NEHEMIA 2 - Kok Borok (Re-edited) Bible (BSI)

Nehemia Jerusalemo thángmani

¹ Artasarses habugra chámani bisik nwichini Nisan talo bini bwskango chuak tubu-ui phai kha, ang chuak naui habugrano rw kha. Ang swkang uáisa phano mwkhang kosom wng ya kho,

² hakhe habugra ano hai hwnwi sẃng kha, “Tamo wngwi nini mwkhang aswk kosom khe nuk sla? Nwng lum yana bla? Abo mungsa buya, bwkha-o dukhu nangma se.” Hakhe ang belai kiri kha.

³ Ang habugrano hai hwnwi sa kha, “Habugra mol brúm brúm kwthang tong thung.” Chuchusong phobjakmani kamiyung báiwi klaiwi tei aboni duglamrok hór bai sógwi sokomorjak bai twtwi bahai ani mwkhang som ya wngnai?

⁴ Hakhe habugra ano, “Nwng tamo nai?” hwnwi sa kha. Ang chukhani Kaitorni thani suri san kha.

⁵ Hakhe ang habugrano hai hwnwi sa kha, “Tumungno habugra lon khe tei nini o selengno bwkha phurjak khe ano ani chuchusong phobjakmani ha Judani kamiyungo rohor di, hakhe ang abono tisa phirwi man anw.”

⁶ Hakhe habugra ano hai hwnwi sa kha, (gana-o Isiribo achukjak) “Nwng bwswk kwdwk aro tongwinai tei buphuru nwng kiphilwi mannai?” Hakhe habugra ano rohorna lon kha, hakhe ang bono jora chongwi ma rw kha.

⁷ Ang habugrano hai hwnwi sa phi kha, “Habugrani khá phur khe ba ani yak tẃi khe twimani saltháng amchoirokni bubagrarokno kóktun swihorwi rohor di hakhe ang Juda jora thángwi man anw;

⁸ phiya habugrani bolong mwrwknai Asapnobo kóktun swihor di hakhe bo ano noktharni bagwi tei kamiyung chokdeualni bagwi tei ang tongna nokni bagwi buphang rwnani.” Hakhe ang sanmani bebakno habugra ano rw kha, tamni hwn ba Kaitor ani logi-o tongo.

⁹ Hakhe habugra ani logi-o kisa sengkrak tẃiphangrokno tei korai kasanai sengkrakrokno rohor kha, ang twimani saltháng amchoi-o sók phai khe, habugrani kóktunrokno aroni bubagrarokno rw kha.

¹⁰ Tamo khe kami kotor Bethel Horonsa Sanbalat tei Ammon amchoini khoroksa tẃiphang Tobia hwnwi borok khoroksa Israil bororokni hamkraini bagwi samung khlainani phaiwi sók phai kha hwnwi khna khe belai chajak ya wng lai kha.

¹¹ Hakhe ang Jerusalemo tháng kha tei aro saltham jora tongwi kha.

¹² Hakhe ang horo bachaui ani logi borok kisa tlangwi tháng kha, ani Kaitor Jerusalemni bagwi khlai di hwnwi ani khá-o samano khoroksano phano sa li ya. Ang kasamani koraichirka masano karwi chini logi-o tei mungsa malrok kwrwi.

¹³ Ang horo’-no harung duglamni simi ongkhorwi chibukni twikhor bwkhak tei khi duglam jora tháng kha tei ang Jerusalem chokdeual swbaijak bai aboni duglamrok hór bai sógwi sokomorjakno kaham khe naichom kha.

¹⁴ Aphuru khe ang salka phaising twimuk duglamo tei habugrani pukhiri-o tháng kha, aro ang kasamani Koraichirka láinani suda bwlam kwrwi.

¹⁵ Hakhe ang horo’-no harungo thángwi chokdeual naiwi kha tei ang uphilwi harungni duglam tẃi habwi kiphilwi phai kha.

¹⁶ Tẃiphangrok ang biyango tháng tei tamo khlai chongwi man li ya, tamni hwn ba ang ani pal Judairokno, ochairokno, ojarokno, tẃiphangrokno tei samung tangchrunai kebono sa ya kho.

¹⁷ Hakhe ang bórokno hai hwnwi sa kha, “Norok nai di, chwng bwswk tekto khe ma tong, tamni hwn ba Jerusalem baiwi klai tong kha tei aboni duglam bo sokomorjak kha, phai di chwng Jerusalemni chokdeual snam lai phir anw, hakhe tei omo hai khe tekto manẃi tongna nang glak.”

¹⁸ Hakhe ang bórokno Kaitor ani logi tongwi bahai khe chuba kha tei habugra ano samarokno saui khna rw kha. Bórok, “Phai di tho, tang lai si anw” hwnwi hwn lai kha, phiya bórok phan thon laiwi samung kaham tangnani tiyar wng lai kha.

¹⁹ Tamo khe Horonsa Sanbalat, Ammonsa Tobia, Arabni Gesem abono khna khe chwngno thesra khlaiwi mwnwi laiwi hai hwnwi sa kha, “Norok tamo khlai lai tong? Norok habugrano kebengwi de bachana nai?”

²⁰ Hakhe ang bórokno hai hwnwi sa kha, “Chukhani chini Kaitor chwngno hamcha rwnai. Chwng bini selengrok bachaui samung tang sinai. Phiya ba Jerusalemo norokni mungsa banta kwrwi, aro norokni sanjaknai bo mungsabo kwrwi.”