MIKA 5 - Kok Borok (Re-edited) Bible (BSI)

¹ Nwng tabuk chokdeual bai gerepjak; chwngno choproknai naiwi tong kha; raidang bai khe bórok Israilni habugrani khangaro swprak kha.

Kaitor Betlehemni tẃiphang khoroksa rwna kók rwma

² Tamo khe o Iphrathani Betlehem, Judani bosongni bisingo kami kotoi kuk kaisa, nini bisingni ani bagwi khoroksa Israilno tẃithernai khoroksa phainai, bini bosong yaphang khe kwcham mol brúm brúmni simi’-no tongo.

³ Aboni bagwi bo a bwsa bánaijwkma bá ya sak bo bórokno yakarnai; aphuru khe tei sandairok Israil bororokni thani kiphilwi phainai.

⁴ Bo phaiwi Subraiyungni phan bai, bini Subraiyung Kaitorni mungni suar bai bini mera bodolrokno mwrwk phainai. Tei bórok kirina kwrwi khlaiwi tongnai, tamni hwn ba bo o ha páithak jora kotor wngnai;

⁵ bono chini khakchangmung wngnai. Tumung Asiriyasarok chini ha-o phaiwi chwngno swprak phai khe chwng khoroksni eba khe khorokchar suda mera mwrwknairokno bórokno kebeng rwui tẃiphangrok bacha rwnai. Tumung chini ha-o Asiriyasasong hap phai khe tei chini ha-o kasa phai khe chini naikolphang wngna bagwi tei bórokno kebengna bagwi bacha rwnai, phiya khoroksni khorokchar naikolphangrokno bacha rwnai.

Phiyókma tei sátokjakma

⁶ Bórok seng bai ha Asiriyasani habugra chánai tei Nimrodni hano seng bohokni sokokjak bai habugra chánai; tumungno bórok chini ha-o phai khe eba chini ha ari gandar jora rekersa khe bo chwngno Asiriyasarokni yakni phiyóknai.

⁷ Aphuru khe aswk dopharokni bisingni Jakobni yógwi tong rwkjakrok Subraiyungni aroni pantwi hai wngnai, sam sakani pantwi tháijak hai wngnai, abo bororokni naima-o eba bororokni saka-o bwkha bera ya.

⁸ Jakobni bosongni yógwi tong rwknairok dopharokni bisingo teibo borok kwbángma bai kitingjak khe tongnairok bolongni mal-matarokni bisingo singho hai tong tẃi tei merarokni bisingo phan gwnang singho masa hai wngnai, bo abórokni kwchar tẃi tháng khe bórokno phindrik-phandrak khlaiwi khibi-o, khoroksa phano bono phiyógwi man ya.

⁹ Nini kena arirokni saka-o nwng yak kosonnai tei nini kena arirok sokomorjak báinai.

¹⁰ Ang a salo nini aroni korairok tei korai malkhungrokno sokomornai hwnwi Subraiyung Kaitor sa-o;

¹¹ tei nini hani kamiyungrokno sokomornai tei nini bebak choba khlaijaknai nok kwrakrokno sokomornai;

¹² nini bisingni mwtai manjakrokno sokomornai tei mwtai rwui thinango tamo wngnai wng ya sanairokno sokomornai;

¹³ nini takjak mwtai mangrokno tei nwng khulumma thonglarokno sokomor báinai; hakhe nwng sak baithang khulumna hwnwi takma manwirokno tei khulum glak;

¹⁴ tei ang nini bisingni Aserano phuichaui páinai tei nini kamiyungrokno sokomornai.

¹⁵ Tei ano khulum ya dopharokno belai jolima bai khe ang yagul su-ui sátoknai.