MATHAI 28 - Kok Borok (Re-edited) Bible (BSI)

Jisu thangwi bachamani

¹ Sabat sal páiwi Kaitho Salni aiprom-poromo Magdalani Mariam bai tei khoroksa Mariam mangkhor naina hwnwi tháng lai kha.

² Aro achomsa bangla koromsaui phai kha; Subraini suari khoroksa chuknohani ongkhorwi phai kha, hakhe a holongdap girok rwui norwi a saka achuk kha.

³ Bini bwsak chẃngmabo nokha philikma hai, rí-chumrok phurmabo kothor kwsap hai.

⁴ A mwrwknairok bono nugwi belai kirijak laima bagwi kwlwibraui kwthwi hai wngwi tháng kha.

⁵ A suari bwrwirokno hai hwnwi sa kha, “Norok ta kiri di. Ang saui mano norok kruso kanta bujaknai Jisuno naitugo.

⁶ Bo oro kwrwi kha; bo sama hai’-no bo mwthangwi tisajak kha. Phai di, nai phai di, orono bono mokholmani.

⁷ Do lang di tabuk, dakti thángwi bini sagrirokno hai hwnwi saui di, ‘Bo kwthwini mwthangwi tisajak kha, tabuk bo norokni slái swkang Galili-o thángnai, norok aro bono nugwi anw.’ Ani o kókno muitu narwk di.”

⁸ Hakhe bórok a mangkhorni do lang kha, bórok kirijak lai kha, hai phano jai kheno tongthok laijak, hakhe bini sagrirokno sauina hwnwi khachik lai kha.

⁹ Achomsa Jisu bórokno nukjagwi “Norok ham di,” hwnwi sa kha. Bórok bini thani phai lai kha, hakhe bini yakung kwbagwi khulum lai kha.

¹⁰ Jisu bórokno hai hwnwi sa kha, “Ta kiri di. Tháng di, ani takhukrokno Galili-o tháng di hwnwi saui di, hakhe bórok aro ano nugwi anw.”

Ochai okrarokni thani mwrwknairok sa phaimani

¹¹ Bwrwirok tháng bai khe mangkhor mwrwknai sengkrakrok baksa tauno tháng phirwi ochai okrarokno bebak wngmano khupro-ui saui kha.

¹² Ochai okrarok okra chakrarok bai malaiwi kók chap lai kha; bórok a sengkrakrokno rang kwbángma rwui

¹³ hai hwnwi sa kha, “Norok ahai hwnwi sa di, horo chwng muktrwi thángwi tong phuru bini sagrirok phaiwi bini mangno khogwi tlang phai kha

¹⁴ Tumungno gobornor o kók khna khe chwng bono soi rw anw, hakhe norok uanana nang glak.”

¹⁵ Mwrwknairok rang naui a sajakma hai’-no khlai kha. Tabuk suda Judairokni bisingo o kókno pírjagwi tong kho.

Jisu bini sagrirok bai nukjakmani

¹⁶ Sagri chisarok Jisu tháng di hwnwi samani Galilini a hathái-o tháng kha.

¹⁷ Bórok bono nuk kheno khulum lai kha, tamo khe baksa baksa bwkha udru mudru wngjak kha.

¹⁸ Jisu bórokni thani phaiwi bórokno hai hwnwi sa kha, “Chuknoha bai swngcharni bebak phan ani yago yapharjak kha.

¹⁹ Aboni bagwino tháng di, swngchar gwnangwi bebak borokni thani thángwi bórokno ani sagri snamwi di: Pha, Sajla tei Phola Kwtharni mungwi bórokno baptisma rw di.

²⁰ Ang norokno joto dagima hai khe tongna bagwi bórokno phrwng di. Phiya muitu narwk di, o mol pái ya sak ang norok bai máng tongo.”