MATHAI 8 - Kok Borok (Re-edited) Bible (BSI)

Biyadi chájakno Jisu ham rwmani

¹ Jisu hatháini ongkhorwi phai khe luku kwbángma bono rwkthar kha.

² Aphuru biyadi chájak khoroksa bini thani phaiwi yáskú sungwi hai hwnwi sa kha, “Hodasa, nwng ano ham rwna khe ham rwui mano.”

³ Jisu yak phologwi bono tangwi “Ham di, ang nai-o,” hwnwi sa kha. Hai kheno doropsa bini biyadi ham kha.

⁴ Jisu bono hai hwnwi sa kha, “Khna di, o kókno kebono ta sa di. Tháng di, ochaino thángwi phunugui di. Nwng tabuk ham kha hwnwi lukuno phunukna bagwi Musi rathar di hwnwi dagima hai’-no ratharwi di.”

Rumni sengkrak okrani selengno Jisu ham rwmani

⁵ Jisu Kapharnaumo hap khe Rumni sengkrak okra khoroksa bo bai malaiwi bono hai hwnwi koiwi kha.

⁶ “Hodasa, ani seleng nogo hamya klaijak, kisa phano bachaui man ya belai khe klai tong kha.”

⁷ “Ang thángwi bono ham rwui anw,” hwnwi Jisu sa kha.

⁸ Sengkrak okra hai hwnwi sa kha, “I’nhi, hodasa, ani nogo nono kasa rwna ang chúk ya. Nwng hwn khe’-no ani seleng ham anw.

⁹ Angbo bokhorok khoroksani yago, ani yagobo sengkrakrok tongo. Ang khoroksano ‘Tháng di!’ hwn khe bo thángo, tei khoroksano ‘Phai di!’ hwn khe bo phai-o, ani selengnobo ‘Omono khlai di!’ hwn khe bo abono khlai-o.”

¹⁰ O kók khnaui Jisu uanajak kha, bono rwktharnairokno bo hai hwnwi sa kha, “Norokno ang o kók sa-o, Israilrokni bisingo phano bo hai poito gwnang borok ang nuk ya kho.

¹¹ Ang norokno o kók sa-o, borok kwbángma salkabaini salthángbaini phaiwi Kaitorni ha-o Abraham, Isak tei Jakob bai baksa achugwi chá lai anw;

¹² a ha-o tongna hwnnairok khe phatarni mwnakma-o khiklai rwjak anw, bórok aro ua hului ma kap anw.”

¹³ Hakhe Jisu sengkrak okrano hai hwnwi sa kha, “Nogo tháng di, nwng poito khlai tẃi’-no nini bagwi khlaijak anw.” Hakhe a sengkrak okrani seleng aphuru’-no ham kha.

Borok kwbángmano Jisu ham rwmani

¹⁴ Jisu Pitorni nogo tháng kha, bo aro Pitorni bwkrajwkno lumui klaiwi tongma nuk kha.

¹⁵ Bo bini yak tang kha, aphuru kulum swraui tháng kha; hakhe bo bachaui bono chá rw kha khan rw kha.

¹⁶ Sanja klai kheno bororok mwtai hamya kolobjakrok kwbángmano Jisuni thani tubu kha. Hakhe Jisu kók tháisa bai’-no mwtai hamyarokno rwkhlai kha, bebak hamyaroknobo ham rw kha.

¹⁷ “Bo sakphang’-no chini hamyano hor kha, chini bemukrok ruju-ui tlang kha,” hwnwi Jisaia diyari sa langmani abo nang phaina bagwi omo wngo.

Jisuni logi tongna nainairok

¹⁸ Jisu luku kwbángmano bono chorsa khe kuthumma nugwi bini sagrirokno twibomni ayang naro thángna hwnwi dagi kha.

¹⁹ Kerong phrwngnai khoroksa bini thani phaiwi hai hwnwi sa kha, “Hodakra, nwng tháng thani-o ang thángna gosi-o.”

²⁰ Jisu bono hai hwnwi sa kha, “Siyalni hakhor tongo, toksa-toktẃirokni bothop tongo, Borokni Sajlani le kwrẃngsa phano bokhorok bomna se kwrwi.”

²¹ Tei khoroksa sagri hai hwnwi sa kha, “Hodakra, swkang aphano phobwi rwui grana.”

²² Jisu hai hwnwi sa kha, “Nwng ani logi phai di, kwthwi bai kwthwi’-no phob lai thung.”

Jisu nokbar kotor thak rwmani

²³ Jisu rungo ka kha, bini sagrirokbo bini logi tháng kha.

²⁴ Achomsa twibomo nokbar kotor sibcha khe rungo twi aphal pung phai kha. Aphuru Jisu thu-ui tongo.

²⁵ Sagrirok bini thani thángwi bono socha lai “Subrai, chwngno mwthang di, chwng thwina naiwi tong lai kha!” hwnwi sa kha.

²⁶ “Norok tamni bagwi aswk kirijak? Norokni poito tamo swk kisa gwja!” hwnwi Jisu hwn kha. Hakhe bo bachaui nokbar bai twino damrogwi rw kheno bebak kwchang kwchang wng kha.

²⁷ Bebakno uanajak bai kha, “Omo bubo tẃi borok hwno? Nokbarrok bai twirok suda bini kók khnaui ma tongo!” hwnwi bórok sa lai kha

Jisu mwtai hamya kolobjak khoroknwino ham rwmani

²⁸ Jisu twibom ayang narni Gadara amchoi-o phai khe simalwngni ongkhorwi phainai borok khoroknwi bini thani sók phai kha. Bórok mwtai hamya kolobjak, bórok belai kirimasingcha, aboni bagwi khoroksa phano a lama tẃi him rak ya.

²⁹ Logi logi’-no bórok hai hwnwi chirikhók kha, “O Jisu, Kaitorni Sajla, nwng chwng bai tamo nangjak? Mol sók phai ya sini’-no da nwng chwngno sátokna phai?”

³⁰ Aro uak kwbángma ada chá laiwi tongmani, abo bai kwbáng chal tha ya.

³¹ “Nwng chwngno rwkhlaina khe u uak bodolo chwngno rohor ja di,” hwnwi mwtai hamyarok Jisuno koi kha.

³² “Tháng di,” hwnwi Jisu bórokno hwn kha. Hakhe bórok ongkhorwi uakrokni bisingo thángwi habwi kha. Hakhe aswk uak bebak’-no harwbra tẃi ongkhor klaiwi twibomo kwlwgwi thwi bai kha.

³³ Uak mwrwknairok khárwi tauno tháng lai kha, hakhe bebak kókno khupro-ui saui bai kha, a mwtai hamya kolobjakrok tamo wng kha a kóknobo saui bai kha.

³⁴ Aboni bagwi taunni khoroksa kwrwi tẃi Jisu bai malaina hwnwi tháng kha. Bórok bo bai malai khe bono bórokni amchoini ongkhorwi tháng di hwnwi koi kha.