MATHAI 5 - Kok Borok (Re-edited) Bible (BSI)

Hathái-o kasaui Jisu phrwngmani

¹ Jisu borok kwbángma nugwi hathái-o kasa kha, bo aro achuk kha. Bini sagrirok bono chorsa khe kuthum kha,

² hakhe bo phrwngna chengsa kha.

Lama Kaham

³ “Kaitorni thani koiwi tongnairok bórok hamchajak; Kaitorni ha bórokni’-no!

⁴ “Khá khamnairok bórok hamchajak; Kaitor bórokno khá kwchang rwnai!

⁵ “Khá sutrangrok bórok hamchajak; Kaitor rwna hwnmano bórok mannai!

⁶ “Kaitor naima tẃi simi tongna nainairok, bórok hamchajak; Kaitor bórokno khá kochom rw suknai!

⁷ “Buino maya chánairok bórok hamchajak; Kaitorbo bórokno maya chánai!

⁸ “Khá kuphurrok bórok hamchajak; bórok Kaitorno nuknai!

⁹ “Buino kwtha rwnairok bórok hamchajak; Kaitor bórokno bini bwsarok hwnnai!

¹⁰ “Kaitor naima tẃi tongwi sátokjaknairok bórok hamchajak; Kaitorni ha bórokni’-no!

¹¹ “Norok ani borok wngma bai bui norokno lachi rw khe, norokno sátok khe, norokno tatal khe kók hamya sa khe norok hamchajak.

¹² Khá srang di, tongthok di, tamni hwn khe chuknoha-o norokni bagwi sokat kwbángma khatijak tongo. Norokni slái swkang tongnai diyariroknobo bororok omo tẃi kheno sátok kha.”

Sóm bai chati

¹³ “Norok khe swngcharni sóm. Phiya ba sóm pab ya wngwi tháng khe abono pab rw phinani tei lama kwrwi. Abo mungsa samungo phano chúk ya, aboni bagwi khibiui rwjago, hakhe bororokbo kádulwi thángo.

¹⁴ “Norok khe swngcharni chati. Hathái sakani tauno huiwi tonwi man ya.

¹⁵ Khoroksa phano twk bai thuklubwi tonna hwnwi chati phnang ya; tamo khe thopna saka’-ono tono, hakhe nokni bebak bororok pohor nugo.

¹⁶ Omo tẃi kheno bororokni thani norokni chati ma chẃng thai, hakhe norok samung kaham khlaimano nugwi bórok chuknoha-o norokni Phano ma lob anw.”

Kerongni kókno tẃiwi phrwngmani

¹⁷ “Ang Musini kerong bai diyarirok phrwngmarokno swkwmana phai-o hwnwi khá ta ka di. Ang swkwmana phai ya, a phrwngmarokno samungo phnangna se phai-o.

¹⁸ O kókno muitu narwk di, ha bai nokha tong sak Kerongni kók tháisa láisa phano kwmaui tháng glak; bebak páisuk ya sak’-no tong anw.

¹⁹ Hakhe Kerongni kók kisa phano rákhok yaui buinobo abo hai’-no tongna phrwngnai borok bo Kaitorni ha-o jotoni slái kotoi wngnai. Phiya ba Kerong rákhogwi buinobo abo hai’-no tongna phrwngnai borok bo Kaitorni ha-o kotor wngnai.

²⁰ Ang norokno o kók sa-o, Kerong phrwngnairok bai Pharisairokni slái kaham khe Kaitor naima tẃi tong khe simi se norok Kaitorni ha-o habwi man anw.”

Jolimani kókno tẃiwi phrwngmani

²¹ “Norok agini bororokno ‘Borok ta buthar di; borok butharnai bo buj thumjak anw,’ hwnwi sajakmani o kókno khna kha.

²² Phiya ba ang norokno o kók sa-o: Takhukno jolijaknai borok bo buj thumjak anw; takhukno ‘Natha’ hwnnai borok bo Kaunsil bwskango tubujak anw; phiya takhukno ‘Bepotar’ hwnnai borok bo morkeni hóro khiklaijakna bagwi birman nang anw.

²³ Aboni bagwi nwng Kaitorni háyá-o barokna phuru nini bebailo nini takhukni kók tongo hwnwi muitu man khe.

²⁴ A barokmano háyá-ono klangwi nini takhuk bai kwthaui gra di; hakhe kiphilwi phaiwi Kaitorno barok phai di.

²⁵ “Khoroksa swk phano nini mungwi kuto kes phnang khe kuto tháng ya sini’-no bo bai kwthaui pái di; kuto tháng khe bo nono jojni yago yapharnai, joj pulisni yago nono yapharnai, hakhe nwng alongo chopjaknai.

