NAHUM 3 - Kok Borok (Re-edited) Bible (BSI)

¹ Borok butharnai kamiyung, tatal sanai, sekma manwi-khwnwi bai kupulung tanthar-súthar thák ya! nwng bwswk se hamya sitrano!

² Chemuksani khorang tei gorgorini khorang, tei korai khachikma tei malkhungni khorang!

³ Korai kasanairok kasaui khabrumjak, seng jilik jilik, koslu sal kokjak, kwthwi burung burung kupulung, sengkrakrokni mang kwthwi burung burung, abórok kaisa tei kaisa bai se khu laiwi tong si-o!

⁴ Abórok bebakno a sak phalnaijwk uaijaui aswk kwbángma sak phal phalmani bagwi se wngo; bo naithokma bai khe belogo tei podrepot kók mwtairokni bugrajwk. Bo uaijaui sak phalwi dopharokno tei kók mwtai bai khe bororokno phán kha.

⁵ Nai di, ang nono kebeng kha, hwnwi kwplaisa Subraiyung sa-o, tei ang nini kanma ríno bumkhang jora khukchanai; hakhe dopharok nini sak lángano nuk thung tei ha gwnangwi’-no nini lachimungno nuk bai thung.

⁶ Ang nini saka-o kosok-kusumrokno khibinai tei nono naislerma bai khe naisiknai, phiya bui bai naisigwi mwnwijaknai khlainai.

⁷ Nono nuknai bebakno bumkhang uphilnai tei hai hwnwi sanai, Ninobi bái kha; bini bagwi sabo bwkha khamnai? buro se ang bini bwkha methepnaino rutuknai?

⁸ Nwng ba tamo No-amonni slái kaham da? Abo Nil twima rukungo khe tei bini babaibrwi-o khe twi bai kitingjak. Twima khe aboni kati rwui tonnai chokdeual hai.

⁹ Ithiopia khe bini phan tongmani tei ha Ijip bo phan kwbángma rwui tongmani; Put bai Libyasarokbo bini bayap tongmani.

¹⁰ Hai phano bini bororok buini ha-o khaui tlangjak bái kha, bórokni absa kwlwirokno bebak lamprarogo búpháiwi butharjak kha; bórokni borok kotorrok pat karwi naijak bái kha tei bórokni phan gwnang bororok khe sorduk bai khajak bái kha.

¹¹ Nwng mabo ma pheknai tei arirokni yakni yókna bagwi ma huijaknai; nwng nini kena arirokni yakni yókna bagwi bokhorok bom thai ma rutuknai.

¹² Nini bebak nok kwrakrok khwichang bwthái kumun gwnang buphangrok hai, tumung a buphang jangrijak khe chánaini búkhúgo pulumsa ma klainai.

¹³ Nini sengkrakrok norokni bisingo le bwrwirok hai se. Nini hani duglambo kena arirokni bagwi kuarma khe phiyokjak; tei nini dugarni bengkirokbo hór bai sókjak bái kha.

¹⁴ Sekjakna jorani bagwi nwng twi khógwi ton di, nini chobani nok kwrakrokno rak rw di; it snamnani bagwi kádul di tei it takjaknai takkhok snam di!

¹⁵ Aro nono hór mwlagwi páinai; seng bai khe nwng tantharjagwi páinai, tei abo nono sokomornai kúkthora hai khe monogwi páinai. Nwng kúkthora hai khe er di, kukrok hai khe bodol bodol khe norok bángsa di!

¹⁶ Nwng nokhani athukirini slái phano kwbáng khe bepar thwngnai snamwi tisa kha. Kúkthorarok bwkrang phehelsaui birwi tháng bái kha.

¹⁷ Nini tẃiphangrok le kukrok hai tei tangphangrok khebo kuk bodolrok hai, bórok masing kwchangma salo khe chokdeualo báui tongo tei sal kasaui phai khe bórok birsaui tháng bai-o; bórok biyango tháng kha abo khoroksa phano saui man ya.

¹⁸ O Asiriyani habugra, nini mera mwrwknairok thujak máng; tei nini tẃiphangrok khe murumjak máng. Nini bororok hachuk sakarogo piring-poroi khlaijak bai kha, khoroksa phano bórokno thumwi chabwi tubunai kwrwi kha.

¹⁹ Mungsa khe phano nini kwsano ham rwna lama kwrwi kha; nwng belai khe kwsa cha kha. Nini komorma kókno khnanairok bebakno yapha khorop lai kha. Tamni hwn ba nwng hamya khlaimani sabo se manjak ya tong kha?