NAHUM 2 - Kok Borok (Re-edited) Bible (BSI)

Ninobi báimani

¹ Nono oroi-poroi khlainai khoroksa phaisa kha. Nini choba khlaijaknai nok kwrago sengkrakrokno jai khlai di; lamarok mwrwk di; nini phan tong sak phan socha di.

² (Sokomornairok Israilno borok bukcha khlai phano, tei bini angur bwlwngrok sokomorjak phano hai phano Subraiyung tabuk Jakobni se, hakhe Israil bini swkangni chẃngsajak suarno kiphilwi rwnai)

³ Bini phan gwnang sengkrakrokni phuirok khe kwchak, tei chummung kwchak chum laijak, bórok bwtang bwtang khe bacha lai khe bórokni korai malkhungrok hórjlai hai jolo-jolo khe chẃngo; bórokni korairok bársa laijak.

⁴ Bórokni korai malkhungrok lamarogo doui khabrum laijak, bórok kamiyungni lamprarogo tháng-phai khlaiwi tongo; abórok homchangrok hai, nokha philik tẃi khe dojak.

⁵ Tẃiphangrok ringjak bái kha; bórok swkangwi tháng phuru khe thutaiwi klai-o; bórok deual phaising doui thángo, tei kasujaknai manwi thonwi tonjak kha.

⁶ Twimani dugarrok phiyokjak kha, noyung kwlwibra kha.

⁷ Isirini rírok khengwi romwi tlangjak kha, bini selengjwkrok tokthu hai rai-rai kap laijak tei khaklap bu laijak.

⁸ Ninobi khe pukhiri hai, aroni twi rukung báiwi twi kochok khlaiwi tong kha. Bórok “bathak di, bathak di,” hwnwi hwn lai-o tamo khe khoroksa phano uphilwi naisiknai kwrwi.

⁹ Rukphai na di, Rangchak na di! o manwirok tei pái phlai ya, o manwirok bebakno bini rang gola bokhokni morok manwirok.

¹⁰ Komor kha, pái laha, bukcha wng kha! Bwkha bái kha kwlwibraui yáskú bai yáskú tokjak kha, oklep kwlwibra kha, mwkhang somwi tháng kha.

¹¹ Singhorokni hakhor biyang tháng kha, Singho bwsarokni hagurung le buko, bo mui romwi tubumani bini bwsarokno tonmani tei khoroksa bai phano cheklekjakna nang ya khe tongmani, buko abo biyang?

¹² Singho bini bwsarokni banta uátharwi mojomo mui rom kha; bo bini tongma hakhorno uátharjak tei uásikjak muirokni bahan bai supung kha

¹³ Nai di, ang nono kebengjak hwnwi kwplaisa Subraiyung sa-o tei ang nini korai malkhungrokno sógwi páinai, nini singho siklarok seng bai butharjak báinai; tei ang o ha sakani nini muirokno swkwmaui páinai, phiya kók tun phainani khorangno nwng tei khwna glak.