MIKA 4 - Kok Borok (Re-edited) Bible (BSI)

Subraiyung tong kwchang khe tẃithemani

¹ Ulo omo hai salrok sók phainai, Subraiyungni nokthar tongmani hathái bebak hachukrokni slái kuchuk wngnai, tei hachukrokni slái abono kuchuk khlaijaknai. Bororok aro kochok khlai tẃi khe phainai,

² hakhe kwbángma dopharok phaiwi hai hwnwi sanai: “Him di tho, Subraiyungni hathái-o, Jakobni Kaitorni nogo; bo chwngno bini lamarokno tẃiwi phrwngnai tei bini chongma lama tẃi chwngbo himnai.” Tamni hwn ba Siyonni se phrwngmungrok phainai, tei Jerusalemni se Subraiyungni kók ongkhor khlainai.

³ Bo dopharokno buj khlaiwi rwnai hakchal tei samphani phan gwnangrokno methebwi rwnai; bórok bórokni sengrokno swbaiwi phal snamnai, koslurokni khe sam ekhurwi saijaknai damra snamnai; dopha bai dopharok tei choba nang lai glak, bórok tei chobabo srwng lai glak;

⁴ tamo khe bórok bebakno sak-sakni angur phang yaphango, khwichang phang yaphango achuk lainai, bórokno khoroksa phano sikiri-sokoro khlai glak; tamni hwn ba Phankrak Subraiyung se a kók sama ba.

⁵ Bebak dopharok’-no bórokni mwtaini mung bai tong bai-o, tamo khe chwng khe mol brúm brúm chini Subraiyung Kaitorni mungwi tongnai.

Israil rwkhlai rohorjak hani kiphil phinai

⁶ A salo, ang yakung-yak man yano, rwkhlai rohorjaknaino tei ang birman phnangma bororokno kwrẃngsa khe thumnai hwnwi Subraiyung sa-o.

⁷ Yakung man yano ang tong rwknai khlainai tei riphrigwi rwkhlaiwi rohorjaknai dophano khe ang dopha kwrak khlainai; Subraiyung Siyon hathái-o tong twtwi aphuruni simi mol brúm brúm bugra wng phlai tongnai.

⁸ O mera nai khlaiwi mwrwkjaknai nok kuchuk, Siyonni sajwkni hathái, swkangni hano nono kiphilwi rwjak phinai; Jerusalemni sajwkni hano.

⁹ Tabuk norok tamni aswk chirigwi kap lai? Tamo habugra kwrwi diba? Nono kókbiti rwnairok thwi bái kha hai de, tamo bwrwirok sak kengna phuru ok sajakma hai khe tekto manẃi tong?

¹⁰ O Siyonni sajwk, bwrwi sak kengna nai phuru bohok sajagwi keng gai lai tẃi khe kengai di; tamni hwn ba norok tabuk kamiyungni ma nongkhornai tei swrwng-swrwng hatalo khe ma tongwinai; nwng Babilono ma thángnai. Aro nwng phiyókjaknai, aro Subraiyung nono nini kena arirokni yakni phiyóknai.

¹¹ Tabuk dopha kwbángma nono kebengwi swprakna bagwi kuthum lai kha, bórok hai hwnwi sa lai-o, “Bono kwthar ya khlainai tei chwng Siyonno naisigwi tong lainai.”

¹² Tamo khe bórok Subraiyungni uansukmano saui man lai ya; maitangrokno nakna bagwi nakthani thumsa khlai tẃi khe khlaina hwnwi bo chapmano bórok romwi man ya.

¹³ O Siyonni sajwk, bachaui nak di, tamni hwn ba ang nini bokorongno sor hai, yakungni yáskuno pitol hai khlainai; nwng borok kwbángmano swpragwi phindrik-phandrak khlainai tei ang bórokni manwi-khwnwirokno Subraiyungni thani yapharnai, bebak hani’-no Subraiyungno bórokni manwi khwnwirokno yapharnai.