MIKA 6 - Kok Borok (Re-edited) Bible (BSI)

Subraiyung Israilno chajak ya wngmani kók

¹ Subraiyung tamo hwnwi sa khna di: Bacha di, nini tentaimarokno hatháirokno sa di, nini khorangno hachukrokno khna rw si di.

² O hatháirok, o hayungni tong phlainai thonglarok norok Subraiyung chajak ya wngma kókrokno khna di; tamni hwn ba bo bini borok Israilrokno kaisa kók ber kha.

³ “O ani bororok, ang norokni tamo hamya khlai kha ba? Bahai khe ang norokno tekto rw kha ba? Ano sa di!

⁴ Ang norokno ha Ijipni phiyógwi tubu kha tei nono seleng wngwi ma tongnani yakni phiyók kha; tei ang nini thani Musi, Aron tei Miriamno rohor kha.

⁵ O ani bororok, ha Moabni habugra Balak tamo chapmani tei Beorni bwsla Balam bono tamo hwnwi sa kha muitu khlaiwi nai di. Sitimni simi Gilgalni lama tẃi tháng lai phuruni kókno muitu khlaiwi nai di, norokno mwthangna bagwi Subraiyung tamo khlai kha hakhe norok saui man anw.”

Subraiyung tamo nang

⁶ “Ang Subraiyungni bwskango tamono tlangwi thángwi kuchukni Kaitorno khulumnai? Bini thani sógwi yapharna bagwi ang bisi kaisani musuk bwsarok da tubu-ui phainai?

⁷ Tamo Subraiyung ba sai-sai merarok tei sai-sai twima kupulung olibni thok yaphar khe bwkha da phurjakno? Ani cha yani bagwi ang ba tamo ani swkang sakrano da ma yapharnai, ani sumsokni bagwi ani sakni bwtháino da ma yaphar sinai?”

⁸ O borok, bubo khe kaham abo bo nono phunuk kha; Subraiyung nono bujsói gwnang samung tangnani, khairokmungno hamjaknani tei koinene khlaiwi nini Kaitorni kók khnaui tongnano nai ya diba?

⁹ Subraiyung khorang khlaiwi kamiyungo ringhorwi tong kha, nini mungno kirina le siyan gwnang wngmani se. “O dopharok kamiyungni motha bodolrok khna di!

¹⁰ Borok hamyarokni nogo samung hamya bai ajima rang-rí tongmano tei swraimung nangjak rwtajaknai topong tongmano ang po de pokno ba?

¹¹ Rwtajaknai tei sujaknai holongthai bejuano ang soiwi da tongno ba?

¹² Norokni gwnangrok sekpronai gwja; nini bororok tatalrok sa-o, bórokni búkhúkni bwslai bai bandi lai-o.

¹³ Aboni bagwino ang nono swpraknani tei sokomorna cheng kha, tamni hwn ba nwng sumsok khlai kha.

¹⁴ Nwng chá le chá anw, tamo khe ok kochom glak, ok khuiwi’-no tongnai; nwng manwirokno aroni uro tlang anw, hai phano narwgwi man glak tei nwng khatiui narwgwi manmano khe ang choba-o sokomorwi páinai.

¹⁵ Nwng bwchlwi le sar anw tamo khe ma se ma ra glak; nwng olibni thok le phere anw hai phano ma se ma phul glak; nwng angurrok le phere anw tamo khe angur bwtwi se ma nung glak.

¹⁶ Nwng Omrini kerong-raida tẃi tong kha tei Ahabni bosongni bebak tongmungno loi wng kha, nwng bórokni kókbiti naui him kha. Aboni bagwino ang nono sokomornaini tei mwnwiwi thesra karijaknani yapha-o yapharwi rwnai; hakhe nwng ani borok hwnwi bumkhang man ya ma wngnai.”