yago yapharwi; tekto man phuru ringmani khorang khna kha nwng chukha-o tongterwi, chongwi rw kha khoroksa oja khairogwi; arirokni yakni mwthangna bagwi.

²⁸ Sumsok khlai phi-o bórok haino hai kwchang kwchangni jora-o; yapharwi rw phi-o nwng bórokni kena arirokni yago, Tamo khe bwkha kiphilwi nono ring phi khe khna kha nwng chukha-o tongterwi abo hai khe mwthang mwthang kha bórokno khairogwi.

²⁹ Khorai kha nwng bórokno nini kerong o tubu na bagwi; khna li ya nini dagimarokno kung chuk baiwi. Kók khnamani bai kwthang tongwi mano tamo khe kók khna li ya bórokni bwkhano rak rwui.

³⁰ Bisi kwbángma nwng bwkha logwi tong kha, nini phola bai diyarirokni tẃi bórokno khorai kha tamo khe khunju se kaichom li ya; abo bai bórokno kubun dophano yaphar kha.

³¹ Nwng wng kha Kaitor khairoknai tei mayabo gwnang; nwng bórokno yakar li ya, tamni hwn ba nini khairokma belai kwbáng.

³² “O chini Kaitor, nwng bwswk se Kotor, kwmamsingcha tei phan gwnang, nwng nini swmai tangmano kók narwgo, Asiriyani habugra chwngno sátok phuruni simi, tini jora chwng bwswk se sátokma man kha; chini habugrarok, tẃiphangrok, ochairok, tei diyarirok, chini chuchusong, tei bebak bororok, bwswk se sátokma man bai kha.

³³ Chini saka-o omo hairok klai phano, nwng le sói se; chwng samung hamya khlai phano, nwng wng kha kók narwknai.

³⁴ Chini chuchusong, chini habugrarok, chini tẃiphangrok, tei ochairok nini kerong tẃi tong li ya; nwng bórokno dagimarok bai khoraimano khna li ya.

³⁵ Baithangni habugrani molo bórok nwng bai kwbángma hamari man kha hai phano bórok nono mon li ya gwja tei bórok himmani lama hamyanibo kiphil li ya;

³⁶ nai di, chini chuchusongno rwmani ha, aboni bwtháino tei kaham manwino chá si di, nung si di, hwnmani ha-o se, tini chwng seleng wng kha.

³⁷ Chini sumsokni bagwi, chini saka-o habugra songmarokni thani se aswk kaham manwirok klai si-o. Bórok muchung tẃi’-no chwngno tei chini mal-matarokno khlai si-o, chwng khe belai tong kesep khe se ma tong si-o.”

Bororok kók baksa wngwi bumung swi laimani

³⁸ Abo hairok wngma bagwi chwng, Israilni bororok kók baksa khe swmai tang laiwi swi lai kha tei chini tẃiphangrok, chini Lebirok, chini ochairok, bórokno sil bu lai kha.