²⁶ Ang nono o kók sa-o, lepsa kwrwi tẃi jurbanda rw bai ya sak nwng aro ma tongnai.”

Lupchani kók

²⁷ “ ‘Buitali-buitala ta wng di,’ hwnwi sajakmani o kókno norok khna kha.

²⁸ Phiya ba ang norokno o kók sa-o, bwrwi khoroksano phano nugwi sak tangna muchungnai borok bo khá bising bising lupcha wngma klai-o.

²⁹ Aboni bagwi nini yagrani mokol nono sumsogo khiklai khe abono ekhregwi khibi di. Nini bebak bwsak morke-o khiklaijakmani slái bwsakni mungsaswk kwmama phano ham kugo.

³⁰ Nini yagra yak nono sumsogo khiklai khe abono tansu-ui khibi di. Nini bebak bwsak morke-o khiklaijakmani slái bwsakni mungsaswk kwmama phano ham kugo.”

Kak laimani kók

³¹ “ ‘Khoroksa swk bini bihikno kak khe kaksen swiwi ma rwnai,’ hwnwi sajakmani o kókbo tongo.

³² Phiya ba ang norokno o kók sa-o, buitali wng ya phano khoroksa swk hikno kak khe, phiya a bwrwi tei khoroksano káijak khe, hakhe a chwla a bwrwino buitali khlaima klai-o; phiya a kakjak bwrwino nanai borok bo’-bo lupcha.”

Swmai tangmani kók

³³ “ ‘Nwng swmai ta swbai di, tamo khe Kaitorni thani swmai tangma hai’-no khlai di,’ hwnwi agini bororok sajakmani o kókno norok khna kha.

³⁴ Phiya ba ang norokno o kók sa-o, norok kók rw phuru swmai ta tang di; chuknohani mungwi ta tang di, abo Kaitorni achukthai;

³⁵ hano romwi buya, abo bini yakung boksajaknai; Jerusalemni mungwi buya, abo bugra kotorni taun.

³⁶ Nini khorokno romwibo swmai ta tang di, tamni hwn khe bwkhnai twngsano phano nwng kuphurbo khlai man ya, kosombo khlai man ya.

³⁷ ‘I’n’ khe ‘I’n’ hwn di, ‘I’nhi’ khe ‘I’nhi’ hwn di, aboni slái bára wng khe abo Soitanni aroni ongkhorma se.”

Yagul su lai phimani kók

³⁸ “ ‘Mokolni bodla mokol, buani bodla bua,’ hwnwi sajakmani o kókno norok khna kha.

³⁹ Phiya ba ang norokno o kók sa-o, nini hamya khlainai borokno yagul ta su phi di. Khoroksa swk nono yagra khangaro thapra rw khe yaksi khangarno chagwi rw phi di.

⁴⁰ Khoroksa swk nini kamchlwini bagwi kes phnang khe nini dulainobo bono ahai’-no rwui rw di.

⁴¹ Khoroksa swk nono bini poja juraboli khe mail kaisa tẃi di hwn khe tei mail kaisa ahai’-no tẃi di.

⁴² Khoroksa swk nini thani mungsa swk san khe bono abono rw di; khoroksa swk solok nai khe bono abono rw di.”

Kena arirokno hamjak di

⁴³ “ ‘Nini nok-arini bororokno hamjak di, tei kena arirokno naisler di,’ hwnwi sajakmani o kókno norok khna kha.

⁴⁴ Phiya ba ang norokno o kók sa-o, norokni kena arirokno hamjak di, norokno swrainairokno hamari rw di, norokno naislernairokni kaham khlai di, norokni hamya khlainairokni bagwi tei sátoknairokni bagwi suri san di;

⁴⁵ hakhe norok chuknohani norokni Phani sajla wngnai, tamni hwn khe bo bini satungno borok kahamnobo rw-o, borok hamyanobo rw-o; phiya kaham khlainainobo uatwi rw-o, hamya khlainainobo rw-o.

⁴⁶ Norokno hamjaknairokno simi norok hamjak khe Kaitor tamo wngwi norokno sokat rwnai. Teks romnairokbo abo tẃi hamjak lai bla!

⁴⁷ Norokni bororok bai simi kók sa lai khe buini slái kwbáng tamo khlaima klai? Tei buirokbo abo tẃi ba sa lai bla!

⁴⁸ Chuknohani norokni Pha kaham wng tẃi norokbo katswi bo hai’-no kaham wng di.”